Ձեր վստահելի աղբյուրը

«Լրագրողներ առանց սահմանների» (Reporters Without Borders) միջազգային իրավապաշտպան կազմակերպության հրապարակած զեկույցում հեղինակները հետխորհրդային երկրները դասակարգել են երկու խմբի՝ «Նավթի և գազի պատճառով անպատժելի բռնապետություններ» և «Առաջատար քառյակ», որտեղ տեղեկատվությանը սպառնում է հասարակության բևեռացումը:

Զեկույցն արձանագրել է, որ մամուլի ազատության առումով «Առաջատար քառյակում» են Մոլդովան, Հայաստանը, Վրաստանը և Ղրղզստանը, որտեղ կա բազմակարծության բարձր մակարդակ և համեմատաբար քիչ պետական գրաքննություն:

Բայց զեկույցի հեղինակները միաժամանակ փաստել են, որ հասարակական բևեռացումը մեծ ազդեցություն է թողնում ԶԼՄ-ների և լրագրողների գործունեության մթնոլորտի վրա, ովքեր հաճախ հետապնդվում են որոշակի ճնշման խմբերի կողմից:

Բացի այդ, ըստ զեկույցի, ԶԼՄ-ների քաղաքական կողմնորոշումն ուղղակիորեն համընկնում է նրանց տերերի քաղաքական կողմնորոշումների հետ, ինչը սահմանափակում է ԶԼՄ-ների խմբագրակազմի անկախությունը:

«2013թ.-ին Վրաստանում և Հայաստանում տեղի ունեցած ընտրությունները ավելի հանգիստ պայմաններում են անցել, քան նախորդները: Լրագրողների նկատմամբ բռնությունները հազվադեպ են եղել: Հայաստանի հանրային հեռուստաընկերությունը առաջընթաց է գրանցել իր անկողմնակալության մեջ, սակայն ընտրական մթնոլորտը սրվում է մասնավոր ԶԼՄ-ների միջև տեղեկատվական պատերազմով, պատերազմ, որտեղ իշխանությունները բացահայտ առավելություն ունեն»,- գրված է զեկույցում:

Իսկ «Նավթի և գազի պատճառով անպատժելի բռնապետություններ» խմբում են Թուրքմենստանը, Ուզբեկստանը, Ղազախստանը և Ադրբեջանը: Նշվում է, որ այդ պետությունները միջազգային հանրության կողմից քիչ ճնշումների են ենթարկվում իրենց նավթի և գազի մեծ պաշարների պատճառով: Զեկույցի հեղինակները եզրակացրել են, որ անպատժելիությունը թույլ է տալիս այդ պետություններին խիստ վերահսկողության տակ պահել ԶԼՄ-ները և բանտարկել չենթարկվող լրագրողներին:

«Մամուլի ազատության նկատմամբ ճնշումները Ադրբեջանում ընդունված ռազմավարություն է, որտեղ ԶԼՄ-ում բազմակարծության գոյությունը վտանգի տակ է: Հեռուստաընկերությունները իշխանության վերահսկողության տակ են, արտասահմանյան հիմնական ռադիոկայանները արգելված են, և գլխավոր ընդդիմադիր թերթը մայրաքաղաքից դուրս գրեթե չի տարածվում ու գտնվում է սնանկացման եզրին: Միաժամանակ չենթարկվող լրագրողներն ու բլոգերները ենթարկվում են ֆիզիկական բռնությունների, մահվան սպառնալիքի, զրպարտվում են և առևանգվում»,- ասված է զեկույցում:

Եթե համեմատելու լինենք 2014թ.-ի զեկույցը նախորդ տարվա զեկույցի հետ, ապա ընդհանուր առմամբ պատկերը չի փոխվել: Հայաստանը շարունակում է մամուլի ազատության առումով Հարավային Կովկասում լինել առաջատարը, իսկ ողջ հետխորհրդային տարածքում առաջատարը Մալդովան է: Ռուսաստանը մամուլի ազատության առումով շարունակվում է համարվել ավտորիտար պետություն: Ուկրաինայում զեկույցի հեղինակները արձանագրել են մամուլի ազատության որոշակի հետընթաց՝ կապված 2013թ.-ին երկրում ստեղծված քաղաքական ճգնաժամի հետ:

«Լրագրողներ առանց սահմանների» (Reporters Without Borders) միջազգային իրավապաշտպան կազմակերպությունը հրապարակել է աշխարհում մամուլի ազատության ցուցիչի վերաբերյալ 2014թ. զեկույցը:

Նախորդող`

«Լրագրողներ առանց սահմանների». Տարածաշրջանում Հայաստանը մամուլի ազատության հարցում առաջատարն է