Ձեր վստահելի աղբյուրը

Քիչ առաջ Ազգային Ժողովում` «Ժառանգություն» խմբակցությունում ավարտվեց չորս ոչ իշխանական ուժերի քննարկումը, որի օրակարգում առաջիկա քառօրյայում կառավարությանը անվստահություն հայտնելու գործընթացի անհրաժեշտությունն էր:

1.5 ժամ տևած քննարկումից հետո «Ժառանգություն» խմբակցության ղեկավար Ռուբեն Հակոբյանը լրագրողներին ասաց, որ բավականին արդյունավետ աշխատանքային հանդիպում էր, որին ընդառաջ պայմանավորվել էին, որ յուրաքանչյուր խմբակցություն կներկայացնի իր նախագիծը, թե ինչպես է պատկերացնում ստեղծված իրավիճակից ելքը:

«Բնական է, որ այդ չորս նախագծերը այսօր չէինք կարող քննարկել, պարզապես որոշակի վերաբերմունք արտահայտեցինք դրանց նկատմամբ: Այժմ խմբակցությունները կքննարկեն այդ նախագծերը նաև իրենց կուսակցական մարմիններում և առաջիկա օրերին կայանալիք մեր մյուս աշխատանքային հանդիպման ժամանակ վերջնական որոշումը կկայացնենք»,- հայտարարեց Ռ. Հակոբյանը:

Ըստ նրա, չորս ուժերի մոտ էլ կար ընդգծված կեցվածք, ցանկություն, որ այս ձևաչափով ունենան միասնական նախագիծ:

Ճշտող հարցին` այս պահին, փաստորեն, վերջնական համաձայնության չեն եկել առաջիկա քառօրայում կառավարությանն անվստահություն հայտնելու մասով, «Ժառանգություն» խմբակցության ղեկավարն ասաց` մի քանի օրից կլինի վերջնական հանդիպումը և կլինեն այդ հարցերի պատասխանները:

«Այս պահին կարող եմ ասել, շատ հավանական է, որ այդ համաձայնությունը ունենանք»,- ընդգծեց նա:

Panorama.am-ի հարցին ի պատասխան, թե սկբում խոսվում էր, որ այդ գործընթացը սկսելու են հենց գարնանային նստաշրջանի առաջին նիստում, սակայն «Ժառանգությունն» ու ՀՅԴ-ն խնդրել էին գործընկերներին հետաձգել, ինչպիսին է կոնկրետ «Ժառանգության» դիրքորոշումը հիմա, Ռ. Հակոբյանը պատասխանեց, բայց ըստ էության լրիվ այլ բան. «Բոլոր ուժերն էլ տարբեր ժամանակահատվածներում կառավարությանը քննադատել են` և հնգամյա ծրագրի հաստատման, և այս տարվա բյուջեի քննարկման ժամանակ` բացասական գնահատելով կառավարության գործունեությունը»:

Այն հարցին, թե ինչ են իրենցից ներկայացնում այսօր քննարկված նախագծերը, արդյոք դրանցում թեկնածուների անուններ են հնչում, Ռ.Հակոբյանը պատասխանեց, թե ավելին ասել չի կարող, քանի որ նման պայմանավորվածություն է ձեռք բերվել. «Սպասենք մի քանի օր ևս»: