Ձեր վստահելի աղբյուրը

Այսօր Ազգային անվտանգության ծառայության «մի խումբ աշխատակիցների» ստորագրությամբ հայտարարություն էր տարածվել, որտեղ նրանք իրենց «զայրույթն» են հայտնել ԱԱԾ պետի նախկին տեղակալ Գուրգեն Եղիազարյանի վերջին հայտարարությունների վերաբերյալ:

«Լրատվամիջոցներում, տարբեր հեռուստահաղորդումների ժամանակ ՀՀ Ազգային անվտանգությանն առնչվող հարցերի շուրջ, հաճախ հնչում են պարզաբանումներ, մեկնաբանություններ, որոնց հեղինակը որպես ազգային անվտանգության նախկին փոխնախարար ներկայացող Գուրգեն Եղիազարյանն է:

Հարցերին նրա ոչ պրոֆեսիոնալ մոտեցումները, շատ անգամ զավեշտի հասնող մեկնաբանությունները, հիվանդ երևակայությամբ ծնված հայտարարությունները հարկավ հանրության աչքին ևս մեկ անգամ երևալու, իր մասին հիշեցնելու համար են: Սակայն դա շատ վիրավորական է և զարյույթ է առաջացնում Ազգային անվտանգության համակարգի աշխատակիցների և Գուրգեն Եղիազարյանին իսկապես ճանաչող մարդկանց մոտ: Քաղաքական դաշտում այդպես էլ իր տեղը չգտած, պարբերաբար կուսակցություններ ու քաղաքական թիմեր փոխած այս անձնավորությունն առանձնակի ուշադրության արժանի էլ չէ, բայց երբ փորձում է հանդես գալ, որպես «վաստակավոր հետախույզ» և մասնագիտական եզրակացություններ անել, վիրավորելով իրենց աշխատանքին իսկապես նվիրված, արհեստավարժ մասնագետներին, հարկ ենք համարում հանրությանը ապատեղեկատվությունից զերծ պահելու համար հրապարակել որոշ փաստեր, որոնք կդիմակազրկեն Գուրգեն Եղիազարյան կոչվածին», -նշվումէ հայտարարության մեջ:

«Ես ընդամենը ասել եմ, որ Հասան Օքթայը (թուրքական «Գորշ գայլեր» կազմակերպությունից) տասը տարի շարունակ եկել-գնացել է իմ երկիր, բա որտե՞ղ էր ԱԱԾ-ն: Սրանք միայն նրա համար են որ միայն ընդդիմությանը հետապնդե՞ն: Ասել եմ, որ մեկ տոննա հերոինը օպերատիվ աշխատողը պետք է բռներ, ոչ թե մաքսայինի աշխատողը: Եվ միայն Աստծոն է հայտնի, թե քանի տոննա է մտել իմ երկիր: Բա որտե՞ղ են սրանք: Ես ասել եմ, որ ինչ պաշտոնյա կա, նրա հեռախոսահամար, հատուկ ֆայլեր ու փաստաթղթեր ընկել են թուրքերի ու ադրբեջանցիների ձեռքը»,- Panorama.am-ի թղթակցի հետ զրույցում մեկնաբանելով «ԱԱԾ միխումբ աշխատակիցների» հայտարարությունը, ասաց ԱԱԾ պետի նախկին տեղակալ Գուրգեն Եղիազարյանը:

Նույն հայտարարության մեջ նշվում էր նաև, որ «նախկին միլիցիոներ Գուրգեն Եղիազարյանը ՆԳՆ կադրերի տրամադրության տակ էր, երբ Ազգային անվտանգության պետական վարչության պետ Դավիթ Շահնազարյանի հետ ունեցած բարեկամական կապի շնորհիվ նշանակվեց ԱԱՊՎ պետի տեղակալ և այդ պաշտոնը զբաղեցրեց ընդամենը 7-8 ամիս: Լինելով ղեկավար պաշտոնում՝ նա այդպես էլ չկարողացավ հասկանալ Ազգային անվտանգության համակարգի էությունն ու նշանակությունը, աշխատանքային նրբություններն ու յուրահատկությունները»:

Ի պատասխան սրան, Եղիազարյանն ասաց, որ ինքը այդ պաշտոնին նշանակվել է օպերատիվ երկար` 20 տարվա ծառայությունից հետո:

Հայտարարությունը շարունակվում էր այսպես. «Ապարանից եկած միջին տարիքի «գուշակ» կնոջ հետ նրա ամենօրյա հանդիպումներից հետո, ցուցումների տարափ էր թափվում հակահետախուզության աշխատակիցների վրա` ատոմակայանին, գնացքներին, ավտոմեքենաներին և այլ օբյեկտներին սպառնացող վերահաս վտանգների, պայթյունների մասին: Այս գուշակի «կանխատեսումներից» հետո բավականին ուժ ու միջոցներ էին կենտրոնացվում այդ ուղղություններով` խաթարելով համակարգի բնականոն աշխատանքը, և ոչ մի անգամ այդ «կանխատեսումները» չէին հաստատվում, իսկ Գուրգեն Եղիազարյանը դարձյալ ոչ մի հետևություն չէր անում: Ավելին, հավատացնում էր, որ ինքը ևս կապեր ունի տիեզերական ինչ-ինչ ուժերի հետ և շատ դեպքերում չհասկանալով , թե մենք ինչով ենք զբաղված, փորձում էր արտերկրային ինչ-որ ուժերի ազդեցությամբ մտնել մեր գործելաոճի մեջ ու թելադրել»:

Եղիազարյանը չժխտեց, որ իր պաշտոնավարման տարիներին օգտվել է պայծառատեսի «ծառայություններից»:

«Այդ մարդիկ մի հիսուն տարի հետ են մնացել կյանքից: Այսօր փաստավավերագրական ֆիլմեր կան նկարահանված, որտեղ ներկայացվում է, թե ինչպես են տարբեր երկրներում հատուկ ծառայությունները աշխատել պայծառատեսների հետ: Այո, եկել է ինձ մոտ կին, եկել է պայծառատես և ինչ ասել է, տառ առ տառ կատարվել է», -ներկայացրեց Եղիազարյանը:

Նրա խոսքով, հայտարարությունը ստորագրած «ԱԱԾ մի խումբ աշխատակիցներ» անվան տակ թաքնված է «մի ստահակ»:

«Նրա անունը ես կպարզեմ ու կհրապարակեմ: Չկասկածեք: Անուն ազգանունով ու նրա ծնողների մասին տվյալներով: Այդ մի խումբ մարդիկ լավ կլիներ, որ զբաղվեին իրենց գործով», -նկատեց մեր զրուցակիցը:

Հայտարարության մեջ նշվում էր նաև. «Պաշտոնի նշանակվելուն պես Գուրգեն Եղիազարյանը սկսեց կարգադրել հակահետախուզության աշխատակիցներին զբաղվել մի բանով, որը նրանց գործառույթներին բնորոշ չէր, գործունեության ոլորտի հետ ընդհանրապես կապ չուներ` բացահայտել կեղծ կոնյակի արտադրությամբ, բենզինի վաճառքով զբաղվողների և այլ հաջողակ տնտեսվարողների ինքնությունը: Պարբերաբար իր աշխատասենյակում «հյուրընկալում» էր հայտնի բիզնեսմենների և նրանց հետ «զրույցներ» ունենում»:

«Գորիկ Հակոբյանին հարցրեք, թող ասի Ադրբեջանի երեք նախարարի հեռախոսահամար, հարցրեք, թե որ հայերից որ ահաբեկիչն է Էրդողանի հետ նկարվել ձեռքը բռնած, հարցրեք, թե որ երկրով կարելի է օրը ցերեկով մեկ տոննա հերոին անցկացնել: Հարրցեք թող տա մի օլիգարխի անուն, որին ինքը տեսել է իմ առանձնասենյակում: Թող ասի մի գործ բենզինի կամ արհեստական կոնյակի, որ իմ ժամանակ հետաքննվել, ինչի մասին այդ աշխատակիցների խումբը նշում է», -արձագանքեց Գուրգեն Եղիազարյանը: