Արաքս գետի էկոլոգիական վիճակը Իրանի և Հայաստանի կառավարությունների ուշադրության կենտրոնում է

Տնտեսություն 14:26 13/02/2014

Արաքս գետի էկոլոգիական վիճակը Իրանի և Հայաստանի կառավարությունների ուշադրության կենտրոնում է

«Իրանն ու Հայաստանը կանխարգելիչ միջոցառումներ են իրականացնում, որպեսզի Արաքս գետը զերծ պահեն աղտոտվածությունից»,-այդ մասին հաղորդում է իրանական «ԻՌՆԱ» լրատվական գործակալությունը:

Տեղեկատվության համաձայն՝ Թեհրանում ՀՀ բնապահպանության նախարար Արամ Հարությունյանի և ԻԻՀ էներգետիկայի նախարար Համիդ Չիթչիանի միջև տեղի ունեցած հանդիպման ժամանակ քննարկվել է Արաքս գետն աղտոտվածությունից զերծ պահելու հարցը:

Նախարար Արամ Հարությունյանը շեշտել է, որ կեղտաջրերի մուտքը Արաքս գետ կանխելու նպատակով Զանգեզուրի պղնձամոլիբդենային գործարանում արդիականացման աշխատանքներ են կատարվել և համապատասխան ներդրումներ արվել:

«Այցի ընթացքում իրանական կողմի հետ արդյունավետ բանակցություններ ենք վարել. Ներկայում համատեղ աշխատանքային խումբ է գործում, որը Արաքս գետի ջուրը յուրաքանչյուր ամիս անալիզի է ենթարկում և զեկուցում կատարված աշխատանքների վերաբերյալ»,-հավելել է ՀՀ բնապահպանության նախարարը:

ԻԻՀ էներգետիկայի նախարարն էլ իր հերթին նշել է, որ Իրանն ու Հայաստանը քաղաքական և տնտեսական ոլորտում ակտիվ համագործակցություն ունեն: Նրա խոսքով՝ ՀՀ բնապահպանության նախարարի այցն Իրան լավ առիթ է, որպեսզի ընդհանուր հարցերի շուրջ ավելի շատ քննարկումներ անցկացվեն:

«Հանդիպման ընթացքում պայմանավորվածություն ձեռք բերվեց, որպեսզի հայկական կողմը պղնձամոլիբդենային գործարանի կեղտաջրերը զտող սարքավորումներ տեղադրի, որպեսզի դրանք չթափվեն Արաքս գետը»,-հավելել է Համիդ Չիթչիանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: