Ձեր վստահելի աղբյուրը

Հայաստանում վերջին տարիներին մանկական քաղցկեղի դեպքերը ոչ նվազել են, ոչ էլ ավելացել: Այս մասին այսօր լրագրողների հետ հանդիպման ժամանակ ասաց «Ուռուցքաբանության ազգային կենտրոն»-ի մանկական ուռուցքաբանության և քիմիաթերապիայի բաժանմունքի ղեկավար Գրիգոր Բադալյանը` հավելելով, որ Հայաստանում տարեկան գրանցվում է 90-100 նոր դեպք:

Նշենք, որ փետրվարի 15-ը հայտարարված է մանկական քաղցկեղի դեմ պայքարի համաշխարհային օր: Ըստ վիճակագրության` ամբողջ աշխարհում ամեն տարի 200 հազար երեխա հիվանդանում է քաղցկեղով, մահանում է 90 հազար երեխա:

Ուռուցքաբանը նշեց, որ Հայաստանում ամենից հաճախ հանդիպող քաղցկեղի տեսակը երեխաների մոտ արյան քաղցկեղն է` լեյկիմիան, որը կազմում է չարորակ ուռուցքների մոտ 75 տոկոսը, 15 տոկոս դեպքերը գլխի նյարդային կենտրոնական համակարգի հետ են կապված, քիչ տոկոս են կազմում ոսկրային, երիկամային ուռուցքները:

Գ. Բադալյանի խոսքերով` մանկական քաղցկեղի առաջացման պատճառները անհայտ են, սակայն պատճառներից կարող են լինել քաղցկեղածին նյութերը սննդում և օդում, ծնողների կողմից վնասակար սովորությունները` ծխախոտի և ալկոհոլի չարաշահում, ինչպես նաև մոր մոտ նույնիսկ մինչ հղիությունն առողջական խնդիրներ և այլն:

«Եթե մեծահասակների մոտ ուռուցքների պատճառ կարող են դառնալ նախաքաղցկեղային հիվանդությունները՝ ստամոքսի խոց, կանանց մոտ՝ արգանդի վզիկի էրոզիաներ կամ կրծքագեղձի հիվանդություններ, ապա երեխաների մոտ, որպես կանոն, նախաքաղցկեղային հիվանդություններ չեն հայտնաբերվում»,- ասաց ուռուցքաբանը:

Նա միաժամանկ նշեց, որ վիրահատել են 20 օրական երեխայի, ինչը նշանակում է, որ երեխաների մոտ քաղցկեղը կարող է զարգանալ անգամ սաղմնային փուլում։

Ուռուցքաբանի խոսքերով` ավելի հաճախ հիվանդությունը հայտնաբերվում է 2-4 տարեկան երեխաների մոտ և գիտնականների համոզմամբ` այդ ուռուցքները ոչ թե ժառանգաբար են փոխանցվում, այլ դրանք լինում են բնածին: Երկրորդ տեղում 11-14 տարեկան երեխաներն են. նրանց մոտ քաղցկեղն առաջանում է սեռական հասունացման ժամանակ: Գ.Բադալյանը հայտնեց, որ քաղցկեղի այն տեսակները, որոնք հաճախ հանդիպում են մեծահասակների մոտ, երեխաների մոտ գրեթե չեն լինում: Տարբերություն կա նաև ուռուցքների և բուժման մեթոդիկայի միջև:

«Հայաստանում երեխաների մոտ հիվանդության 70 տոկոս դեպքերը բուժվում են, խոսքը լիակատար բուժման մասին է: Եթե հիվանդությունը 2 տարի անց չի կրկնվում, ապա կարելի է համարել, որ մենք հասել ենք վերջնական արդյունքի»,- ընդգծեց մանկական ուռուցքաբանը` հավելելով, որ օրինակ` զարգացած երկրներում հիվանդության 80 տոկոս դեպքերն են բուժվում: Նա նշեց, որ մանկական չարորակ ուռուցքներն ավելի զգայուն են, քան մեծահասակների դեպքում է, և հիվանդության` սկզբնական փուլերում հայտնաբերման դեպքում հնարավոր է քիմիաթերապիայի միջոցով բուժել այն:

Գ.Բադալյանը մի վիճակագրական տվյալ էլ ներկայացրեց, որի բացատրությունը դեռ ոչ մի մասնագետ չի տվել. ողջ աշխարհում քաղցկեղով հիվանդ երեխաների մեծամասնության մայրերը նրանց ծննդաբերել են 35-40 տարեկանում: «Իսկ թե ինչով է բացատրվում այս երևույթը, ոչինչ չենք կարող ասել»,- ընդգծեց ուռուցքաբանը: