Ձեր վստահելի աղբյուրը

 «Հանրության մեջ տարատեսակ խոսակցություններ կան, որովհետև շատ մարդիկ, ելնելով տարբեր պատճառներից, չեն ցանկանում ճշմարտություն ասել, փորձում են այդ մեծ ձեռքբերումը սևացնել, ոմանք կատաղությունից, որ մեզ հաջողվել է ունենալ այդպիսի լավ պայմանագիր, փորձում են ամեն ինչը գլխիվայր շուռ տալ»,-այսօր կայացած ԵԿՄ 10-րդ համագումարից հետ կայացած հարց ու պատասխանի ժամանակ անդրադառնալով ՌԴ-ի հետ կնքած գազային պայմանագրի վերաբերյալ հարցադրմանը` ասաց ՀՀ նախագահ Սերժ Սարգսյանը:

Նախագահը նշեց, որ գազի պայմանագրի էությունը առաջին հերթին գազի գինն է:

«Առաջին հերթին թող խոսեն գազի գնի մասին: Եթե գինը թանկ է, ուրեմն` մենք շատ վատ ենք բանակցել: Ոչ մեկ չի խոսում գնի մասին, քանի որ այդ գինը ամենացածրն է, որ ՌԴ-ը տալիս է որևէ պետության: Մենք ունենք ամենացածր գնով գազ ՀՀ-ի սահմանին»,-նշեց երկրի առաջնորդը:

Ս. Սարգսյանի խոսքերով, այդ պայմանագրով գազի գինը հինգ տարով կապվում է ռուսական ներքին գնային համակարգին և ռուսական կառավարությունը հայտարարել է, որ գազի գինը ՌԴ-ում չի թանկանալու, իսկ դա նշանակում է, որ ՀՀ-ը 5 տարի ունենալու է կայուն գին:

«Մեզ համար դա լավ է, մեզ չկամեցողների համար` վատ: Խոսվում է նաև պարտքերի մասին և կան մարդիկ, ովքեր վատ հիշողություն ունեն և ասում են, որ ի խախտումն մեր օրենքներին ինչ-որ պարտքեր են կուտակվել, որ այդ պարտքերը պետք է բյուջեում արտոցոլվեին, և այլն, և այլն: Թե իբր մենք գաղտնի բանակցություններ ենք վարել: Մեր քաղաքացիները պետք է հիշեն, որ ես բազմաթիվ հայտարարություններ եմ արել այն մասին, որ ՀՀ-ի սպառողների համար գազի գինը չի թանկալու: Դա նշանակում է, որ հիմնարկի համար, պետության համար գազը կթանկանա, բայց ՀՀ-ի սպառողների համար գազը չի թանկանա և այդպես էլ եղավ 2 տարի»,-նշեց ՀՀ նախագահը:

Երկրի ղեկավարը նշեց, որ բոլորին հայտնի է, որ սկսած 2011թ.-ից բանակցություններ են վարվել ռուսական կողմի հետ և հանգել այն եզրակացությանը, որ գազի վճարային գինը չի փոխվում`փոխվում է հաշվարկային գինը, բայց երբ ավարտվեն բանակցությունները, մենք վերջնական եզրակացության կգանք գնի մասով:

«Բանակցությունները տևեցին երեք տարի: Ռուսական կողմը մեզ առաջարկեց վճարել այդ հաշվարկային գնի 50%-ը: Այսինքն` եթե մենք այդպիսի երկար բանակցություններ չվարեինք, ուրեմն մենք պետք է 2011թ.-ից թանկացնեինք գազի գինը և այդ 300 միլիոն դոլարը պետք է դուրս գար մեր ժողովրդի, տնտեսվարողի և պետության գրպանից: Ինչ վերաբերվում է 20%-ի վաճառքին: Ինձ հետաքրքում է, ինչ էր տալիս մեզ այդ 20%-ը: Եթե մենք որպես պետություն տարիների ընթացքում վաճառել ենք 80%-ը, այսինքն` 80%-ը կարելի էր վաճառել, 20%-ը`չէր՞ կարելի»,-նշեց Ս. Սարգսյանը:

«Ինչ վերաբերվում է, այդ 20%-ի գնին, ապա ես հիմա կարող եմ հայտարարել, որ եթե ինչ-որ մեկը, որ այդ 20%-ի համար տա 100 միլիոն դոլար, ես պատրաստ եմ բանակցել ռուսական կողմի հետ, հետ վերցնել և այդ 20%-ը տալ այդ մարդուն: Մեզ հարցնում են, թե ինչու մրցույթ չեք անցկացրել: Ես իրավունք չունեմ հրապարակավ ասելու, բայց ցանկությունս այնքան մեծ է ասելու, որ ասելու եմ: Եթե մենք այդ մրցույթը անցկացնեինք և այս 20%-ը արժենար 30 միլիոն, մենք ոնց էինք սաղացնելու այդ 20%-ը այդ 150 միլիոնով»,-նշեց Ս. Սարգսյանը:

Նախագահը նշեց, որ այդ 20%-ը, որ տարիների ընթացքում մի լումա չի բերել, չէր կարող այդքան արժենալ:

«Եթե ԱԺ-ում և տարբեր հարթակներում խոսացողներից որևէ մեկը կարող էր ռուսական կողմի հետ բանակցել և ավելի էժան գներով գազ բերել, խնդրեմ, թող գնա բերի: Ես մեկ օրում կնքված պայմանագիրը չեղյալ կհայտարարեմ և ԱԺ-ի իմ ընկերներին, իմ կուսակիցներին կխնդրեմ այդ ամենը չեղյալ համարել: Ասելը այնքան հեշտ է: Հիշում էք պատերազմի տարիներին ինչքան խոսացողներ կային, ինչ հեքիաթներ ու առասպելներ էին պատմում, բայց հենց որ պետք էր մեկ գյուղ գրավել, մեկի գլուխն էր ցավում, մյուսի մեքենայի անիվն էր ծակվում»,-նշեց ՀՀ նախագահը:

«Ցանկացած տնտեսագետի համար պարզ է, որ ներդրումների հետբերումը ավելի երկար ժամանակահատվածում շատ ավելի մեղմ է ազդում տնտեսության վրա: Մենք այդ պայմանագիրը կնքել ենք, որպեսզի ռուսները 30 տարում իրենց ներդրումները հետ բերեին: 5 տարով կնքեինք`5 տարում պետք է հետ բերեին: Ես չեմ բարկանում, ուղղակի ցանկանում եմ իմ էմոցիաները փոխանցել ձեզ, դուք էլ ձեր շրջապատին»,-հավելեց Ս. Սարգսյանը:

Նախորդիվ`

Նախագահ Ս. Սարգսյան. Լավագույն ուսուցիչների աշխատավարձը կտրուկ բարձրանալու է

ՀՀ նախագահ. Ինչո՞ւ դիպուկահարները դուրս չեն բերվում սահմանային գծից

ՀՀ նախագահ. Բարեփոխումները կոչված են մարդուն սեփական երկրին ամուր կապելուն

Սերժ Սարգսյան. «Ես ակնկալում եմ 2014թ.-ի համար ավելի մեծ տնտեսական աճ»