Ձեր վստահելի աղբյուրը

«Корреспондент» պարբերականը՝ «Ուկրաինայի հայերը. ովքեր են նրանք» վերնագրով հոդված է տպագրել՝ անդրադառնալով Ուկրաինայում ապրող հայերին:

Պարբերականը նախ նշում է, որ սկսում է նոր շարք Ուկրաինայի ազգային փոքրամասնությունների մասին։ Այս անգամ պատմում է հայերի՝ Ուկրաինայի ամենահամերաշխ ազգերից մեկի մասին։

«2001-ին Ուկրաինայում անցկացված վերջին մարդահամարի տվյալներով, երկրում ապրում է մոտ 100.000 հայ։ Առաջին անգամ հայերը հայտնվել են Կիևյան Ռուսիայում 11-րդ դարի սկզբին։ Պատմականորեն ամենախոշոր հայկական գաղութները ձևավորվել են Պոդոլում, Գալիչինայում և Ղրիմում։ ԽՍՀՄ փլուզումից հետո հայկական բնակչությունն Ուկրաինայում աճել է 2,5 անգամ։ Լեռնային Ղարաբաղի, չեչենական պատերազմի, վրաց-աբխազական հակամարտությունների պատճառով հայերը ստիպված էին ընտանիքներով տեղափոխվել Կովկասից:

Այժմ ամենաշատ քանակությամբ հայեր ապրում են Դոնեցկի մարզում՝ գրեթե 16 հազ. մարդ։ Նրանք շատ են նաև Խարկովշչինայում և Դնեպրոպետրովշչինայում։

Ռեստորանների ամենահայտնի սեփականատեր է լվովցի Վարդգես Արզումանյանը։ Նրա Restaron խմբում ներառված են «Տարոն», «Կենտավր» և «Mons Pius» հաստատությունները։ Նա վերականգնում է Լվովի հայերի ուտեստների ավանդական բաղադրատոմսերը հնագույն լեհական արխիվների օգնությամբ։ Նաև հավաքում է ռեստորանային ճաշացանկեր՝ նրա հավաքածուում կա նույնիսկ Տիտանիկի 3-րդ դասի ուղևորների ճաշացանկը։

Ուկրաինայի հայերը դրսևորում են իրենց տարբեր ոլորտներում։ Նրանցից ամենահարուստը՝ Օլեգ Մկրտչյանը, Դոնբասի «Արդյունաբերական միություն» մետաղագործական ընկերության գլխավոր տնօրենն է։ 2013 թ. նրա կարողությունը կազմել է $ 663 մլն և նա զբաղեցրել է ամենահրուստ ուկարինացիների վարկանիշային աղյուսակում ` 17-րդ տեղը:

Նվեր Մխիթարյանը գլխավորում է Կիևի «Познякижилстрой» շինարարարական ընկերությունը, Ալեքսանդր Դավթյանը՝ DAD ներդրումային խմբի համասեփականատերն է, զբաղվում է շինարարական և հյուրանոցային բիզնեսով Խարկովում։ Մեկ այլ խարկովցի՝ Արսեն Ավակովը, եղել է Բազիս բանկի համասեփականատերը։

Այսօր երկրում գործող համայնքներին միավորում է Ուկրաինայի հայերի միությունը, որը գլխավորում է պատգամավոր Վիլեն Շատվորյանը։ Սփյուռքի զարգացումը, լեզվի և մշակութային ավանդույթների պահպանումը՝ միության գլխավոր խնդիրներն են։ Առաջնահերթ է եկեղեցիների շինարարությունը։ Արդեն սկսվել է Դոնեցկի հայկական վանքի կառուցումը։

Կարևոր խնդիր է նաև Լվովի հայկական տաճարի վերանորոգումը. այն 650 տարեկան է և չի վերանորոգվել ավելի քան 1.5 դար։ Մի բան որ չի կարելի այս ազգից վերցնել, դա նրանց համախմբվածությունն է: Այսօր Գերագույն Ռադայում ներկայացված են ծագումով երեք հայ պատգամավորներ:

Ուկրաինայում հայերը տոնում են մի շարք տոներ` Վարդավառ Հին Ղրիմի գյուղի` Սուրբ Խաչ եկեղեցիում: Փետրվարի 13-ին` «Տեառնընդառաջի» տոնը: Հայերի ընդհանուր գործն է՝ պահպանել հարազատ մշակույթը»,-գրում է «Корреспондент»-ը: