Ձեր վստահելի աղբյուրը

 Քաղաքական ուժերը պետք է ասեն այն, ինչ իրենցից սպասում են: Անդրադառնալով խորհրդարանական ոչ կոալիցիոն չորս խմբակցությունների՝ ԲՀԿ-ի, ՀՅԴ-ի, «Ժառանգության» և ՀԱԿ-ի` կառավարությանը անվստահություն հայտնելու նախաձեռնությանը` panorama.am-ի հետ զրույցում նման տեսակետ հայտնեց քաղաքագետ Սերգեյ Մինասյանը:

«Այս քաղաքական ուժերը, թե՛ առանձին և թե՛ միասին վերցրած պետք է ցույց տան, որ իրենք զբաղվում են ընդդիմադիր դաշտին բնորոշ գործունեությամբ, այն է` քննադատել իշխանություններին և փորձել գալ իշխանության: Հետևաբար` այս գործընթացը լիովին տրամաբանական է: Այլ հարց է, թե արդյոք դա իրատեսակա՞ն է, թե՞ ոչ: Հասկանալի է, որ այստեղ խոսքը առաջին հերթին գնում է պարզ թվաբանության մասին: Հանրապետական կուսակցությունը խորհրդարանում ունի բացարձակ մեծամասնություն, հետևաբար այս գործընթացը անհնար է հասցնել տրամաբանական ավարտի, եթե, իհարկե, ՀՀԿ-ի ներսում տեղի չունենա ինչ-որ պառակտում:Այստեղ խոսքը գնում է միայն և միայն գործընթացի մասին, ինչը քաղաքկան առումով նույնպես տրամաբանական է: Քաղաքական ուժերը պետք է ասեն այն, ինչ իրենցից սպասում են»,- ասաց Սերգեյ Մինասյանը:

Անդրադառնալով վերոնշյալ քաղաքական ուժերի` հենց այս պահին նման քայլի գնալու շարժառիթներին`Ս. Մինասյանը նշեց. «Ելնելով այն հանգամանքից , որ խորհրդարանական և նախագահական ընտրություններից հետո ստեղծվել է մի իրավիճակ, երբ այսպես կոչված ավանդական ընդդիմադիր կուսակցությունները ճգնաժամի մեջ են և գործնականում ի վիճակի չեն ղեկավարել հասարակական գործընթացները` նրանք պետք է գնային ինչ-որ քայլի` օգտագործելով սոցիալ-տնտեսական խնդիրները և Մաքսային միությանը անդամակցելու որոշումից հետո ստեղծված նոր իրավիճակը»:

Հիշեցնենք, որ ԱԺ ոչ կոալիցիոն չորս խմբակցությունների՝ ԲՀԿ-ի, ՀՅԴ-ի, «Ժառանգության» և ՀԱԿ-ի ներկայացուցիչները օրերս քննարկել են Կառավարությանն անվստահություն հայտնելու հարցը: Հանդիպմանը մասնակցել են ԱԺ ԲՀԿ խմբակցության քարտուղար Նաիրա Զոհաբյանն ու խմբակցության անդամ Վարդան Օսկանյանը, ԱԺ ՀԱԿ խմբակցության ղեկավար Լևոն Զուրաբյանը և խմբակցության քարտուղար Արամ Մանուկյանը, ՀՅԴ խմբակցության ղեկավար Արմեն Ռուստամյանը և խմբակցության քարտուղար Աղվան Վարդանյանը և ԱԺ «Ժառանգություն» խմբակցության ղեկավար Ռուբեն Հակոբյանը։ Մեկուկես ժամ տևած քննարկման արդյունքում վերջնական որոշում այդպես էլ չի ընդունվել , իսկ Ռուբեն Հակոբյանը իր հերթին հայտարարել է, որ յուրաքանչյուր խմբակցություն այդ հարցը պետք է քննարկի իր կուսակցության քաղխորհրդում:

Նախորդիվ`
«Կառավարությանն անվստահություն հայտնելու գործընթացը դժվար թե հասնի տրամաբանական ավարտի»