Ձեր վստահելի աղբյուրը

Կառուցվածքային փոփոխություններ են կրել բոլոր առարկաների շտեմարանները: Panorama.am-ի թղթակցին հայտնեց ԳԹԿ արտաքին համագործակցության բաժնի պետ Արա Իսպիրյանը` մեկնաբանելով դժգոհությունները, որ առաջացել են շտեմարանների շուրջ և պնդումները, թե դրանք հիմնովին փոխված են:

ԳԹԿ ներկայացուցիչը նշեց, որ այդ ուղեցույցները ԳԹԿ կայքում հրապարակված են եղել օգոստոս-սեպտեմբեր ամիսներին: Բոլոր դպրոցներին բաժանված են եղել ուղեցույցները, որոնք էլ ֆիքսում են շտեմարանների և թեստերի կառուցվածքը:

«Շտեմարանները կազմվում են ուղեցույցների հիման վրա: Ամեն տարի բարեփոխումներ պետք է լինեն և թեստերում տեղ գտնեն ոչ միայն պատասխանով առաջադրանքներ, այլև կարճ պատասխանով առաջադրանքներ, ասույթների փունջ և այլն: Այդտեղ որևէ բարդացման կամ ծրագրային անհամապատասխանության խնդիր չկա: Այդտեղ կա հարցադրման ձևի փոփոխություն, որ տեղի ունեցավ անցած տարի Հայոց լեզու և պատմություն առարկաների շրջանակներում, այս տարի էլ դա շարունակվեց մյուս առարկաներում: Երբ նախկինում հարցնում էր, թե նշվածներից որն է ճիշտ և աշակերտը պիտի ընտրեր պատասխաններից մեկը, այստեղ արդեն հարցնում է՝ քանի՞ ճիշտ պատասխան կա»,- պարզաբանեց նա:

Կրթության ազգային ինստիտուտի փոխտնօրեն Անահիտ Բախշյանը հրապարակել էր 12-րդ դասարանի մի աշակերտի նամակ, որով վերջինս դժգոհում էր ամեն տարի փոփոխվող շտեմարաններից: Մասնավորապես, աշակերտը նշել է, որ «կենսաբանություն ու քիմիա առարկաների շտեմարանները հիմանականում բարդացված են, ընդգրկում են թեմաներ, որոնք չեն համապատախանում դպրոցական 12-ամյա ծրագրին, ինչպես նաև քանակապես ավելացված է նյութը ու թեստային առաջադրանքները հիմնովին փոխված են»:

Արա Իսպիրյանի բնորոշմամբ, թեստային առաջադրանքները ոչ թե հիմնովին փոխված են, այլ կառուցվածքում տեղի են ունեցել փոփոխություններ:

Աշակերտի նամակը հրապարակած Անահիտ Բախշյանը հավելել էր «Կրթության մասին» ՀՀ օրենքի 15-րդ հոդվածի 6-րդ կետի պահանջը, որն ասում է, որ ավարտական, ինչպես նաև պետական և հավատարմագրված ոչ պետական բարձրագույն ուսումնական հաստատությունների ընդունելության քննությունների անցկացման համար նախատեսվող հարցաթերթիկները կազմվում են բացառապես կրթական ծրագրերով նախատեսված, կրթության պետական լիազորված մարմնի կողմից պետական հանրակրթական դպրոցներում օգտագործման համար երաշխավորված և առնվազն ուսումնական մեկ տարվա ընթացքում դպրոցներում օգտագործված դասագրքերին, ձեռնարկներին, խնդրագրքերին ու ժողովածուներին համապատասխան:

ԳԹԿ արտաքին համագործակցության բաժնի պետ Արա Իսպիրյանը հակադարձեց` բովանդակությունը դասագրքերն են, ծրագիրն է, չափորոշիչն է, որը երաշխավորված է նախարարության կողմից, գործում է դպրոցներում, որով երեխաները պիտի սովորեն 12 տարի:

«Երբ շտերմարանները չկային, թեստերը կազմվում էին առանց շտեմարանների: Դրանք չէին հրապարակվում, չէ՞: Երեխաները պետք է սովորեն, իսկ շտեմարանները հարցաթերթիկների խումբ են, որոնց նպատակը թեստերը թափանցիկ դարձնելն է: Երեխաները, ճիշտ է, հիմա շտեմարանները նայում են, տեսնում են, բայց նրանք պետք է մինչև այդ սովորած լինեն: Իսկ թեստային առաջադրանքների շտեմարաններն էլ պետք է լինեն բաց, որպեսզի որևէ առաջադրանք վրիպակներ, սխալներ չունենա»,- ասաց նա:

Արա Իսպիրյանի խոսքով, շտեմարանները դասագրքեր չեն, որ անպայման պետք է փորձարկվեն մեկ տարի. «Շտեմարանները ծրագրի ու դասագրքերի բովանդակության հիման վրա ստեղծված թեստային հարցաշարեր են, իսկ օրենքի այդ հոդվածով հարցաշարերի վերաբերյալ ոչինչ չի ասվում: Չկա այդպիսի բան, որ ստուգող հարցաշարը պետք է անպայման մեկ տարի օգտագործվի: Բովանդակությունը բոլորին պարզ է, երեխան պետք է հաստատված նյութերը սովորի, որոնցից էլ կազմվում է հարցաշարը»:

Իրականում, ճիշտը ակադեմիական գրքերով կրթություն ստանալն է, բայց սովորույթի ուժով երեխաները և կրկնուսույցները պարապում են ոչ թե գրքերով, այլ շտեմարաններով: Արդյունքում էլ այդ շտեմարաններում փոփոխությունները խուճապ են առաջացնում: Թերևս հարցը հեշտ տարբերակի ձգտումն է:

Ըստ Արա Իսպիրյանի, միանաշանակ պետք է և սովորում են դասագրքերով. «Շտեմարաններով իրենց կարողանում են վերջում ստուգել, որպեսզի անակնկալ հարցեր թեստերում չլինեն: Շտեմարանը բացառում է ծրագրից դուրս հարցերի ներառումը թեստերում, դրան էլ միտված է այն: Ես գիտեմ, որ կան շատ երեխաներ, որ խորը ուսումնասիրում են, ակադեմիական գիտելիք են ստանում: Բայց, ցավոք սրտի, ունենք զանգված, որ ավելի հեշտ ճանապարհն է ընտրում. մտածում են, շտեմարանի առաջադրանքները անմիջապես թերթել, վարժվել»:

Խնդիրը լուծելու տարբերակ ԳԹԿ ներկայացուցիչը դժվարացավ նշել: Արա Իսպիրյանը նոր քաղաքականության մասին չխոսեց: Այժմ կառույցն իրականացնում է արդեն ընդունված քաղաքականությունը, որը, ըստ նրա, մի քանի խնդիրներ է լուծել:

«Այն, որ բովանդակային խնդիրներ չենք ունենում, թեստերը թափանցիկ են, անակնկալ հարցեր չեն պարունակում, այդպես է: Մնացած դեպքերում պետք է վերլուծություններ կատարել»,- եզրակացրեց նա:

Նշենք, որ այս հարցի վերաբերյալ տեղեկացվել է նաև Կրթության և գիտության նախարարը: ԿԳՆ լրատվության բաժնից Panorama.am-ին տեղեկացրեցին, որ երբ նախարարի պատասխանը լինի, կհրապարակեն:

Նախորդիվ`
12-րդ դասարանցին դժգոհում է ամեն տարի փոփոխվող շտեմարաններից