Ձեր վստահելի աղբյուրը

Մարտի 3-ին ԱՄՆ կոնգրեսական Ադամ Շիֆը, ով Հայոց ցեղասպանությունը ճանաչող 227-րդ բանաձևի սատարողներից է, Կապիտոլ Հիլում ամերիկացիների կողմից Հայոց ցեղասպանության զոհերին ցուցաբերված օգնության վերաբերյալ միջոցառում կանցկացնի: Այս մասին տեղեկանում ենք Ամերիկայի Հայ Դատի գրասենյակի «Facebook»-յան էջից:

«Հայոց ցեղասպանության ճշմարտացի և արդար լուծմանը Թուրքիայի խոչընդոտները դադարեցնելու և ԱՄՆ կառավարությանը վերադարձնելու ուղղված ջանքերը միտված են «ծաղկել» ամեն պայծառ օր՝ հանրային վերահսկողության ներքո դառնալով ավելի ուժեղ: Եվ այս և այլ մի շարք պատճառներով է, որ մենք շատ շնորհակալ ենք Շիֆին Կապիտոլ Հիլում նման միջոցառում կազմակերպելու համար և մեր Կոնգրեսին և համայնքին արժանի պատասխաններ փնտրելու, թե ինչու է Սպիտակ Տունը որոշել ցեղասպանության ժամանակաշրջանի այս եզակի արվեստի գործը (խմբ. խոսքը վերաբերում է հայ որբերի կողմից գործված գորգին) հեռու պահել հասարակության տեսադաշտից»,-նշել է Ամերիկայի Հայ դատի գրասենյակի տնօրեն Արամ Համբարյանը:

Հիշեցնենք, որ Գորգը գործվել է հայ որբերի կողմից 1920-ականներին և պաշտոնապես ներկայացվել Սպիտակ տանը 1925-ին: Այն փոխանցվել է Միացյալ Նահանգների նախագահ Քելվին Քուլիջին` որպես երախտիքի նշան Միացյալ Նահանգների ցուցաբերած օգնության համար: Հույս կար, որ գորգը, որը գրեթե 20 տարի գտնվել է պահեստում, կարող է ցուցադրվել դեկտեմբերի 16-ին Սմիթսոնյան ինստիուտի կողմից անցկացվող միջոցառմանը, որի մեջ ներառվում է նաև դոկտոր Հակոբ Մարտին Դերանյանի` «Նախագահ Քելվին Քուլիջը և հայ որբերի գորգը» աշխատության շնորհանդեսը: Սակայն սեպտեմբերի 12-ին Սմիթսոնյան ինստիտուտի գիտնականներից մեկը, ով օգնել է միջոցառումը կազմակերպել, չեղյալ է հայտարարել այն` հղում անելով Սպիտակ Տան այն որոշմանը, թե նա չի ցանականում տրամադրել գորգը:

Նկատենք, որ Թուրքիայի կառավարությունը չի ցանկանում Օսմանյան կայսրութան՝ հայերի հանդեպ իրականցված գործողությունները ցեղասպանություն որակել: Իսկ ԱՄՆ-ն էլ իր հերթին չի ցանկանում նեղացնել Թուրքիայի կառավարությանը՝ ներկա պահին այդ թեման շոշափելով: Թուրքիան ավանդաբար հերքում է 20-րդ դարի սկզբին շուրջ 1.5 մլն հայերի զանգվածային ոչնչացման մեղադրանքները: Հայոց ցեղասպանությունն (Armenian Genocide) արդեն ճանաչել և դատապարտել են Ուրուգվայը (1965թ.), Կիպրոսի Հանրապետությունը (1982թ.), Արգենտինան (1993թ.), Ռուսաստանի Դաշնությունը (1995թ.), Կանադան (1996թ.), Հունաստանը (1996թ.), Լիբանանը (1997թ.), Բելգիան (1998թ.), Իտալիան (2000թ.), Վատիկան (2000թ.), Ֆրանսիան (2001թ.), Շվեյցարիան (2003թ.), Սլովակիան (2004թ.), Հոլանդիան (2004թ.), Լեհաստան (2005թ.), Գերմանիան (2005թ.), Վենեսուելան (2005թ.), Լիտվիան (2005թ.), Չիլին (2007թ.), Շվեդիան (2010թ.): Հայոց Ցեղասպանությունը ճանաչել են նաև Վատիկանը, Եվրախորհուրդը և Եկեղեցիների համաշխարհային խորհուրդը: