Ձեր վստահելի աղբյուրը

Կոմպոզիտորների միությունը շարունակում է աշխատել, իսկ Արամ Սաթյանն արդեն 100 օրից ավելի է, ինչ ղեկավարում է կառույցը:

«Այս ընթացքում ահագին բան արեցինք: Փորձում ենք ստեղծել տեխնիկական բազա, որ աշխատացնենք Կոմպոզիտորների միության Դիլիջանի հանգստյան տունը: Միության ստուդիան ենք վերականգնում, որ նորմալ աշխատի, ինձ թվում է` Հայաստանի լավագույն ստուդիաներից մեկը կլինի»,- Panorama.am-ի թղթակցի հետ զրույցում ասաց նա:

Կոմպոզիտորների միության ղեկավարի խոսքով, վերականգնվում է նաև միության դահլիճը և գարնանն արդեն կընդունեն առաջին այցելուներին. «Մարդիկ նորից կտեսնեն Սարյանի պաննոն` ձեռագիրը` պատից կախված: Գործ արվում է, ես կարծում եմ, որ հետագայում ավելի լավ կլինի»:

Խոսելով առաջիկա ծրագրերի մասին, Արամ Սաթյանը տեղեկացրեց, որ ապրիլի վերջին Ռուսաստանի երիտասարդ կոմպոզիտորներն են գալու Հայաստան` երկու համերգով, մեր կոմպոզիտորներն էլ փոխայցելությունով երկու համերգ կունենան Ռուսաստանում:

«Արվում է փառատոն, որտեղ արդեն մայիսին կհնչեն հայ երիտասարդ կոմպոզիտորների կամերային ստեղծագործություները: Եվ կլինի մի սիմֆոնիկ համերգ ապրիլի 24-ին, որտեղ կհնչեն կոնսերվատորիան նոր ավարտողների դիպլոմային աշխատանքները: Դա մեծ բան է, երբ կոմպոզիտորը լսում է իր ստեղծագործությունը բեմից` նվագախմբի կատարմամբ»,- ասաց Արամ Սաթյանը:

Հիշեցնենք, որ Արամ Սաթյանը «Հայաստանի կոմպոզիտորների և երաժշտագետների միավորում» ՀԿ նախագահ էր ընտրվել անցյալ տարվա հոկտեմբերի 28-ի կառույցի համագումարում:

Նախորդիվ`

Կոմպոզիտորների միությունը նոր նախագահ ունի