Ձեր վստահելի աղբյուրը

«Կառավարությանն անվստահություն հայտնելու փաստաթղթի վրա աշխատանքները շարունակվում են և այս պահին լուծում, վճռահատում չկա»,-Ազգային Ժողովում լրագրողների հետ հանդիպմանը հայտարարեց ՀՅԴ խմբակցության ղեկավար Արմեն Ռուստամյանը` ԱԺ ոչ իշխանական խմբակցությունների հերթական քննարկումից հետո:

Նա ընդգծեց` այս քառօրյայում ընդդիմությունը կառավարությանը անվստահություն չի հայտնի, քանի որ այդ պահը «դեռ չի հասունացել»:

Հարցին, թե ինչու չեն կարողանում համաձայնության գալ, ՀՅԴ խմբակցության ղեկավարը նշեց, որ դեռ աշխատում են բովանդակային մասով, մարտավարական իմաստով, դրա համար այդ խոհանոցը չի կարող բացել, բայց քննարկումները որոշել են այդ առումով շարունակել: Ինչ վերաբերում է հարցին, թե կարելի է այդ գործընթացն ակնկալել հաջորդ քառօրյայում, պատգամավորը տվեց խուսափողական պատասխան. «Չի բացառվում, բայց չեմ էլ կարող հստակ ասել, որ անպայման մյուս քառօրյայում կլինի»:

Նրա խոսքով,  երկրորդ հարցը, որ քննարկվել է այսօր, վերաբերել է ԱԺ մեծամասնության կողմից առաջարկված գազի հարցերով ժամանակավոր հանձնաժողով ստեղծելուն. քննարկել, փոխանակել են իրենց տեսակետները, ինչպես նաև ամեն խմբակցություն այս հանձնաժողովի ստեղծման հետ կապված նախագծում որոշակի փոփոխություն-առաջարկներ է ներկայացրել, որոնք էլ այսօր օրվա վերջին ԱԺ նախագահի մոտ կայանալիք հանդիպման ժամանակ կքննարկվեն:

«Մենք մեր մասով էլ ունենք, մյուս բոլոր խմբակցություններն էլ ունեն: Գիտեք` մենք ունեցել ենք մեր նախագիծը, ԱԺ նախագահի կողմից ներկայացվել է մի քիչ այլ ուղղությամբ և բովանդակությամբ նախագիծ և փորձում ենք համադրել մեր երկու կողմերի մոտեցումները: Այսօր, կարծում եմ, ԱԺ նախագահի մոտ կլինի արդեն վերջնական քննարկումը»,- նշեց Ա.Ռուստամյանն ու ավելացրեց, որ այս պահին դեռ հանձնաժողովի անդամների մասին հարցերը չեն որոշվել:

Բացի այս, քննարկել են նաև ՀԱԿ-ի առաջարկը` ԱԺ օրակարգ ներառել մարտի 1-ի հարցերով հանձնաժողովի ստեղծման նախագիծը, որին ՀՅԴ-ն հայտնել է իր աջակցությունը, որպեսզի համապատասխան քանակությամբ ստորագրությունները հավաքվեն: Հիշեցնենք, նախօրեին Panorama.am-ի հետ զրույցում ԲՀԿ խմբակցության քարտուղար Նաիրա Զոհրաբյանն էլ տեղեկացրեց, որ ԲՀԿ-ն կմիանա այդ առաջարկին որպես համահեղինակ:

Իսկ ահա ՀՅԴ-ն հանդես է եկել մեկ այլ` «Նաիրիտ»-ի խնդրով զբաղվող ժամանակավոր հանձնաժողովի ստեղծման առաջարկով, որի վերաբերյալ, հիշեցնենք, գլխադասային հանձնաժողովը նախօրեին տվել էր բացասական եզրակացություն:

«Մեր գործընկերներին տեղեկացրեցինք, որ այդ հարցով մենք նախաձեռնել ենք ` մեր իրավասությունները, հարցը ճանաչել անհետաձգելի և հարցը պետք է քննարկվի երեքշաբթի օրը ԱԺ քառօրյա նիստերի ընթացքում: Այս հարցում էլ մեր գործընկերների կողմից նորից ստացանք լայն աջակցության հնարավորություն»,- տեղեկացրեց Ա.Ռուստամյանը: