Ձեր վստահելի աղբյուրը

«Այսօր ընդդիմադիր դաշտի մի մասին կարելի է բնութագրել որպես սնանկ, թեմաներ չունեցող, իսկ մյուս մասին էլ՝ սկզբունքներ չունեցող: Թեմաներ չունենալուց դրդված էլ փորձում են երկրի և ժողովրդի հնարավոր բոլոր դժգոհությունները՝ սկսած սոցիալական խնդիրներից, բնակչության դժվարություններից, ի մի բերել ու մի մեծ վինեգրետ սարքել, ինչը միայն մեկ նպատակ է հետապնդում՝ ամրացնել հարթակում իրենց տեղը»,- Panorama.am-ի հետ զրույցում ասաց ԱԺ փոխխոսնակ Հերմինե Նաղդալյանը` մեկնաբանելով ԱԺ ոչ իշխանական ուժերի հերթական քննարկումը և այն, որ կառավարությանը վստահություն հայտնելու հարցում այս ուժերը, կարծես, համաձայնության չեն կարողանում հասնել:

Հ. Նաղդալյանի համոզմամբ` ընդդիմությունը տեսնում է, որ ամբողջովին դուրս է մնում քաղաքական գործընթացներից և անգամ ընտրողի ձայնով իրենց պարգևած խորհրդարանական ամբիոնը չեն կարողանում օգտագործել սեփական պոտենցիալն ու հեղինակությունը գոնե փոքր-ինչ ամրապնդելու համար:

«Երկրորդ բնութագրող հանգամանքը, ինչպես արդեն նշեցի, սկզբունքներ չունենալն է, որովհետև այժմյան ընդդիմադիրներն ու այլընտրանքայինները, երեկ և առաջին օրը խոսում էին նույն թեմաների մասին, որոնց շուրջ այսօր մեծ հավանականությամբ կարող են ասել տրամագծորեն հակառակը: Արդյունքում այսօր քաղաքացու և ընտրողի համար բացարձակապես անհասկանալի է մնում, թե ինչ տեղի ունեցավ, ինչը փոխվեց այս ընթացքում, որ նման արմատական փոփոխություններ կատարվեցին այս ուժերի դիրքորոշումների մեջ»,-կարծիք հայտնեց նա:

ՀՀԿ-ական փոխխոսնակը անդրադարձավ նաև մարտի 1-ի հարցերով ժամանակավոր նոր հանձնաժողով ստեղծելու գաղափարին, որը կքննարկվի արդեն առաջիկա քառօրյայում: Ըստ Հ.Նաղդալյանի` դա կարծես սեզոնային սրացման հիվանդության բնույթ կրի որոշների մոտ, կամ էլ մի երազանք է նորից իրացնելու մարտի 1-ին իրենց չիրացրած հնարավորությունները:

«Մարտի 1-ի հանձնաժողովը գործել է, տվել իր եզրակացությունը, և ներկայիս բարձրագոչներից էլ անդամ են եղել հանձնաժողովում ու, թերևս, որևէ ազդեցիկ, նշանակալի հայտարարությամբ կամ ներդրած լումայով չեն նպաստել հանձնաժողովի գործունեությանը: Բայց, ցավոք, քաղաքականությունը «կրկին փորձիր»-ով չի զարգանում և դրանից առաջանում է միայն ևս մեկ անգամ մարդկանց վշտի ու ցավի շահարկումով սեփական դիվիդենտներ հավաքելու ցինիկ մտադրությունը և հասարակությանը մոլորեցնելու ևս մեկ փորձ»,- ընդգծեց նա:

Ավելացրեց, թե այս ֆոնի վրա իսկապես զարմանք է հարուցում ընդդիմադիրների օրակարգի զարգացումը՝ մեկ կառավարության հրաժարական են ուզում ու չեն կարողանում պայմանավորվել, մեկ գազային հարցերով հանձնաժողով են ուզում ու չեն կարողանում լուրջ բովանդակային խնդիրներ դնել, կենսաթոշակային բարեփոխումներն են առաջ քաշում ու դարձյալ չեն կարողանում հայտարարի գալ:

«Իսկ գուցե փորձեք բոլորն իրար խառնել ու դրան էլ մարտի 1 ավելացնել ու տեսնել, թե դրանից ինչ դուրս կգա: Բայց ոչինչ էլ դուրս չի գա, որովհետև, հարգելի կոլեգաներ, ձեզանում չկա գաղափարական ընդհանրություն, չկա պայքարի սկզբունքայնություն, կա միայն մեկ միտում՝ այս իշխանությանը մենք դեմ ենք, իշխանությունը մենք ենք ուզում լինել: Բայց նման բնավորությամբ իշխանություն կլինի՞»,- հավելեց նա:

Հիշեցնենք, ԱԺ ոչ իշխանական չորս ուժերը այսօր ևս հավաքվել են քննարկման մի շարք հարցերի շուրջ և հետագա համատեղ մարտավարությունը հստակեցնելու նպատակով: Այս պահին քննարկումը դեռ շարունակվում է: