Ձեր վստահելի աղբյուրը

Այսօր Ազգային ժողովի պետա-իրավական հարցերի մշտական հանձնաժողովում ՀՀ քննչական կոմիտեի մասին օրենքի նախագիծն ու դրան հարակից մի քանի օրենքներում փոփոխություններ կատարելու մասին նախագծերի փաթեթը հանձնաժողովի դրական եզրակացությամբ ընդգրկվեց ԱԺ մեծ և քառօրյա նիստերի օրակարգ: Հանձնաժողովի այս նիստում ներկա էին բոլոր անդամները և նրանք բոլորն էլ կողմ քվեարկեցին օրենսդրական փաթեթին:

«Դատաիրավական բարեփոխումների շրջանակում միասնական քննչական կոմիտեի ստեղծման անհրաժեշտությունը պայմանավորված է մի քանի հանգամանքներով` միասնական դարձնել ընդհանրապես քննչական պրակտիկան, միասնականացնել նրանց նյութական, տնտեսական բոլոր հնարավորությունները: Այսօր գործող հինգ քննչական կոմիտեների թե կարգավիճակը, թե նյութական ու սոցիալական երաշխիքները էականորեն տարբերվում էին միմյանցից: Այս խնդիրները լուծելու ու նրանց մասնագիտական ունակությունները բարձրացնելու նպատակեվ անհրաժեշտություն առաջացավ մեկ քննչական կոմիտե ստեղծել», -նախագծի անհրաժեշտությունը հիմնավորեց արդարադատության նախարար Հրայր Թովմասյանը:

Նույն հանձնաժողովում նախորդ անգամ քննարկումից հետո ներկայացված առաջարկությունների հիման վրա փոփոխություններ են կատարվել նախագծում, որոնց մի մասը արդեն ներառվել են, իսկ մյուս մասը կներկայացվեն ԱԺ-ում առաջինից երկրորդ ընթերցմամբ քննարկման ընթացքում:

Քննչական մարմնի ղեկավարի լիազորությունների ժամկետներին վերաբերող հարցը և փոփոխված տարբերակով առաջարկվում է, որ ղեկավարի պաշտոնը ոչ թե կլինի հայեցողական, այլ նշանակվի 5 տարի ժամկետով և միայն օրենսգրքով առաջարկվող հիմքերի առկայության պարագայում նա կարող է աշխատանքից ազատվել: Քննչական նոր ստեղծվելիք կոմիտեի ղեկավարը կնշանակվի նախագահի կողմից վարչապետի ներկայացմամբ:

Պետա-իրավական հարցերի հանձնաժողովի անդամ Կարեն Ճշմարիտյանի մոտ հարց առաջացավ, թե ի՞նչ տրամաբանությամբ է կոմիտեի ղեկավարը նշանակվում վարչապետի ներկայացմամբ:

«Ֆունկցիոնալ առումով ինքը անկախ մարմին է, բայց մնացած բոլոր առումներով նրա գործառույթը գործադիր ֆունկցիա է, այնինքն` նա գործադիր իշխանության ֆունկցիա է կատարում», - ի պատասխան բացատրեց Հրայր Թովմասյանը:

ԱԺ Դաշնակցական պատգամավոր Արծվիկ Մինասյանը հետաքրքրվեց, թե արդյոք հաշվարկ կատարվե՞լ է, կա՞ գնահատական, թե ինչ ծանրաբեռնվածություն է լինելու բյուջեի վրա: Հրայր Թովմասյանն ի պատասխան ասաց, որ բացի «շենքային ձեռքբերումից», մեծ ծախսեր նախատեսված չեն:

«Այսօր նրանք տեղակայված են ոստիկանության բաժանմունքներում, ինչը ցանկալի չէ` ինքնուրույնության առումով: Այդ աշխատավարձերը նախատեսված են այն համակարգերում, որտեղից իրենք տեղափոխվում են և ուրիշ ծախսեր չեն լինելու: Այդ ծախսերը նրանց հետ միասին կտեղափոխվեն այդ կառույց», -ներկայացրեց Թովմասյանը:

Հիշեցնենք` Սերժ Սարգսյանը կարգադրություն էր ստորագրել միասնական քննչական մարմնի կազմավորման իրավական ապահովման հանձնաժողով ստեղծելու մասին: Նախկին գլխավոր դատախազ Աղվան Հովսեփյանը նշանակվել էր Միասնական քննչական մարմնի կազմավորման իրավական ապահովման հանձնաժողովի նախագահ:


Նախորդիվ`

Ինչո՞ւ են 5-ի փոխարեն 2 քննչական մարմիններ միավորվում քննչական կոմիտեում. Քննարկում ԱԺ-ում

Քննչական կոմիտեի ղեկավարին կներկայացնի վարչապետը

 Նոր ստեղծվելիք Քննչական կոմիտեի կազմում օմբուդսմեն կաշխատի

Ովքեր են աշխատելու նորաստեղծ Քննչական կոմիտեում և ինչպես են վարձատրվելու

Հանրությանն է ներկայացվել «Միասնական քննչական կոմիտեի» մասին օրենքի նախագիծը

Միասնական քննչական մարմին` առանց ՊԵԿ քննչական ծառայության (տեսանյութ

Վաղ, թե ուշ բոլոր քննչական ծառայությունները կլինեն մեկ մարմնի կազմում. Գևորգ Դանիելյան (տեսանյութ)

  Հիմնական պատճառը գերատեսչական անկախությունն էր, որ միասնական քննչական մարմին է ստեղծվում. Ղազինյան (տեսանյութ)

  Նոր ստեղծվելիք քննչական կոմիտեի ծառայողը պետք է ունենա արտաքին և ներքին անկախություն. Արթուր Ղամբարյան (տեսանյութ)