Ձեր վստահելի աղբյուրը

Մի քանի տարի անց հասարակության մեծամասնությունը դրականորեն կընդունի կենսաթոշակային պարտադիր կուտակային համակարգը, ինչպես դա տեղի ունեցավ ԱՊՊԱ-ի ներդրման դեպքում: Ասուլիսում նման դիտարկում արեց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:

«Բոլոր պետություններում այս համակարգի ներդրումը բարդ է գնում: Չկա մի իշխանություն, որը նախաձեռնել է այս համակարգի ներդրումը և հասարակության կողմից դիվիդենտներ է ստացել: Բնական է, առաջին հայացքից բավականին դժվար ընկալելի ռեֆորմ է, այնպես, ինչպես դժվար էր ԱՊՊԱ-ի ներդրումը»,- ասաց ԱԺ պատգամավորը՝ հավելելով, որ այսօր հասարակության մեծամասնությունը գոհ է այդ համակարգից:

Գ. Մինասյանի խոսքով, անծանոթ երևույթին հնարավոր է տալ սպառիչ և վերջնական գնահատական այն ժամանակ, երբ համակարգն իր բոլոր առանձնահատկություններով ընկալվում է:

Նա նշեց, որ հասարակության և տնտեսության զարգացման հիմնական խնդիրներից մեկը երկար և ցածր տոկոսով փողերի պակասությունն է:

«Այս համակարգը գալիս է լրացնելու այդ բացը: Եթե մենք ունենանք այդպիսի փողեր, այն կբերի մեր տնտեսության զարգացման համար նոր հնարավորություններ, մեր կողմից արտադրվող ապրանքների գների նվազեցման, աշխատատեղերի, սոցիալական հարցերի լուծման»,-ասաց Գագիկ Մինասյանը:

Ինչ վերաբերում է այն խոսակցություններին, թե ի՞նչ կլինի կուտակված գումարները, եթե Հայաստանում արժույթը փոխվի, ԱԺ ՀՀԿ խմբակցության անդամ Գ. Մինասյանն նախ ասաց, որ նման քննարկումներ չկան, ապա շարունակեց. «Իսկ եթե ինչ-ինչ պատճառներով փոխի դառնա, օրինակ՝ եվրո, դոլար, ռուբլի, որևէ բան տեղի չի ունենա, ինչպես տեղի չունեցավ Էստոնական ֆոնդերի հետ, երբ կրոնը փոխվեց եվրոյով»: