Ձեր վստահելի աղբյուրը

ԱՄՆ-ի նախագահ Բարաք Օբաման այսօր Սպիտակ տանը հանդիպելու է Տիբեթի հոգևոր առաջնորդ Դալայ Լամայի հետ, իսկ հանդիպման մասին տեղեկությունը արդեն իսկ հարուցել է Չինաստանի դժգոհությունը:

Չինաստանի ԱԳՆ-ի պաշտոնական ներկայացուցիչ Խուա Չունինը հայտարարել է, որ ԱՄՆ-ի նախագահի և Դալայ Լամայի հանդիպումը կոպիտ միջամտություն է Չինաստանի ներքին գործերին, և ոչ մի երկիր իրավունք չունի միջամտելու իրենց երկրի ներքին գործերին:

Չինաստանը պաշտոնապես կոչ է արել Վաշինգտոնին չեղյալ հայտարարել այսօր կայանալիք հադիպումը: Չինաստանի ԱԳՆ-ը դիմելէ ԱՄՆ-ին՝ կոչ անելով Դալայ Լամային ԱՄՆ-ում հարթակ չտրամադրել, քանի որ վերջինս այն օգտագործելու է հակաչինական քաղաքականություն իրականացնելու համար: 

Օբամայի և Դալայ Լամայի վերջին հանդիպումը տեղի է ունեցել 2011թ.-ին, ինչին հետևեց պաշտոնական Պեկինի կոշտ արձագանքը: Չինացիները հայտարարեցին, որ այդ հանդիպումը բացասական է անդրադառնալու ամերիկա-չինական երկկողմ հարաբերությունների վրա:

Այդ հանդիպումից հետո Չինաստանի ԱԳՆ-ի պաշտոնական ներկայացուցիչ Մա Չժաուսույը հայտարարել էր, որ Բարաք Օբամայի և Հիլարի Քլինթոնի հանդիպումը Դալայ Լամայի հետ Չինաստանի ներքին գործերին կոպիտ միջամտություն է:
Նրա խոսքերով, Տիբեթը հանդիսանում է Չինաստանի անբաժանելի և սրբազան մասը և այն ամենը, ինչ վերաբերվում է Տիբեթին՝ Չինաստանի ներքին գործն է:

Պեկինը այս պահին ԱՄՆ-ում այցով գտնվող Դալայ Լամային համարում է ոչ թե Տիբեթի հոգևոր առաջնորդ, այլ անջատողական, ով ցանկանում է հասնել Չինաստանից Տիբեթի ինքնավար շրջանի անջատմանը և նրա անկախության հռչակմանը: 

Տիբեթը միացվել է Չինաստանին 1949-1950թթ.-ին: 1959թ.-ին չինական զորքերը ճնշել են տիբեթցիների ժողովրդական շարժումը, ինչից հետո Դալայ Լաման տեղափոխվել է Հնդկաստան: 1949թ.-ից սկսած Դալայ Լաման Չինաստանի Տիբեթում իրականացված քաղաքականության դեմ բողոքներ է ուղղում ՄԱԿ-ին: 

1959թ.-ից սկսած Հնդկաստանի տարածքում՝ Դհարամսալա քաղաքում է գտնվում Տիբեթի վտարանդի կառավարությունը, որը 2011թ.-ին կայացած ընտրությունների արդյունքներով գլխավորում է Հարվարդի համալսարանի աշխատակից, իրավաբան Լոբսանգ Սանգայը: Մինչ այդ, Տիբեթի վտարանդի կառավարությունը գլխավորում էր հենց Դալայ Լաման: Այս պահին, Դալայ Լամա 14-րդը պահպանել է միայն Տիբեթի հոգևոր առաջնորդի տիտղոսը: 77-ամյա Դալայ Լամա 14-րդը 1989թ.-ին արժանացել է Խաղաղության Նոբելյան մրցանակին: 

Արտյոմ Բալասանով