Ձեր վստահելի աղբյուրը

 «Լրագրողների պաշտպանության կոմիտե» (CPJ)միջազգային կազմակերպությունը խիստ մտահոգված է Ադրբեջանում հետաքննող լրագրող Խադիջա Իսմայիլովայի հանդեպ իրականացվող ոտնձգությունների պատճառով: Կոմիտեն կոչ է անում Ադրբեջանի իշխանություններին վերջ տալ Իսմայիլովայի հանդեպ իրականացվող ճնշումներին: Այս մասին ասվում է կազմակերպություն կայքում տեղադրված հոդվածում:

Ըստ կազմակերպության՝ ակնհայտ է, որ Իսմայիլովային հետապնդում են Ադրբեջանի կառավարության կոռուպցիոն արարքները հրապարակայնորեն բացահայտելու համար:

Իսմայիլովան «Լրագրողների պաշտպանության կոմիտեին» ասել է, որ իրեն արգելել են լքել Բաքուն առանց իշխանություններին տեղյակ պահելու, չնայած նա ոչ մի պաշտոնական փաստաթուղթ չի ստորագրել դրա հետ կապված, և նրա դեմ դեռևս պաշտոնապես մեղադրանք չի առաջադրվել:

«Եթե Իսմայիլովայի հանդեպ պետական գաղտնիք վաճառելու մեղադրանքները հաստատվեն, նրան սպառնում է մինչև 7 տարվա ազատազրկում»,- ասվում է հոդվածում:

Հեղինակը նշում է, որ Իսմայիլովան չորեքշաբթի օրը Facebook-ի իր էջում գրել է, որ եթե իրեն ձերբակալեն, դրա միակ պատճառը Ադրբեջանի կառավարության կոռուպցիոն գործողությունները բացահայտելը կլինի:

«Կառավարությանը դուր չի գալիս, թե ես ինչով եմ զբաղվում: Ես համարյա ավարտին եմ հասցրել արդեն երեք հետաքննություն: Ես անպայման կավարտեմ դրանք մինչ ձերբակալությունը, իսկ եթե ոչ, իմ գործընկերները կվերջացնեն և կհրապարակեն դրանք»,- ասել է լրագրողը:

CPJ Եվրոպայի և Կենտրոնական Ասիայի ծրագրերի համակարգող Նինա Օգնիանովան այս առիթով ասել է, որ Խադիջային լռեցնելու քարոզարշավին անմիջապես պետք է վերջ տալ:

«Ադրբեջանի պաշտոնյաները ևս մեկ անգամ օգտագործում են իշխանամետ ԶԼՄ-ները, որպեսզի խանգարեն քաջ, անկախ լրագրողին իր աշխատանքը կատարել: Մենք կոչ ենք անում Ադրբեջանի իշխանություններին վերջ տալ այս ճնշումներին», ասել է Օգնիանովան:

Հիշեցնենք, որ փետրվարի 18-ին լրագրող Խադիջա Իսմայիլովան հարցաքննության է կանչվել Ադրբեջանի գլխավոր դատախազություն այն բանից հետո, երբ իշխանամետ ԶԼՄ-ները գրել են, որ նա ընդդիմադիր գործիչների, ինչպես նաև այլ հայտնի մարդկանց մասին փաստաթղթեր է փոխանցել ԱՄՆ-ի ներկայացուցիչներին, ովքեր իբրև թե ԱՄՆ հետախուզության ծառայությունից էին: Իսմայիլովային մեղադրում են Ադրբեջան այցելած ԱՄՆ կոնգրեսականներին պետական գաղտնիքներ վաճառելու մեջ:

Նշենք նաև, որ Բաքվում ԱՄՆ դեսպանատունը, ինչպես նաև «Ազատություն ռադիոկայանի» տնօրեն Քեվին Քլոզեն այս մեղադրանքները անհեթեթ են անվանել, իսկ Եվրոպայում անվտանգության և համագործակցության կազմակերպության ԱՄՆ հանձնաժողովի (Հելսինկիի հանձնաժողով) համանախագահ սենատոր Բենջամին Կարդինը մեղադրանքները անվանել է «ակնհայտ շինծու և զրպարտիչ»: