Ձեր վստահելի աղբյուրը

«Հայաստանը գտնվում է բարեփոխումների հավակնոտ ծրագրերի շրջանում, ինչը պահանջում է նաև լուրջ կառավարիչներ: Նրանց անհրաժեշտ է լավ ուսուցում և վերապատրաստում: Հայաստանի պետական կառավարման ակադեմիայի և Ֆրանսիայի Էքս-ան-Պրովանսի Սիանս Պո քաղաքագիտության ինստիտուտի համագործակցության արդյունքում մենք կունենանք նման կառավարիչներ»,- Հայաստանի պետական կառավարման ակադեմիայում կայացած հանդիպման ժամանակ ասաց Հայաստանի նախագահի աշխատակազմի ղեկավար Վիգեն Սարգսյանը:

Նշենք, որ Սիանս Պո Արմենիան հիմնադրվել է «Հայաստանի Հանրապետության պետական կառավարման ակադեմիա» պետական ոչ առևտրային կազմակերպության և Էքս-ան-Պրովանսի Սիանս Պո քաղաքագիտության ինստիտուտի համագործակցության արդյունքում: Այն առաջարկում է Հայաստանի Հանրապետության հանրային ծառայողներին, ինչպես նաև ուսանողներին հետազոտական ոլորտի լայն և բարենպաստ պայմաններ, համատեղ բարձրագույն մասնագիտական (մագիստրոսի որակավորմամբ), հետբուհական կրթական ծրագրեր և լրացուցիչ, շարունակական կրթություն: Էքս-ան-Պրովանսի Սիանս Պո քաղաքագիտության ինստիտուտը հիմնվել է 1872 թվականին: Ինստիտուտի առաքելությունը ի սկզբանե եղել և մնում է առաջատար ղեկավարների պատրաստումը թե՛ Ֆրանսիայի Հանրապետության պետական համակարգի, թե՛ մասնավոր հատվածի համար: Նման հաստատության բացումը տարածաշրջանում աննախադեպ իրադարձություն է, քանի որ այն, ըստ էության, առաջինն է ԱՊՀ տարածքում: Սիանս Պո Արմենիան հավակնում է բարձրագույն մասնագիտական (մագիստրոսի որակավորմամբ) և հետբուհական կրթական ծրագրերի, լրացուցիչ և շարունակական կրթության ասպարեզում դառնալ միջազգային մակարդակի կառույց:

«Հայաստանում երբեք չի եղել նմանատիպ բարձր վարկանիշով կրթական հաստատություն, որն ունենա ավանդական կրթական մշակույթ: Սիանս Պո քաղաքագիտության ինստիտուտն աշխարհում հայտնի բուհական հաստատություն է, որ Ֆրանսիայի համար պատրաստում է առաջատար ղեկավարների պետական համակարգի, մասնավոր հատվածի համար»,- ասաց Կառավարման ակադեմիայի ռեկտոր Արսեն Լոքյանը՝ նշելով, որ հենց այս ինստիոտուտի շրջանավարտ է եղել Արժույթի միջազգային հիմնադրամի ղեկավար Քրիստին Լագարդը, ով նաև ինստուտուտի խորհրդի ղեկավարն է:

Նա նշեց, որ Ք. Լեգարդն ողջունել է Հայաստանի հետ նման ծրագիր իրականացնելու քայլը և նախատեսվում է նրա այցը Հայաստան առաջին շրջանավարտների դիպլոմների հանձնման ժամանակ:

Ա. Լոքյանն ասաց, որ իրենց հաջողվել է ֆրանսիական քաղաքագիտական հայտնի ինստիտուտի հետ կապեր հաստատել Հայաստանի նախագահի աշխատակազմի, սփյուռքի նախարարության օժանդակությամբ:

Գործողությունների ծրագիրը մեկնարկել է այս տարվա հունվարից: Տևողությունը 9 ամիս է:

«Եթե ունկնդիրներից որևէ մեկը ցանկանա շարունակել կրթությունը, նա կարող է հեռակա ուսուցման մեխանիզմներով Սիանս Պո մայր բուհի հետ շարունակել կրթությունը և միայն պաշտպանության ժամանակ ներկայանալ Ֆրանսիա»,- ասաց ակադեմիայի ռեկտորը:

Ա. Լոքյանը հայտնեց, որ բոլորը կարող են դիմել, ում գիտելիքները համապատասխանում են սահմանված չափանիշներին: Ֆրանսերին իմացությունը պարտադիր է: Նա միաժամանակ տեղեկացրեց, որ Սիանս Պո Արմենիայում սովորելը շատ բարդ է:

Սիանս Պո Արմենիա մասաճյուղի ունկնդիր Արագ Մանասյանը լրագրողների հետ զրույցում հույս հայտնեց, որ նմանատիպ կրթության շնորհիվ կարող է աշխատել պետական կառավարման ամենաբարձր օղակներում. «Այս ինստիտուտում ստացած կրթությունը տալիս է այդ հնարավորությունը»:

Իսկ ակադեմիայի մագիստրանտ Գայանե Սարգսյանն էլ ասաց, որ Սիանս Պո Արմենիա ծրագրի շրջանակներում ակադեմիայի ուսանողները հնարավորություն են ունենում մեկնել Ֆրանսիա: Մեկ շաբաթից ինքը փոխանակման ծրագրի շրջանակներում մեկնելու է Ֆրանսիա:

«Վստահ եմ, որ այդ մի քանի օրերը, որ անցկացնելու եմ Էքս-ան-Պրովանսի Սիանս Պո քաղաքագիտության ինստիտուտում, հնարավորություն կտա ծանոթանալ եվրոպական կրթական մոդելներին»,- ասաց նա:

Հայաստանի սփյուռքի նախարար Հրանուշ Հակոբյանի խոսքով, Հայաստանի համար կրթված հասարակություն ունենալը գլխավոր խնդիրներից մեկն է:

«Ինչքան կրթված լինի հասարակությունը, գրագետ, զարգացումն այնքան արագ կլինի: Մենք տեղյակ լինելով այս ինստիտուտի լավագույն ձեռքբերումներն, կարողացանք բանակցությունների միջոցով այն կապել մեր երկրի հետ: Այդ ինստիտուտի ծրագրով պատրաստված մասնագետների կարիքը մենք ունենք: Այս համագործակցությունը կգա ու կլրացնի այն ամենը, ինչ մենք ուզում ենք»,- ասաց նախարարը:

Հայաստանում Ֆրանսիայի արտակարգ և լիազոր դեսպան Անրի Ռենոն նշեց, որ Հայաստանի կառավարման ակադեմիայի որդեգրած հավակնոտ ծրագրերն արտահայտվում է նաև գործընկերության ընտրության մեջ:

Ըստ նրա, ծրագրի շրջանակներում կրթություն ստացած ունկնդիրները կարող են ստանալ կառավարման տեսանկյունից տեսական և գործնական մոտեցումների գերազանց համադրում:

Դեսպանը նաև ասաց. «Այսօրվա արարողությունը լավագույնս փաստում է, որ Վիլնյուսի գագաթաժողովում Հայաստանի և Եվրամիության միջև ընդունված համատեղ հայտարարությունը գործում է,  Հայաստանը շարունակում է համագործակցությունը Եվրամիության համապատասպան ամենատարբեր կառույցների հետ արդեն իսկ գոյություն ունեցող համագործակցության ոլորտներում»:

Ա. Ռենոն իր խոսքի վերջում շեշտեց, որ գնդակը գտնվում է Հայաստանի դաշտում ու պետք է սկսել խաղալ:

Սիանս Պո-ի Կովկասի ներկայացուիչ Ժիլբեր Դերդերյանն ասաց, որ ֆրանսիական քաղաքագիտական ինստիտուտը կարող է տալ այնպիսի կրթություն, որի շնորհիվ մարդ ի զորու է կանոնակարգել մտածելակերպը, հստակ տարբերակել գլխավորը երկրորդականից:

«Մենք փորձում ենք ստեղծել մի ընդհանուր օղակ՝ Մոնրեալից մինչև Պեկին: Այդ ցանցն անցնում է նաև Կովկասով, որտեղ իր ուրույն ու առանձնահատուկ տեղն ունի Հայաստանը: Մենք միտում ունենք նաև մեր ներկայությունն ապահովել Մոսկվայում»:

Նա նաև ներկաներին հիշեցրեց գեներալ դը Գոլի մոտեցումը, ով մշտապես սիրել է ընդգծել, որ Ալեքսանդր Մեծի հաջողությունների թիկունքում միշտ էլ եղել է Արիստոտելը:

Ի դեպ, նա ասաց, որ ինքը պատկանում է հազվագույն մարդկանց կատեգորիային, ում իսկապես յուրահատուկ պայմաններ է բաժին հասել. «Ես մեծացել եմ Ֆրանսիայում, կրթության ստացել ֆրանսիական պետական դպրոցներում, բայց խոր արմատներով ինձ հայ եմ զգում»:

ՀՀ նախագահի աշխատակազմի ղեկավար Վիգեն Սարգսյանն ասաց, որ երկու տարի առաջ ՀՀ նախագահի աշխատակազմը նախագահի հանձնարարությամբ ձեռնամուխ է եղել Հայաստանի կառավարման ակադեմիայի խորքային բարեփոխումների ծրագրին:

«Մեկ տարի անց Կառավարման ակադեմիան կտեղափոխվի նոր շենք: Այդ շենքն իմաստ չէր ունենա, արդյունք չէր տա, եթե Կառավարման ակադեմիայի ծրագրերն որակապես նոր մակարդակի չբարձրացվեն»,- ասաց նա:

Վ. Սարգսյանը նաև տեղեկացրեց, որ շարունակելու են ընդլայնել Կառավարման ակադեմիայի միջազգային համագործակցության շրջանակները, այդ ուղղությամբ այժմ բանակցություններ են ընթանում

«Մենք խնդիր ունենք Կառավարման ակադեմիան դարձնել տարածաշրջանային կենտրոն, ունենալ այլ երկրներից ուսանողներ: Ուզում ենք, որ այն ծրագրերը, որոնք իրականացնում ենք միջազգային գործընկերների հետ, դրանք էլ լինեն տարածաշրջանային նշանակության: Վստահ լինենք, որ մեկ-երկու տարի հետո կարողանալու ենք հասնել այդ նպատակին»,- ասաց Վիգեն Սարգսյանը: