Ձեր վստահելի աղբյուրը

«Տպավորությունն այնպիսին է, որ այն, ինչ ներկայացնում են ոչ իշխանական քաղաքական ուժերը, դա քաղաքական շահարկում է, իսկ այն, ինչ ներկայացնում է իշխանական մեծամասնությունը, դա ՀՀ քաղաքացու շահերից բխող մտահոգություն է: Եթե այդքան մտահոգված լինեիք, չէիք քվեարկի մի համաձայնագրի օգտին, որը մինչև 2043 թվականը ՀՀ-ին ուղղակիորեն զրկում է այլընտրանքային էներգիա ստանալու հնարավորությունից»,- այսօր Ազգային ժողովում Գազամատակարարման համակարգի գործունեությունն ուսումնասիրող ժամանակավոր հանձնաժողով ստեղծելու մասին ԱԺ որոշման նախագծի քննարկման ժամանակ հայտարարեց ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը:

Նրա խոսքով, իրենց խմբակցությունը ամբիցիաներ չունի և իրենց հետաքրքրում են միայն իրենց հուզող հարցերի պատասխանները:

«Մեզ ներկայացված նախագծում մեր հիմնական մտահոգությունները ներառված են, և «Բարգավաճ Հայաստանը» պատրաստ կլինի մասնակցել այդ աշխատանքներին, եթե ժամկետի հետ կապված մեր բարձրացրած մտահոգությունը վերանայվի», -հայտարարեց Զոհրաբյանը:

Նկատենք, որ խորհրդարանական մեծամասնությունն առաջարկում է, որ ժամանակավոր հանձնաժողովը գործի մինչև նոյեմբեր, իսկ «Բարգավաճ Հայաստան»  խմբակցությունը և մյուս ոչ իշխանական խմբակցությունները առաջարկում են հանձնաժողովին նախագծով տալ երեք ամիս ժամանակ` այսինքն աշխատանքներն ավարտել այս նստաշրջանում:

«Քաղաքական մեծամասնությունը չունի այն վստահության ռեսուրսը, որ մենք մտածենք, որ մինչև նոյեմբեր այն ժամկետը չէ, որ դուք ուզում եք խնդիրը լռեցնել, կրքերը քնեցնել և սպասել, թե հետո ինչ կլինի»,- հավելեց Նաիրա Զոհրաբյանը` ընդգծելով, որ իրական ցանկության դեպքում երեք ամիսը բավական է հանրությանն հուզող հարցերի պատասխան տալ:

Նրա խոսքով, «Բարգավաճ Հայաստան» խմբակցությունը պատրաստ է հանձնաժողովին միանալ միայն այն դեպքում, երբ հանձնաժողովի աշխատանքները կավարտվեն երեք ամիսների ընթացքում:

Նախորդող հրապարակում`

Խորհրդարանական մեծամասնությունը գազի մասին հարցը առաջարկում է քննարկել դռնփակ