Ձեր վստահելի աղբյուրը

«Չեմ բացառում, որ Ուկրաինայի դեպքերից հետո Ռուսաստանը, վախենալով դոմինոյի էֆեկտից, արագացնի կամ ուժեղ ճնշմամբ փորձի զարգացնել Մաքսային միության գործընթացը ոչ միայն Հայաստանի, նաև Բելառուսի, Ղազախստանի դեպքում»,- ասուլիսում նման դիտարկում արեց քաղաքագետ Սերգեյ Մինասյանը:

Միաժամանակ նա հույս հայտնեց, որ ՌԴ-ն Ուկրաինայի իրադարձություններից կարող է առնվազն ավելի բարենպաստ պամանների շուրջ բանակցել Մաքսային միության գործընթացի շուրջ:

Ըստ քաղաքագետի, Ուկրաինայում տեղի ունեցած դեպքերից հետո Հարավային Կովկասում և հետխորհդային տարածքում եվրաինտեգրման գործընթացը կարող է նոր թափ, նոր ընթացք ստանալ:

«Սա առնվազն նշանակում է, որ այս պայմաններում Հայաստանը հնարավորություն կունենա ընդլայնել բազմաշերտ հարաբերությունները Եվրամիության հետ»,- ասաց Ս. Մինասյանը:

Ինչ վերաբերում է Ուկրաինային, նա նշեց, որ ամենակարևոր ու լուրջ զարգացումները նոր են սկսվելու՝ իշխանության, պաշտոնների բաժանում: Քաղաքագետի կարծիքով, Ուկրաինայում տեղի չեն ունենում այնպիսի լուրջ զարգացումներ, որոնց հետևանքով Ղրիմն առանձնանա Ուկրաինայից: