Ձեր վստահելի աղբյուրը

ՀԱԿ խմբակցության անդամ Նիկոլ Փաշինյանը ԱԺ-Կառավարություն ավանդական հարցուպատասխանի ժամանակ դիմելով ՀՀԿ փոխնախագահ, Տնտեսագիտական համալսարանի խորհրդի անդամ,  ՀՀ ԿԳ նախարար Արմեն Աշոտյանին հիշեցրեց անցած հոկտեմբերի հայտնի դեպքերը, որոնք կապված են Երևանի քաղաքապետ Տարոն Մարգարյանի ատենախոսության պաշտպանության հետ:

«Հոկտեմբերի 26-ին Երևանի քաղաքապետ Տարոն Մարգարյանի այսպես կոչված ատենախոսության պաշտպանությունը վերածվեց խայտառակ սկանդալի: Սրանից հետո փոխանակ Տնտեսագիտական համալսարանի կառավարման խորհուրդը, ԿԳ նախարարությունը պատժի այդ սկանդալում ներգրավված երիտասարդներին, տեղեկանում ենք, որ Հայաստանի երիտասարդական հիմնադրամը համալսարանի ուսանողական խորհրդին պարգևատրում է «Լավագույն ուսանողական ինքնակառավարման մարմին» տարեկան տիտղոսով: Եվ որպես հետևանք, ահա, երևի այս պարգևատրումներից ոգևորված արդեն փետրվարի 13-ին Ագրարային համալսարանի ուսանողական խորհուրդն է փողոցային ռազբորկա սարքում իր իրավունքները իրացնող քաղաքացիների հետ` ծեծկռտուք հրահրելով»,- նշեց նա: 

«Պարոն Աշոտյան, ի՞նչ է կատարվում կրթության համակարգի հետ, իմ տպավորությամբ դուք այդ համակարգում ձևավորել եք ինչ-որ մեծ ՀՀԿ-ական խմբակներ և քրեակատարողական հիմնարկների օրինակով այդ խմբերը գործադրում եք բուհերը  հսկողության տակ պահելու համար: Ձեզ ի՞նչ է թվում, եթե Դուք չեք պատժում այդ ուսանողներին իրենց ռեկտորի գլխավորությամբ, դուք հանրությանն ընդամենը ուղերձ եք հղում, որ հանրությունն ինքը միջոցներ ձեռնարկի: Ի՞նչ է, Ձեզ թվում է ՀՀԿ-ականներից հետո ուրիշ պինդ քաղաքացիներ Հայաստանում չկան, որ դրանց իրենց տեղը կդնեն: Ես ձեզ հավաստիացնում եմ` կան ու եթե այսպես շարունակեք, տեսնելու եք այդ տեսարանները նորից: Ու այս անգամ բոլորովին ուրիշ արդյունքով»,- անտեսելով ՀՀԿ-ականների շարքերում բարձրացած աղմուկը հայտարարեց Ն.Փաշինյանը:

Արմեն Աշոտյանն էլ նախքան բուն հարցին արձագանքելը նշեց` «Պարոն պատգամավոր, վերջապես մենք հանդիպեցինք»,-ապա շարունակեց.«Կրթության մասին խոսելիս հայոց խորհրդարանում առհասարակ պետք մի քիչ ուրիշ տոնով խոսել, որովհետև կրթական համակարգը չի ներում չափից ավելի մեծ հռետորաբանություն, անգամ, եթե դրա կարիքը կա և հաշվի առնելով, որ մարտի 1-ի նախաշեմին հանրահավաք գնացող պոտենցիալ քաղաքացիների համար երկու ճամբարների միջև որոշակի պայքար է գնում, թե ով ավելի շատ մարդ կհավաքի` ոմանք Ազատության հրապարակում, դուք` Մյասնիկյանի արձանի մոտ: Բայց չեմ կարծում, որ նման ոճով հարցադրումները կավելացնեն ձեր հետևից եկողների թիվը»,- նշեց ԿԳ նախարարը:

Ինչ վերաբերում է բուն հարցին, ապա Ա.Աշոտյանը հայտարարեց, թե կրթական համակարգը ապաքաղաքականացված է քան երբևէ և հիշեցրեց, որ ուսանողական խորհուրդը լրագրողներից ներողություն է խնդրել, որոնց ակամայից վիրավորել է:

«Պետք է խնդրեմ գնահատականներ չտալ գիտական գործունեությանը և կապ չունի , թե ում` Երևանի քաղաքապետի, պատգամավորների, նախարարների թե շարքային քաղաքացիների: Ձեր նշած «այսպես կոչված» ատենախոսություն եզրույթը կարող է իրեն թույլ տալ բնագավառից ավելի լուրջ գիտելիքներ և հմտություններ ունեցող համապատասխան գիտնականը»,- ասաց նա ու հետաքրքրվեց` արդյո՞ք ճիշտ չի համարում Ն.Փաշինյանը, որ քաղաքական դրդապատճառներով ոչ մի ուսանողի չի հեռացրել համալսարանից:

«Կարծում եմ Դուք, որպես անձնավորություն, որ 1995-96թթ-ին քաղաքական դրդապատճառներով հեռացվել է ԵՊՀ-ից, պետք է ողջունեք, որ քաղաքական դրդապատճառներով այլևս ոչ մի ուսանող չհեռացվի բուհից: Այնպես որ` հարցադրման սրությունը բացարձակ կապ չունի հարցադրման հետ, առավել ևս, որ քաղաքապետի ատենախոսությունն անցել է համապատասխան չափանիշներով»,- հավելեց նա:

Ն.Փաշինյանն արձագանքեց. «Պարոն Աշոտյան, երբ ես ուզենամ մարդ հավաքեմ, ես հավատացեք այնքան մարդ կհավաքեմ, որ, հավատացեք, այդ օրը Ձեզ հաստատ դուր չի գա: Երկրորդ, Դուք խոսում եք հանցագործություն կատարած մարդկանց մասին: Կարո՞ղ է մարտի 1-ի մարդասպաններն էլ են ներողություն խնդրել, դրա համար Ձեր իշխանությունը սպանությունները չի բացահայտում…. Ի՞նչ է նշանակում` ներողություն է խնդրել, քրեական հանցագործությունը ենթադրում է քրեական գործի հարուցում և համապատասխան պատիժ, ինչ վերաբերում է գիտական գործունեությանը, իմ ասածն էլ հենց դա է` լրագրողներին հայհոյելը գիտակա՞ն է, գյուղակադեմիայի ուսխորհրդի անդամները փողոցային հայհոյանքներով փողոցում աղմուկ են սարքում` դա գիտական գործունեությո՞ւն է»,- հետաքրրքվեց պատգամավորը:

Ն.Փաշինյանի խոսքով, խնդիրը նրանում է, որ ՀՀԿ-ական կրթական այս համակարգը Երևանի քաղաքապետի ատենախոսության պաշտպանությունը փակում է լրագրողներից, որ վերջիններս հնարավորություն չունենան տեսնելու, թե Տարոն Մարգարյանը ինչպիսի դժվարությամբ է կարդում և ձեռքերի ինչպիսի դողով և իր ասածը այդ իրավիճակի մասին է հենց:

«Իսկ ինչ վերաբերում է խորհրդարանում հնչեցրած տոնին, ձեր կառավարության անդամներին ավելի լավ է սովորեցրեք խորհրդարանի հետ ինչ տոնով է պետք խոսալ: Ընդհանրապես խորհրդարանն ու ՀՀ քաղաքացին Ձեզ հետ խոսելու է այն տոնով, ինչպես Դուք եք խոսում»,- հավելեց նա:

Ա.Աշոտյանն էլ արձագանքեց, թե շնորհակալ է Փաշինյանից, որ լսում է իր դիտարկումները, քանի որ երկրորդ հարցադրման ժամանակ արդեն տոնը մի քիչ փոխել էր: Իսկ հետագա գնահատականների մասով էլ ասաց. «Ի՞նչ եք ուզում ասել, ինչքա՞ն մարդ պիտի հավաքեք, որ ես վախենամ… մի ընդհատեք… ինչքա՞ն մարդ պետք է հավաքեք, որպեսզի մարտի 1-ի կրկնություն փորձեք բերել, որպեսզի Հայաստանում փորձեք կրկնել այն դեպքերը, որոնց վրա մինչև այսօր փորձում եք կապիտալ հավաքել կամ ինչքան կարող եք մարդ հավաքել, որ, ներողություն, մարտի 1-ը դարձնեք քաղաքական նոր տարի, որ մարտի 1-ից առաջ սկսել դրա մասին հիշել, իսկ դրանից հետո ձեր խմբակցության անդամների հետ նստեն սակարկեն, թե վաճառվում է մարտի 1 ակցիա»,- հայտարարեց ԿԳ նախարարն ու հավելեց, որ այդպես էլ չլսեց Փաշինյանի պատասխանը, թե, արդյոք, նա ճի՞շտ է համարում քաղաքական հայացքների համար ուսանող հեռացնելու պրակտիկան: