Ձեր վստահելի աղբյուրը

Թուրքիայում սկսվել են վարչապետ Էրդողանի հրաժարականի պահանջով ցույցեր: Այս մասին տեղեկացնում է «Neurope» պարբերականը: Ցույցերը բռնկվել են Թուրքիայի 11 քաղաքներում,  մեկնարկել են այն բանից հետո, երբ երեկ համացանցում տարածվել էր 2013թ դեկտեմբերի 17-ին «Մեծ կաշառք» սկանդալի ժամանակ Էրդողանի և որդու խոսակցության ձայնագրությունը:

Ձայնագրության մեջ Էրդողանը որդու հետ քննարկում էր ծրագիր, թե ինչպես կարելի է թաքցնել 10 միլիոն դոլարը ոստիկանությունից, քանի որ կաշառակերության դեմ գործողությունն արդեն սկսվել էր:

Ցուցարարները հանդես են գալիս «Որտեղ են գողերը», «Դու պետք է պատասխան տաս մարդկանց առաջ» և «Ամենուրեք գողություն է, ամենուրեք կաշառակերություն» հակակառավարական կոչերով:

Ստամբուլում և Բորսայում ոստիկանությունը բախվել է ցուցարարների հետ:  Իր հերթին Էրդողանը հայտարարել է, որ ձայնագրությունը կեղծ է:

Հիշեցնենք, որ Ստամբուլի ոստիկանության կողմից դեկտեմբերի 17-ի առավոտյան «Մեծ կաշառք» անունը ստացած գործողությունների ընթացքում ձերբակալվել են մի շարք նախարարների որդիներ:

Ավելի ուշ հայտնի էր դարձել, որ «Մեծ կաշառքի» 2-րդ փուլում Թուրքիայի վարչապետի որդու նկատմամբ եղել է ձերբակալման որոշում, սակայն դատախազներին աշխատանքից հեռացնելուց հետո նոր դատախազները չեղյալ են համարել այդ որոշումը։