Ձեր վստահելի աղբյուրը

Դպրոցականների առարկայական օլիմպիադաների մարզային փուլն ընթացքի մեջ է, այն կտևի մինչև մարտի 10-ը:

Կրթության և գիտության նախարարության հանրակրթական վարչության նախադպրոցական և միջնակարգ կրթության բաժնի պետ Կարինե Ալեքսանյանը Panorama.am-ի թղթակցի հետ զրույցում տեղեկացրեց, որ մասնակցության ակտիվությունը շատ մեծ է, միայն մաթեմատիկայից առաջին փուլին մոտ 20 հազար մասնակից է եղել, ֆիզիկայից` 16 հազար:

«Ընդհանրապես օլիմպիադաներին երեխաները շատ ակտիվ են, նրանք ցանկանում են իրենց ուժերը փորձել, մենք բոլորս խրախուսում ենք մասնակցությունը, քանի որ այդ  նախնական փուլերում են ի հայտ գալիս այն տաղանդավոր երեխաները, ովքեր հետագայում մեր երկիրը ներկայացնում են միջազգային օլիմպիադաներում»,- ասաց նա:

Կարինե Ալեքսանյանի բնորոշմամբ, մասնակցում են ոչ թե այն երեխաները, ում ուսուցիչն ասում է` դու գնա, այլ բոլոր նրանք, ովքեր ցանկություն ունեն:

Դպրոցականների 14 առարկաների օլիմպիադաներն անցկացվում է 4 փուլով: Կարգի մեջ փոփոխություն է եղել, նախորդ տարին միայն մաթեմատիկան էր, այս տարի նաև ֆիզիկան իրականացնում են երեք փուլով:

Ինչ վերաբերում է հանրապետական փուլին, ամեն տարի, նախարարի հրամանով, հաստատվում է մարզերից բոլոր առարկաներից ակնկալվող մասնակցությունների թիվը:

«Ինչպես ասացի, ակտիվությունը բավական մեծ է, յուրաքանչյուր մարզից ցանկանում են շատ աշակերտներ ներկայացնել, բայց կան կազմակերպչական հարցեր, որոնք հնարավորություն չեն տալիս անսահմանափակ քանակությամբ աշակերտներ ընդունելու»,- ասաց նա և հավելեց, որ թվերը պայմանավորված են մարզի աշխարհագրական դիրքով, մեծությամբ և դպրոցների քանակով:

Հարցին` իսկ եթե որևէ մարզում ավելի թվով շնորհալի աշակերտներ լինեն, ինչպե՞ս են վարվելու, հնարավո՞ր է որևէ երեխա զրկվի մասնակցությունից, Կարինե Ալեքսանյանը պատասխանեց. «Մարզերը, հարգելով նախարարության այս հրամանը, աշխատում են պահել սահմանված թիվը: Բայց շատ հնարավոր է, որ լինեն թյուրիմացություններ, կրկնակի բողոքարկումներ, դժգոհություններ: Եթե տաղանդավոր երեխա լինի, մեկին կարող ենք, էլի, թույլատրել»:

Ինչ վերաբերում է մարզերի ու Երևանի աշակերտների համար սահմանված թվերի տարբերությանը, նա նկատեց, որ Երևանի դպրոցներն ավելի շատ են:

Մարզերից ակտիվ են Շիրակը, Լոռին, Սյունիքը:

«Արցախն է բավական ակտիվ, շատ լավ երեխաներ են գալիս: Հանրապետական առաջին, երկրորդ, երրորդ կարգայինների աշխարհագրությունը շատ մեծ է: Բոլորն էլ շատ լավ, տաղանդավոր երեխաներ են»,- ասաց նախարարության աշխատակիցը:

Նշենք, որ փետրվարի 22-ին Մաթեմատիկա առարկայի օլիմպիադայի մարզային փուլն է եղել, 24-ին` Հայոց լեզու, 25-ին` Հայ եկեղեցու պատմություն, 26-ին` Պատմություն, 27-ին` Քիմիա, մարտի 1-ին` Ֆիզիկան կլինի, 3-ին` Ինֆորմատիկա, 4-ին` Աշխարհագրությունը, 5-ին` Օտար լեզու (անգլերեն, ֆրանսերեն, գերմաներեն), 6-ին` Կենսաբանություն, 7-ին` Հայ գրականություն, Աստղագիտություն, 10-ին` Ռուսաց լեզու, ՆԶՊ:

Հանրապետական փուլը կմեկնարկի մարտի 16-ին և կավարտվի մայիսի 8-ին: