Ձեր վստահելի աղբյուրը

Արմավիրի և Արարատի մարզի շուրջ 120 կազմակերպություններ, որոնք տնտեսական գործունեություն են ծավալում, ջրառի ծավալները խախտելու համար հայտնվել են քրեական գործով անցնելու ռիսկի տակ: Այդ թվում նաև «Արարատ ցեմենտ» գործարանը: Նկատենք, որ այս գործարանը «Բարգավաճ Հայաստան» կուսակցության նախագահ Գագիկ Ծառուկյանի ընտանիքին է պատկանում և որոշ շրջանակներում տեսակետ կա, որ այդ գործարանում կատարվող ստուգումները, ինչպես նաև ջրանջատումը քաղաքական ենթատեքստ ունեն:

Այսօր կառավարության նիստից հետո լրագրողների հետ ճեպազրույցում, սակայն ՀՀ Գլխավոր դատախազ Գևորգ Կոստանյանը ցրել է այդ մտայնությունը և վստահեցրել, որ «հիմնավոր կասկածներ չկան պնդելու, թե դրանք քաղաքական ենթատեքստ ունեն»:

«Ես վստահ եմ, որ այլ պայմաններում խտրականության մասին կարելի էր խոսել, եթե մենք բոլոր մյուս կազմակերպություններում իրականացնեինք այդ քննչական գործողությունները և «Արարատ ցեմենտ»-ում չիրականացնեինք: Այդ պայմաններում արդեն բոլորիդ մոտ կառաջանար խտրական մոտեցման պատճառների մասին հարցը», -հայտարարեց Կոստանյանը:

Ամեն ինչ սկսվել է այն բանից, երբ գլխավոր դատախազի ներկայացմամբ, բնապահպանության նախարարությունը ուսումնասիրության արդյունքում պարզել է, որ Արարատյան դաշտավայրում ջրառի ծավալները ավելին են օրենքով նախատեսված չափաքանակից:

«Այսինքն, հիմքեր կան առնվազն ենթադրելու, որ ջրօգտագործողների կողմից օգտագործվում է ավելի շատ չափաքանակ, քան թույլատրվում է օրենքով: Եվ այդ փաստի կապակցությամբ` նկատի ունենալով, որ առավել ջրառը վնաս է հասցնում շրջակա միջավայրին, այդ փաստի կապակցությամբ հարուցվել է երկու քրեական գործ` մեկը Արարատի, մյուսը Արմավիրի մարզերում», -տեղեկացրեց Կոստանյանը:

Հարուցված քրեական գործի շրջանակներում իրականացվել ու իրականացվում են մի շարք քննչական գործողություններ, ընդ որում երկու մարզերում զուգահեռաբար: Քննչական գործողությունների թիրախում հատկապես հայտնվել են տնտեսական գործունեություն իրականացնող կազմակերպությունները, որոնց թիվը, ըստ Կոստանյանի, երկու մարզերում հասնում է շուրջ 120-ի: Այդ քննչական գործողություններն իրականացվում են նաև «Արարատ ցեմենտ» գործարանում:

«Քննարկման առարկա դառնում է երեք կարևոր ուղղություն` ապօրինի խորքային հորերի առկայությունը, առանց ջրօգտագործման թույլտվության ջրօգտագործման փաստերը և ժամկետանց ջրօգտագործման պայմանագրերի առկայությամբ ջրօգտագործման փաստերը: Այս երեք ուղղություններով իրականացվում է քննություն քրգործի շրջանակներում ոչ միայն «Արարատ ցեմենտ»-ում, այլ նաև շուրջ 120 կազմակերպություններում», -նշեց գլխավոր դատախազը:

Լրագրողի հարցին, թե Գագիկ Ծառուկյանի թիմը պնդում է, որ ճնշում է սկսվել իրենց նկատմամբ, Կոստանյանը պատասխանեց. «Ես չգիտեմ` ինչու է համոզված նման պնդում անում: Ես կարծում եմ, որ ես սպառիչ կարողացա ներկայացնել, որ դա ճնշում չէ: Եթե որևէ մեկը ճնշում է համարում այն հանգամանքը, որ հարուցված քրեական գործով պետք է զննություն անցկացվի ու անցկացվում է ու դա դիտվում է ճնշում, որևէ հիմնավորում չեմ տեսնում: Այստեղ ընդամենը խոսքը գնում է քննչական գործողություններ կատարելու մասին: Որևէ մեկին մեղադրանք դեռևս առաջադրված չէ այդ երկու գործերով, կասկածյալներ ներգրավված չեն, իրականացվում են ու իրականացվելու են քննչական գործողություններ ` անկախ նրանից, թե դա ինչ շահարկումների տեղիք կտա»:

Հարակից հրապարակում`

«Արարատ ցեմենտ»-ի հետ կապված խնդիրը իմաստ չունի քաղաքականացնել. Արամ Հարությունյան