Ձեր վստահելի աղբյուրը

«Գազի հետ կապված մենք ունեինք մի իրավիճակ, որ քաղաքական մեծամասնությունն էլ գիտակցեց, այդտեղ խնդիրներ կան և որ պետք է գտնվեն այնպիսի մեխանիզմներ, որ ապագայում մենք կարողանանք խուսափել նման խնդիրներից: Այնպես որ կարևոր է, որ կա խնդիր, որը պետք է փորձենք հասկանալ ու գնահատել և ոչ թե այն, թե ում կողմից է դա առաջարկվել ու ստեղծվել»,- ԱԺ-ում ճեպազրույցների ժամանակ հայտարարեց ՀՅԴ խմբակցության քարտուղար Աղվան Վարդանյանը` ներկայացնելով իր գնահատականը անցած քառօրյայի վերաբերյալ:

Ինչ վերաբերում է «Նաիրիտ»-ի հարցերով հանձնաժողովի ստեղծման իրենց նախագծի մերժմանը, ապա Ա.Վարդանյանն ասաց, որ գործարանի շուրջ ստեղծված խնդիրները համապատասխան հանձնաժողովում քննարկելը ամենևին էլ չէր խանգարի «Ռոսնեֆտ»-ի հետ բանակցություններին, ինչպես պատճառաբանեց կառավարությունն ու մեծամասնությունը, այլ հակառակը:

«Խոստացան, որ «Նաիրիտ»-ի հարցը կքննարկվի աշնանը, բայց մեր մտահոգությունները շատ են այս ժամկետի առումով` չքայքայվի մասնագիտական կազմը, սնանկ չհայտարարվի.... Մենք մտածում ենք, որ անգամ եթե ԱԺ-ն չգնաց հանձնաժողովի ձևավորմանը, բայց դատախազությունը պետք է զբաղվի այս խնդրով: Իսկ մենք պատրաստվում ենք հրապարակային քննարկում անել, հրավիրելով ոլորտի մասնագետների, որպեսզի հասկանանք, թե ինչ է կատարվել «Նաիրիտ»-ի հետ անցած տարիներին»,- տեղեկացրեց ՀՅԴ-ական պատգամավորը:

Մարտի 1-ի մասով. «Ես գտնում եմ, որ քաղաքական էջը փակելու ժամանակն է: Զոհերի հարազատները պետք է աջակցություն ստանան»,- նշեց նա:

Ինչ վերաբերում է այն հարցին, թե արդյոք կիսում է այն կարծիքը, որ մինչև իշխանափոխություն չլինի, մարտիմեկյան իրադարձությունները չեն բացահայտվի, Ա.Վարդանյանն ասաց, որ մարտի մեկի գործում բացահայտված չէ միայն այն, թե ովքեր են պատասխանատու սպանությունների համար, մնացածը բոլորիս աչքի առաջ է եղել:

«Որ ոստիկանի զենքից կոնկրետ ով է զոհվել, սա է հարցը: Սրա համար իշխանափոխություն... սա կապել իշխանափոխության հետ.... պետք է առավելագույնն անենք և մենք կողմ ենք դրան, որ բացահայտվեն սպանողներն ու աջակցություն ցուցաբերվի զոհվածների ընտանիքներին»,- ընդգծեց դաշնակցական գործիչը:

Ի դեպ, նա նշեց, որ վաղվա հանրահավաքին չի մասնակցելու: