Ձեր վստահելի աղբյուրը

Հայաստանի ֆուտբոլի ազգային հավաքականն արդեն երկար ժամանակ է, ինչ մնացել է առանց գլխավոր մարզչի: ՀՖՖ նախագահ Ռուբեն Հայրապետյանը խոստացել է, որ այսօր կհրապարակի նոր գլխավոր մարզչի անունը, ում գլխավորությամբ մեր ընտրանին կնախապատրաստվի մարտի 5-ին Կրասնոդարի «Կուբան» մարզադաշտում Ռուսաստանի ազգային թիմի հետ կայանալիք ստուգողական խաղին:

Հայաստանի ու Ռուսաստանի ընտրանիները տարբեր նպատակներ են հետապնդում: Եթե Ֆաբիո Կապելլոն այս խաղի օգնությամբ պետք է հասկանա, թե որ ֆուտբոլիստները պետք է մեկնեն Բրազիլիա` մասնակցելու աշխարհի 2014 թ. առաջնությանը, ապա Հայաստանի հավաքականը նոր մարզչի ղեկավարությամբ պետք է ձևավորի այն խաղը, որը պետք է ցուցադրի Եվրոպայի 2016 թ. առաջնության ընտրական փուլում` Ֆրանսիայում կայանալիք եզրափակիչ փուլի ուղեգրի նվաճմանը հասնելու համար:

Մեր ազգային թիմը հասցրել է հակադիր զգացումներ պարգևել երկրպագուներին. փայլուն խաղերին հետևել են անսպասելի ձախողումները, որոնց պատճառով արդեն երկու ընտրական փուլ է` կանգ ենք առնում եզրափակիչ մեկնող գնացքի դռան առջև` չկարողանալով բացել այն: Զգացվում էր, որ թիմը կայուն խաղ չի ցուցադրում և կայուն արդյունքներ չի գրանցում: Բայց նման իրավիճակը չէր կարող շարունակվել 2 ընտրական փուլ: Պարզ էր դառնում, որ եկել է մարզչական շտաբում փոփոխություններ կատարելու ժամանակը: Հավանաբար, դրանում համոզված էր նաև Վարդան Մինասյանը, ով որոշեց հեռանալ ազգային թիմից և ճանապարհ բացել այլ մասնագետի առջև: Ասվածը չի նշանակում, որ փորձում ենք քննադատել նրան: Ամենևին: Նա կատարեց այն, ինչ ի վիճակի էր, կատարեց մեծ նվիրվածությամբ, որի համար բոլոր երկրպագուները շնորհակալ են նրան: Բայց նույնիսկ նվիրվածության նման պայմաններում անհրաժեշտ է նայել առաջ` հուսալով, որ Վարդան Մինասյանը դեռ կշարունակի սովորել ու ապագայում նոր գիտելիքներով կրկին կվերադառնա հավաքական` մեր ազգային թիմի պատմության մեջ նոր ու հաղթական էջ գրելու համար:

«Եվրո-2016»-ի ընտրական փուլի վիճակահանության արդյունքում մեր ընտրանին հայտնվել է անչափ բարդ խմբում: Այստեղ եզրափակչի ուղեգրի համար պայքարին լիարժեք միանալու համար մեր երկրի գլխավոր թիմը պետք է կարողանա գերազանցել այնպիսի թիմերի, ինչպիսին են Պորտուգալիայի, Սերբիայի, Դանիայի ու Ալբանիայի ընտրանիները: Հայաստանյան ազգային թիմը հաշվարկից դուրս կհանդիպի նաև առաջնության եզրափակչի կազմակերպչի` Ֆրանսիայի հավաքականի հետ:

Անկախ վիճակահանության արդյունքներից, մեր ֆուտբոլասերները լավատեսությամբ են նայում ապագային և մեր թղթակցի հետ զրույցում խորհում են նաև այն թեմայի շուրջ, թե ով պետք է Հայաստանի հավաքականին առաջնորդի դեպի Ֆրանսիա:

Արթուր ԱՎԱՆՅԱՆ (գործարար).- Ես կցանկանայի հավաքականի ղեկին տեսնել արտասահմանցի այնպիսի մարզչի, ով բարձրակարգ թիմերում աշխատանքի փորձ ունի, այնպիսի մարզչի, ինչպիսին է, օրինակ Գվարդիոլան: Բայց լինելով իրատես` կցանկանայի, որ Վարդան Մինասյանը շարունակեր մարզել ազգային թիմը: Մեր ընտրանին իրական հնարավորություններ ունի` մտնելու «Եվրո-2016»-ի եզրափակիչ, սակայն այդ խնդրի լուծումը հնարավոր է միայն լավ և կայուն խաղի ցուցադրման դեպքում: Այսպիսի խմբում սխալներն ու սայթաքումները կարող են ճակատագրական դեր կատարել: Դանիացիների հետ մրցակցությունում հաղթանակի փորձ ունենք, ուստի կարծում եմ, որ երկրորդ տեղը միանգաման ռեալ է և համապատասխանում է մեր հավաքականի հնարավորություններին:

Էրիկ ԹԱԴԵՎՈՍՅԱՆ (դասախոս).- Կոնկրետ մարզչի անուն չեմ ուզում նշել, բայց նախապատվությունը կտայի խելացի հայ մարզչի: Նա պետք է պահպանի Վարդանի Մինասյանի ձևավորած թիմը` այն համալրելով նոր անուններով: Կցանկանայի, որ նոր մարզիչը գերադասեր հարձակողական խաղը: Իհարկե, Վարդան Մինասյանը պետք է շարունակեր ղեկավարել հավաքականը, քանի որ տեսել ենք, թե թիմն ինչպես է կարողանում խաղալ նրա ղեկավարությամբ:

Կարծում եմ, որ մեր հավաքականը, ի տարբերություն նախորդ ընտրական փուլերի, ավելի հարմար խմբում է հայտնվել ու կտիրանա հաջորդ փուլի ուղեգրին: Բոլոր մրցակիցների հետ պետք է խաղանք առավելագույն կենտրոնացածությամբ` երբեք չմոռանալ մալթացիների հետ երևանյան հանդիպման դառը փորձը:

Աստղիկ ԱՍԻԼԲԵԿՅԱՆ (ուսանող).- Ինձ համար կարևորն այն է, որ մարզիչը հայ լինի: Հայ ֆուտբոլիստների հոգեբանությունը հասկանալու համար հայ մարզիչ է պետք, իսկ հոգեբանությունն այսօր տեխնիկային հավասար բան է: Կարելի է նշանակել Սերխիո Մարգարյանին. Իմ ճանաչած մարզիչներից նա ամենահարմարն է մեր թիմի համար:

Հայաստանի հավաքականը կարող էր նաև Բրազիլիայի ուղեգիր նվաճել, եթե ֆուտբոլի ֆեդերացիայի ղեկավարությունը չխառնվեր Վարդան Մինասյանի գործերին: Այդ միջամտությունն ակնհայտորեն էր զգացվում: Ինձ մտահոգում է նաև այն հարցը, թե ինչու էինք տնային հանդիպումներն այդքան վատ անցկացնում, իսկ արտագնա խաղերը` փայլուն: Ինչպե՞ս է ստացվում, որ տանը Մալթայի թիմին պարտվելուց հետո հյուրընկալվելիս ջախջախում ենք դանիացիներին 4:0 հաշվով: Ինչո՞ւ էր գլխավոր մարզիչ Վարդան Մինասյանը նման ոչ համարժեք պատասխաններ տալիս պարտություններից հետո: Այս բոլոր հարցերը ճշգրիտ պատասխաններ պետք է ունենան, որպեսզի վստահ լինենք, որ անհրաժեշտ եզրակացություններն արված են:

Ինչ վերաբերում է «Եվրո-2016»-ին, կասեմ, որ մեր ֆուտբոլիստներն ի վիճակի են Ֆրանսիայի ուղեգիր նվաճել: Նրանց չարժե թերագնահատել: Իհարկե, շատ բան կախված կլինի նաև նոր մարզչից:

Շատ եմ ցանկանում, որ երբ Պորտուգալիայի հավաքականը ժամանի Երևան, մեր երկրպագուներն օդանավակայան գնան ոչ թե Ռոնալդուի, այլ մեր տղաների անունները վանկարկելու համար:

Վահան ԶԱՔԱՐՅԱՆ (դասախոս).- Այն բանում, թե ում եմ ուզում տեսնել հավաքականի գլխավոր մարզչի պաշտոնում, և ով կնշանակվի, մեծ տարբերություն կա: Կուզեի տեսնել Ժոզե Մոուրինյոյի ու Ալեքս Ֆերգյուսոնի կարգի մարզիչների, սակայն համադրելով ցանկություններն ու հնարավորությունները` պետք է հրավիրել Սերխիո Մարգարյանին:

Ընտրական փուլի վիճակահանությունից առաջ ներքին կանխազգացում ունեի, որ մեր հավաքականը կընդգրկվի 5 թիմանոց խմբում: Բարձր եմ գնահատում մեր թիմի` երկրորդ տեղ գրավելու հնարավորությունները: Ըստ իս` ամենացանկալի խումբը «F»-ն էր, որտեղ կկարողանայինք իրատեսորեն հավակնել նաև առաջին տեղին: Դանիացիներին կարող ենք հաղթել և արդեն ապացուցել ենք դա: Ալբանիայի թիմն անհամեմատ թույլ է: Պորտուգալիայի հավաքականի հետ խաղերում, իհարկե, կփորձենք արժանապատիվ խաղ ցուցադրել: Ինչ վերաբերում է Սերբիայի ընտրանուն, ապա պետք է նկատել, որ բարձրակարգ ֆուտբոլիստների քանակով գերազանցում է մեր հավաքականին: Սակայն սերբերի առաջատարներն արդեն տարիքով շատ մեծ են: Ես չեմ համարում, որ մերոնք հայտնվել են մահվան խմբում:

Արթուր ՀԱՅՐԱՊԵՏՅԱՆ (աշակերտ).- Կուզեի, որ հավաքականը խիստ, պահանջկոտ և Եվրոպայում աշխատանքի փորձ ունեցող մարզիչ գլխավորեր: Իմ կարծիքով` մենք հաջորդ փուլ անցնելու փոքր հնարավորություններ ունենք, սակայն չպետք է մոռանանք, որ երրորդ թիմերի շարքում լավագույն արդյունքն արձանագրած հավաքականը նույնպես եզրափակչին մասնակցելու իրավունք կստանա: