Ձեր վստահելի աղբյուրը

 Ադրբեջանական դիվանագիտությունը և քարոզչությունը, կեղծելով Լեռնային Ղարաբաղի կոնֆլիկտի էությունը և պատմությունը, հատկապես Աղդամի դեպքերը, շարունակում է մոլորեցնել միջազգային հանրությանը և ադրբեջանական ժողովրդին: Այս մասին ասվում է ԱՄՆ-ում ՀՀ դեսպանատան տարածած հայտարարության մեջ: Հայտարարությունը տպագրվել է մի շարք ամերիկյան հեղինակավոր ԶԼՄ-ների կողմից («The Sacramento Bee», «Digital Journal», «One News Page», «L.A. Biz, Ulitzer», «The Street» և այլն):

«Խեղաթյուրելով փաստերը` Ադրբեջանի վարչակարգը փորձում է խուսափել հայկական ջարդերի պատասխանատվությունից` իրականացված Սումգայիթում (1988թ. փետրվար), Կիրովաբադում (1988թ. նոյեմբեր), Բաքվում (1990թ. հունվար), Մարաղայում (1992թ. ապրիլ), ինչպես նաև Խոջալուում սեփական ժողովրդի նկատմամբ իրականացված կոտորածից: Ադրբեջանը փորձում է իրեն ներկայացնել որպես զոհ` թե սեփական երկրում, և թե արտերկրում Լեռնային Ղարաբաղի դեմ նոր պատերազմ սկսելու համար հող նախապատրաստելու նպատակով»,- ասվում է հայտարարության մեջ:

Դեսպանատունը նշում է, որ Ադրբեջանը մերժում է միջազգային բոլոր կոչերը, այդ թվում Մարդու իրավունքների եվրոպական դատարանի` 1992թ.-ի Աղդամի իրադարձությունների հետ կապված բաց քննարկում անցկացնելու կոչը:

«Այստեղ հարց է առաջանում, թե ինչու բոլոր նրանք, ովքեր Ադրբեջանի պաշտոնական վարկածից տարբերվող կարծիք են արտահայտել, կամ սպանվել են, ինչպես լրագրող Մուստաֆաևը, կամ ձերբակալվել, ինչպես լրագրող Ֆաթուլաևը, կամ էլ քաղաքական հետապնդումների զոհ են դարձել, ինչպես Ադրբեջանի առաջին նախագահ Այազ Մութալիբովը»,- նշված է այնտեղ:

«Իրականում Խոջալուն Ադրբեջանի հիմնական հենակետերից էր Լեռնային Ղարաբաղում, որտեղից էլ, ըստ Human Rights Watch իրավապաշտպան կազմակերպության, ադրբեջանցիները մի քանի ամիս շարունակ կրակի տակ էին պահում Ստեփանակերտը` Լեռնային Ղարաբաղի մայրաքաղաքը: Արդյունքում հարյուրավոր մարդիկ սպանվել կամ ծանր վիրավորվել են: Տները, հիվանդանոցները և այլ ոչ ռազմական կառույցներ հարձակման արդյունքում ավերվել են, իսկ տեղի բնակչությունը ահաբեկչության զոհ է դարձել: Այսպիսով, ադրբեջանական հարձակումը դադարեցնելը գոյատևման խնդիր էր դարձել Լեռնային Ղարաբաղի բնակչության համար», - ասվում է դեսպանատան հայտարարությունում:

Ադրբեջանցի լրագրող Էյնուլա Ֆաթուլաևը նշում է, որ «նույնիսկ հարվածը հասցնելուց մի քանի օր առաջ հայերը բարձրախոսների միջոցով անընդհատ զգուշացնում էին Խոջալուի բնակչությանը պատրաստվող գործողության մասին` առաջարկելով բնակիչներին լքել քաղաքը հումանիտար միջանցքով: Ըստ Խոջալուի փախստականների`նրանք օգտագործել են միջանցքը, և հայ զինծառայողները նրանց վրա կրակ չեն բացել: Այնուամենայնիվ, Խոջալուի բնակչության մի մասը սպանվել է հենց իրենց (ադրբեջանական զորքերի) կողմից...արդյոք դա միտումնավոր կերպով է արվել թե ոչ` պետք է պարզի հետաքննությունը...Նրանք սպանվել են ոչ թե ինչ-որ անհայտ մարդկանց կողմից, այլ Ադրբեջանի ժողովրդական ճակատի սադրիչների կողմից...(դիակները) խեղվել են հենց իրենց կողմից...»:

Ըստ ՀՀ դեսպանատան հայտարարության` Ադրբեջանի նախկին նախագահ Այազ Մութալիբովը մեղադրել է իր քաղաքական հակառակորդներին Խոջալուի սպանությունները իրականացնելու մեջ: Նա հարցազրույց է տվել, որտեղ հայտարարել է, որ «միջանցքը, որով մարդիկ կարող էին փախչել, իրականում տրամադրվել է հայերի կողմից: Այդ դեպքում նրանց ինչի ՞ ն է պետք եղել կրակ բացելը, հատկապես Աղդամի շրջակայքում, որտեղ բավականին ժամանակ և հնարավորություն կար մարդկանց օգնության հասնելու համար: Ինչպես նշում են Խոջալուից մազապուրծ եղած մարդիկ, ամեն ինչ կազմակերպվել էր իմ հրաժարականին հասնելու համար: Որոշ ուժեր ուզում էին վարկաբեկել նախագահին»:

«Այն փաստը, որ Խոջալուի բնակիչնեը իշխանության համար տարվող ներքին քաղաքական պայքարի զոհ են դարձել, հաստատել է նաև Ադրբեջանի Գերագույն խորհրդի նախագահ Կարաևը և իր հետնորդ Մամեդովը, ադրբեջանցի իրավապաշտպան Յունուսովը և մյուսները»,- նշվում է հայտարարությունում:

Հեյդար Ալիևը, որն այն ժամանակ նախագահի պաշտոնի հավակնորդ էր, Ադրբեջանում հայտարարել էր. «Արյունահեղությունը մեզ համար շահավետ է: Պետք չէ խառնվել»:

«Реальный Азербайджан» թերթի գլխավոր խմբագիր Էյնուլա Ֆաթուլաևը շատ տարիներ բանտում է անցկացրել ` մեղադրվելով զրպարտանքի մեջ: Նա դիմել էր Մարդու իրավունքների եվրոպական դատարան, որը որոշում էր ընդունել, ըստ որի`Ադրբեջանի իշխանությունը պետք է անհապաղ ազատ արձակեր Ֆաթուլաևին: Ի վերջո նա ազատ արձակվեց 2011թ.-ին և «Ազատություն» ռադիոկայանին տրված հարցազրույցում հայտարարեց, որ Խոջալուի դեպքերի հետ կապված նա մնում է իր հին կարծիքին, և հայտարարել է, որ «ադրբեջանական, ոչ թե հայկական ուժերն են մեղավոր 1992թ.-ին Խոջալուում տեղի ունեցած սպանությունների համար»,-ասվում է փաստթղթում:

ՀՀ դեսպանատունը նշում է նաև, որ Ադրբեջանի ագրեսիվ հռետորաբանությունը, պատմության խեղաթյուրումը, ինչպես նաև միլիարդավոր դոլարները, որոնք ծախսվում են հարձակվողական զենք գնելու համար, լուրջ սպառնալիք են ամբողջ տարածաշրջանի անվտանգության և կայունության պահպանման համար, և միջազգային հանրությունը պետք է պատշաճ պատասխան տա այդ ամենին: