Ձեր վստահելի աղբյուրը

Նախօրեին Panorama.am-ը  անդրադարձել էր  քաղաքացիների խնդրին` թեև արդեն մարտն է, հունվար ամսվա համար երեխայի խնամքի նպաստները չեն վճարվում, իսկ համապատասխան ստորաբաժանումները նույնիսկ չգիտեն, թե երբ կստանան ցուցակները և կսկսվի գործընթացը:

Աշխատանքային օրվա ավարտին Աշխատանքի և սոցիալական հարցերի նախարարությունը ի պատասխան Panorama.am-ի լրագրող Լիա Խոջոյանի «Որտե՞ղ է քնած նախարարությունը, երբ հիմա էլ երեխայի խնամքի նպաստներն են ուշացնում» հրապարակման հանդես եկավ պարզաբանմամբ, որում մասնավորապես նշված է.«Չանդրադառնալով 2013-ի տարեվերջին և 14-ի տարեսկզբին սոցիալական պաշտպանության ոլորտում կատարված մեծածավալ օրենսդրական բարեփոխումներին, նախարարությունը տեղեկացնում է, որ 2014-ի հունվար ամսվա ընտանեկան, սոցիալական նպաստները, հրատապ օգնությունները, մինչև 2 տարեկան երեխայի խնամքի նպաստը վճարվել են փետրվարի 8-ից, մի փոքր ուշացումով, որի համար նախարարությունն արդեն հայցել է բնակչության ներողամտությունը, իսկ փետրվարի վճարումները կսկսվեն այս շաբաթ: Մարտ ամսից վերոնշյալ բոլոր նպաստների վճարումները կսկսվեն ժամանակին՝ յուրաքանչյուր ամսվա վերջին տասնօրյակում:

… 2013թ. ծնված երեխա ունեցող այն ընտանիքներին, ովքեր չեն ստացել երեխայի ծննդյան միանվագ նպաստը, տեղեկացնում ենք, որ այն տրամադրվելու է հին կարգով, այն է՝ երրորդ և հաջորդող երեխաների նպաստը կազմում է 430 000 դրամ, վճարումները կսկսվեն առաջիկա 10 օրերի ընթացքում»:

Բացի այս, պարզաբանման մեջ նախարարությունից տեղեկացնում են երրորդ և չորրորդ երեխաների համար վճարվելիք նպաստների մասին, և որ նախարարությունը պատրաստ է արձագանքել բոլոր այն քաղաքացիների խնդիրներին, ովքեր առնչվել են սոցիալական ծառայությունների տարածքային մարմինների աշխատակիցների ոչ բարեխիղճ աշխատանքի հետ և խնդրում է յուրաքանչյուր կոնկրետ դեպքի մասին տեղեկացնել նախարարությանը՝ համապատասխան քայլեր ձեռնարկելու նպատակով:

Նշենք, որ պատասխանը հրապարակվել է նաև Facebook սոցիալական ցանցում, և այդպիսով հնարավորություն ընձեռել մեկնաբանել նաև նրանց, ում խնդրին անդադարձել էինք մեր հրապարակման մեջ: Զերծ մնալով մեկնաբանությունից իբրև հեղինակ, մեջբերենք քաղաքացի Օֆելյա Կամավոսյանի արձագանքը պարզաբանմանը. 

«Ախր խոսքն ու բողոքը գերազանցապես անցած տարի ծնված ոչ երրորդ կամ չորրորդ երեխաների համար 2014-ից վճարվելիք նպաստների մասին էր, այդ հարցում ձեր պարզաբանումից էլ հստակ է, որ ՈՉԻՆՉ ՉԻ ՓՈԽՎԵԼ, բայց մեր իրավունքները խախ-տվե-լ են:

Հոգնել ենք արդեն այս երկարաշունչ ու ոչինչ չփոխող հաղորդագրություններից: Հասկանում եմ, որ գուցե PR-ի կանոններն են պահանջում չընդունել թերացումը, բայց թերևս ճիշտ կլիներ ուղղել սխալը, չխաբել լրագրողներին ու նրանց միջոցով էլ մարդկանց, թե մեր գործելաոճը՜, մեր ցուցակները՜... կամ կարելի է կամավոր տեղը զիջել աշխատող ծառայողներին, այլ ոչ թե վատ աշխատել ու հարկատուներից աշխատավարձ ստանալ:

Ու հետո ինչո՞ւ են զարմանում, որ մարդիկ բողոքում են այս կամ այն սոցիալական ռեֆորմից...»:

Քաղաքացի Ազնիվ Կարապետյանը հավելում է.

«Ախր կոնկրետ իմ դեպքում խնդիրը ոչ թե «փետրվարի 8-ից մի փոքր ուշացումն է», այլ ընդհանրապես մինչև այսօր նպաստ չստանալը: Ես ոչ հունվարի նպաստն եմ ստացել, ոչ էլ փետրվարինը...»,- գրառել է երիտասարդ մայրիկը:

Այսքանից հետո միայն մնում է ավելացնել, որ, ցավոք, միշտ չէ, որ քաղաքացիների բողոքը բարձրաձայնվում է իրենց կողմից ու հասցեատիրոջը հասնում ու միշտ չէ, որ հասցեատերը նման արագ արձագանքում է դրան.... իսկ թե ինչպե՞ս է այդ պատասխանը լուծում խնդրի էությունը` սա արդեն հաջորդ հարցն է: