ՄՄ անդամակցելուց հետո ձեռնտու չի լինի օգտագործված ավտոմեքենա գնել
Անցած 2013 թվականին, ըստ ՀՀ կառավարությանն առընթեր պետական եկամուտների կոմիտեի հրապարակած պաշտոնական վիճակագրության, Հայաստան է ներկրվել 41 հազար 102 ավտոմեքենա, նախորդ տարվա 34 հազար 672-ի դիմաց: Ավտոմեքենաների ներկրումը 2013-ին 2012-ի համեմատ աճել է 6430-ով կամ 18,5 տոկոսով: 2013-ին ներկրված ավտոմեքենաներից 25 հազար 257 հատը (ընդհանուրի 61,4 տոկոսը) եղել են մինչև 5 հազար դոլար, 8 հազար 779 հատը (ընդհանուրի 21,3 տոկոսը) 5-ից 10 հազար դոլար, 3 հազար 104 հատը 7,5 (ընդհանուրի 7,5 տոկոսը) 10-ից 15 հազար դոլար, 2 հազար 630 հատը (ընդհանուրի 6,4 տոկոսը) 15-ից 30 հազար դոլար և հազար 332 հատը (ընդհանուրի 3,2 տոկոսը) 30 հազար և ավել դոլար մաքսային արժեքով ավտոմեքենաներ:
«Ավտոգրուպ» ընկերությունների խմբի մարքեթինգի բաժնի ղեկավար Արտյոմ Պետրոսյանը Panorama.am-ի հետ զրույցում ասաց, որ Հայաստան ներկրված ավտոմեքենաներից գործարանային արտադրությանը եղել են մոտ 3 հազարը, իսկ մնացածը օգտագործված հին ավտոմեքենաներ են:
«Հայաստանը հիմնականում ներմուծում է օգտագործված ավտոմեքենաներ՝ երեք ուղղություններից Ճապոնիայից, Գերմանիայից և ԱՄՆ-ից: Նշված երեք երկրները ներկայացնում են օգտագործված ավտոմեքենաների հիմնական շուկաները՝ ողջ աշխարհով մեկ»,- ասաց Պետրոսյանը:
Վերջինիս խոսքերով օգտագործված ավտոմեքենաների արժեքը նշված երեք շուկաներում շատ ցածր է, համեմատած նոր ավտոմեքենաների հետ, այդ թվում նաև ռուսական ավտոմեքենաների հետ: Բայց մյուս կողմից, եվրոպական երկրում, ԱՄՆ-ում կամ Ճապոնիայում շահագործված ավտոմեքենաները որակի առումով շատ չեն տուժել:
«Բայց դրանց արժեքը միևնույն է կտրուկ ընկել է և լուրջ մրցակցություն է ստեղծում նոր ավտոմեքենաների համար»,- ասաց Արտյոմ Պետրոսյանը:
Վերջինիս գնահատմամբ, Մաքսային Միությանը անդամակցելուց հետո Հայաստանում օգտագործված ավտոմեքենաների գները կրկնակի և ավել կբարձրանա, քանի որ Ռուսաստանի մաքսային օրենսդրությամբ օգտագործված ավտոմեքենաների ներկրման համար անհամեմատ ավելի բարձր մաքսավճարներ են նախատեսված, քան ներկայումս Հայաստանում:
«Տրամաբանական է, որ օգտագործված ավտոմեքենաների համար մաքսազերծման ավելի բարձր տոկոսադրույթներ են սահմանվում, քան նոր ավտոմեքենաների դեպքում, ինչը տարբեր կերպ է պատճառաբանվում՝ հիմնականում պայմանավորվում է բնապահպանական խնդիրներով»,- ասաց Պետրոսյանը:
Նա չբացառեց, որ նման բարձր տոկոսներ սահմանելը նաև տնտեսական շարժառիթներով է պայմանավորված, հին և նոր ավտոմեքենաների մրցակցությունը մեղմելու նպատակով, բայց բնականաբար, երբեք ոչ ոք այդ մասին պաշտոնապես չի հայտարարել և ոչ էլ կհայտարարի:
Մինչև 5 հազար դոլար մաքսային արժեք ունեցող ավտոմեքենաները դրանք հիմնականում եվրոպական և Ճապոնական արտադրության, մոտ տաս տարեկան և փոքր ու միջին ծավալով շարժիչ ունեցող (1000-ից մինչև 2000 սանտիմետր խորանարդ) ավտոմեքենաներն են:
Յոթ և ավել տարվա արտադրության ավտոմեքենաների համար Ռուսաստանում գործող մաքսազերծման դրույքաչափերն այսպիսինն են.
|
Շարժիչի ծավալը |
|
|
|
0-ից |
1000 |
3 եվրո/սմ.խոր. |
|
1001-ից |
1500 |
3,2 եվրո/սմ.խոր. |
|
1501-ից |
1800 |
3,5 եվրո/սմ.խոր. |
|
1801-ից |
2500 |
4,8 եվրո/սմ.խոր. |
|
2501-ից |
3000 |
5 եվրո/սմ.խոր. |
|
3001-ից |
ավել |
5,7 եվրո/սմ.խոր. |
Այսինքն, ստացվում է, որ ՄՄ անդամակցելուց հետո ասենք 2006 թվականի արտադրության, «1,6 լիտր» (1600 սմ/խոր.) ծավալով շարժիչ ունեցող «Օպել» մակնիշի ավտոմեքենա Հայաստան ներկրելու դեպքում մաքսազերծման համար անհրաժեշտ կլինի վճարել 5 հազար 600 եվրո: Հայաստանում ներկայումս նշված չափանիշներով ավտոմեքենայի մաքսային արժեքն կազմում է մոտ 6500-7000 դոլար և մաքսազերծման համար անհրաժեշտ է վճարել մինչև 2 հազար 500 դոլար:
Այսինքն, եթե ՄՄ անդամակցությունից հետո Հայաստանի մաքսային օրենսդրությունը ամբողջությամբ նույնականացվի ռուսականի հետ, ապա կարճ ժամանակ անց ավտոմեքենան Հայաստանում կդառնա շքեղություն:
Հեղինակ` Վահագն Հովակիմյան
Նախորդիվ`
ՄՄ մտնելուց հետո նոր և օգտագործված ավտոմեքենաների գնային տարբերությունը շատ քիչ կլինի
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
