Ձեր վստահելի աղբյուրը

«Ընդդեմ իրավական կամայականության» ՀԿ նախագահ, ՀՀ առաջին ՄԻՊ Լարիսա Ալավերդյանը չի կարծում, որ որևէ քայլ կարվի Ադրբեջանի կողմից, որ հայ ռազմագերի Հակոբ Ինջիղուլյանը վերադարձվի Հայաստան:

Այսօր լրագրողների հետ հանդիպմանը նա նկատեց, որ գործողություններն անցնել են ՄԱԿ-ի լիազորությունների ներքո և փնտրվում է այն երկիրը, որը կընդունի Հակոբ Ինջիղուլյանին:

«Այն անձանց նկատմամբ, որոնք պետք է տեղափոխվեն երրորդ երկիր, հասկանալի պատճառներով, վերաբերմունքն ավելի մեղմ է լինում: Հուսանք, որ Հակոբ Ինջիղուլյանի դեպքում դա այդպես է»,- ասաց նա:

Լարիսա Ալավերդյանի խոսքով, չկա այնպիսի փորձ, որ գերին երրորդ երկիր տեղափոխվելու ցանկության մասին հայտնի, և Ադրբեջանը նրան վերադարձնի Հայաստանին:

«Երբ ասում են երրորդ երկիր, ուրեմն նա կասկածներ ունի, որ սեփական երկրում կհետապնդվի: Բանն այն է, որ անազատության մեջ գտնվող անձին ցույց են տալիս այն, ինչ ուզում են ցույց տալ»,- ասաց նա ու նշեց, որ առաջին օրվա հակասական ու հատկապես բացասական արձագանքները մամուլում և սոցցանցերում մի քանի անգամ, տարբեր ձևերով ցույց են տրվել նրան:

Լարիսա Ալավերդյանն ընդգծեց, որ զինվորները գիտեն, որ Հայաստանում չկա այդ պրակտիկան, որ իրավական և բարոյական հետապնդումների ենթարկվեն գերի ընկածները:

«Օր առաջ Հակոբ Ինջիղուլյանի երրորդ երկրում հայտնվելը լավագույն բանը կլինի»,- եզրափակեց նա:

Կարդացեք նաև՝

Ն.Զոհրաբյանը կրկին նամակ է գրել ԵԽ մարդու իրավունքների հանձնակատարին` Հակոբ Ինջիղուլյանի խնդրով

Հակոբ Ինջիղուլյանի հարազատներն եղել են Ազգային ժողովում