Ձեր վստահելի աղբյուրը

«Ընդդեմ իրավական կամայակության» ՀԿ-ն Մամիկոն Խոջոյանի գործով պատրաստվում է Մարդու իրավունքների եվրոպական դատարան հրավիրել Ադրբեջանին: Այսօր մամուլի ասուլիսի ժամանակ տեղեկացրեց կազմակերպության նախագահ Լարիսա Ալավերդյանը:

«Ես կարծում եմ, որ մեկ շաբաթվա ընթացքում կպատրաստենք հայցը ՄԻԵԴ, այս դեպքը չպետք է վրիպվի: Եվրոպական դատարանը վերին աստիճանի տարբեր է լինում, փոխհատուցումը գնահատվում է նախ` ըստ հասցված ֆիզիկական վնասի և այն վերականագնելու համար պահանջված միջոցների»,- ասաց Լարիսա Ալավերդյանը:

Նա ընդգծեց, որ նաև ՄԱԿ-ի գործիքները կօգտագործվեն. «Մեր կազմակերպությունը միջազգային ցանցի անդամ է, որի միջոցով նաև տարածելու ենք տեղի ունեցածը: Այս դեպքը պետք է լինի միջազգային հանրության քննարկման նյութ»:

Անդրադառնալով Ժնեվյան կոնվենցիաներին, նա նշեց, որ չորրորդ կոնվենցիան է վերաբերում խաղաղ բնակչությանը, որի երրորդ հոդվածը կոշտ արգելք է դնում Մամիկոն Խոջոյանի հետ տեղի ունեցածի նման դեպքերի վրա:

«Հոդվածը վերաբերում է այն անձանց, ովքեր ժամանակին պատերազմին մասնակցել են ու վայր են դրել զենքը: Իսկ Մամիկոն Խոջոյանը չի էլ մասնակցել: Այդ հոդվածը հստակ արգելում է, որ չպետք է լինի ոտնձգություն ոչ կյանքի, ոչ ֆիզիկական անձեռնմխելիության նկատմամբ: Մասնավորապես, դաժան վերաբերմունք, խոշտանգումներ: Վերջապես, պատանդ վերցնելն է արգելված: Իսկ Խոջոյանը ոչ միայն դաժան վերաբերմունքի է ենթարկվել՝ բետոնի վրա քնելու, ծեծի, այլ խոշտանգումների: Խոշտանգում տերմինը լիովին պետք է կիրառվի այս դեպքում: Անձի արժանապատվության նսեմացումն է նաև առկա»,- մանրամասնեց նա:

Հայաստանն ու Ադրբեջանը միացել են ՄԱԿ-ի Խոշտանգումների կանխարգելման մասին կոնվենցիային, ապա նաև Եվրոպական նույնանուն կոնվենցիային:

«Այդ կոնվենցիան ասում է, որ մարդը բացարձակ իրավունք ունի խոշտանգման չենթարկվելու: Խոջոյանին առանց դատի ու դատաստանի, ծեծել ու նման վերաբերմունք են ցուցաբերել որպես պատիժ: Խոջոյանը 1937 թվականի ծնված, որդեկորույս մարդ է, նա կորցրել է կնոջը: Սա շատ լավ բնորոշում է նրան ու իրավիճակը: Նա կարիք ունի վիրահատության, բժիշկների զննության արդյունքում պարզվել է, որ վիրավորումը արդյունք է կրակոցի»,- ասաց նա:

Լարիսա Ալավերդյանի բնորոշմամբ, Խոջոյանը վերադարձել է ծայրահեղ ծանր վիճակում. «Ես վախենում եմ, որ վրա հասնի մահը, ինչը ավելի ծանր հանցագործություն է»:

Նա նշեց, որ Խոջոյանի՝ դիվերսանտ լինելու ադրբեջանական վարկածը ծաղրվել ու ոչնչացվել է առաջին հերթին Ադրբեջանում, ապա ամբողջ աշխարհում: