Ձեր վստահելի աղբյուրը

Ազգային ժողովի ՀԱԿ խմբակցության պատգամավոր Գագիկ Ջհանգիրյանը «Facbook»-ից ու մյուս սոցիալական ցանցերից, ինչպես ինքն է ասում, ոչինչ չի հասկանում: Չի հասկանում նաև դրանցում գոյություն ունեցող «Fake»-երի մասին, բայց համահեղինակ է անմիջականորեն ԶԼՄ-ներին վերաբերող «ՀՀ քաղաքացիական օրենսգրքում» փոփոխություններ կատարելու մասին օրենքի նախագծի: Օրենքի նախագծով պատգամավորները պայքար են մղում սոցիալական ցանցերում տարածում գտած «Fake»-երի, այսինքն` կեղծ օգտատերերի դեմ:

Այսօր Ազգային ժողովում հարցին, թե արդյոք այս օրենսդրական նախաձեռնությունը վտանգ չի ներկայացնո՞ւմ զանգվածային լրատվության միջոցների համար, ԱԺ պատգամավոր Գագիկ Ջհանգիրյանը պատասխանեց. «Առայժմ այդպիսի վտանգ չեմ տեսել: Եթե որևէ վտանգ տեսնեմ, ես հետ կվերցնեմ և կխնդրեմ, որ իմ գործընկերներն էլ հետ վերցնեն իրենց ստորագրությունը: Մի քիչ լավ չեմ այդ տեխնիկական միջոցներից, դրա համար մի քիչ դժվար եմ պատկերացնում: Ֆեյսբուքում չկամ, չեմ էլ ուզում լինել, դրա համար ես կքննարկեմ իմ այն գործընկերների հետ, ովքեր այդ ոլորտում շատ փորձառու են և կտեսնեմ` եթե որևէ վտանգ կա, անպայման հետ կվերցնեմ: Դուք մի կարծեք, թե ուզում եմ ձեզ նեղացնել, սահմանափակել»:

Նշենք, որ նախագծի հիմնավորման մեջ նշվում է` «նախատեսվող լրացումները պայմանավորված են այն հանգամանքով, որ վերջին շրջանում լայն տարածում է ստացել սոցիալական ցանցերում կեղծ օգտատերերի («ֆեյքերի») միջոցով վիրավորանք կամ զրպարտություն պարունակող տեղեկատվության տարածումը, որը խախտում է մի շարք անձանց ՀՀ Սահմանադրությամբ և միջազգային կոնվենցիաներով պաշտպանվող անձնական և ընտանեկան կյանքը հարգելու իրավունքը, արժանապատվության իրավունքը:

Խնդիրը առավել կարևորվում է նրանով, որ մի շարք լրատվական միջոցներ վերարտադրում և տարածում են կեղծ օգտատերերի զրպարտություն կամ վիրավորանք պարունակող տեղեկատվությունը, դրանք առավել հանրայնացնելով, ինչի հետևանքով այդ տեղեկատվությունը հայտնի է դառնում նույնիսկ այն անձանց, ովքեր գրանցված չեն սոցիալական ցանցերում: Նշված խնդիրը ներկայումս լուրջ մտահոգություն է առաջացնում ինչպես տեղեկատվական տեխնոլոգիաների առաջատար մասնագետների, բլոգերների մոտ, այնպես էլ համացանցից օգտվող բազմաթիվ անձանց մոտ: Ուստի կարևոր է սահմանել այն լրատվական միջոցների պատասխանատվությունը, որոնք տարածում են կեղծ օգտատերերի հրապարակումները և մեկնաբանությունները»:

Նախագծով առաջարկվող փոփոխություններով լրատվության միջոցը պատասխանատվություն է կրում իր էլեկտրոնային կայքում տեղ գտած, անհայտ հեղինակների վիրավորանք կամ զրպարտություն պարունակող մեկնաբանությունների համար:

Հարակից հրապարակում`

«Fake»-երի դեմ պայքարելու համար փոփոխություն կատարելու անհրաժեշտություն չկա, դաշտը կարգավորված է. Արա Ղազարյան