Ձեր վստահելի աղբյուրը

Ադրբեջանի խորհրդարանի իշխող կուսակցության պատգամավորները որոշել են պատասխանել ԱՄՆ Պետդեպարտամենտի մարդու իրավունքների զեկույցին, որում մարդու իրավունքների վիճակը Ադրբեջանում խիստ քննադատության է ենթարկվում: Այս մասին ասվում է ադրբեջանական «Зеркало» թերթի կայքում տեղադրված հոդվածում:

Հեղինակը նշում է, որ ադրբեջանցի խորհրդարանականները Ադրբեջանի օմբուդսմեն Էլմիրա Սուլեյմանովայի` մարդու իրավունքներին նվիրված զեկույցի քննարկան ժամանակ սկսել են խոսել Պետդեպարտամենտի զեկույցի մասին:

Ըստ իշխող «Ենի Ազերբայջան» կուսակցության փոխնախագահ Սիավուշ Նովրուզովի` երբ Աֆղանստանում թալիբներն էին իշխանության գլուխ կանգնած, թմրանյութերի շրջանառությունը նվազել էր մինչև նախկին ծավալների 3%-ը:

«Ամերիկացիների երկրում հայտնվելու հետ մեկտեղ կակաչի պլանտացիաների տարածքը 60 անգամ մեծացել է, իսկ ՆԱՏՕ-ի զորքերը հսկում են արտադրության շղթան, որպեսզի ոչ ոք չփորձի անգամ ոտնձգություն կատարել Եվրոպա մատակարարվող հերոինի նկատմամբ»,- ասել է Նովրուզովը:

Մեկ այլ իշխանամետ խորհրդարանական` Զախիդ Օրուջը, գտնում է, որ Ասադի ընտանիքի հարյուրավոր տարիների իշխանությունը Սիրիայում ավելի լավ էր, քան ներկայիս իրավիճակը:

«Ասադի կառավարման տարիներին ամերկացիները խոսում էին քաղաքացիների իրավունքների խախտման մասին, իսկ այսօր հազարավոր քաղաքացիներ սպանվել են, երկրում քաղաքացիական պատերազմ է: Լիբիայում ԱՄՆ-ն մարդու իրավունքների խախտումներ գրանցեց, միլիարդավոր դոլարներ հայտնաբերեց Քադաֆիի գաղտնի հաշվեհամարներում: Իսկ այդ փողերը արդյո՞ք ժողովրդին հասան: Իրաքում և մնացած այն բոլոր երկրներում, որտեղ ԱՄՆ-ի զորքեը մուտք են գործել նույնպիսի իրավիճակ է»,- ասել է նա:

Ի պատասխան խորհրդարանի փոխխոսնակ Զիաֆետ Ասքերովը, ով նույնպես «Ենի Ազերբայջան» կուսակցությունից է պատմել է Կրիլովի «Գայլը և գառը» առակը, որտեղ գառի մեղքը նրանումն էր, որ գայլը սոված էր: Ըստ նրա` ԱՄՆ-ն և այլ ուժեղ երկրներ իրենց շահերի համար թալանում են և շարունակելու են թալանել տարբեր երկրների կառավարություններին, որոնք էլ իրենց հերթին թալանելու են իրենց ժողովրդին:

«Թե հատկապես որ երկրի մասին էր խոսքը` Ասքերովը չասաց: Սակայն ես համոզված եմ, որ նա այն նկատի չուներ, ինչ բոլորի մտքով անցավ: Այնուամենայնիվ, զուտ մարդասիրական նկատառումներով կցանկանայի զգուշացնել պարոն փոխխոսնակին, որ նա այս թեմաների շուրջ ապագայում ավելի զգույշ արտահայտվի»,-գրում է հեղինակը ` հասկացնելով, որ նրա խոսքերը կարող է ընկնել «անհրաժեշտ մարդկանց ականջը»:

«Սակայն, ընդհանուր առմամբ, ես կցանկանայի կիսել իմ մտքերը` կապված ամբողջովին մեկ այլ հարցի հետ: Պարզվում է, որ ժողովրդավարության այնպիսի ամրոցներ, ինչպիսին են Սիրիան, Լիբիան, Իրանը, Կենտրոնական Աֆրիկայի հանրապետությունը, և այնպիսի հայտնի ժողովրդավար գործիչներ, ինչպիսին են Ասադը, Քադաֆին, Սադամը, և վերջապես Բոկասոն մեր օրերում իրենց հռչակն են վայլում ոչ միայն մեր խորհրդարանականների շրջանում»,- նշում է հեղինակը` հղում կատարելով պրոֆեսոր Ռաֆիգ Ալիևին, ով նույնպես մեղադրանքներ է ուղղել Արևմտյան երկրներին:

Հոդվածում նշվում է, որ ամերիկացիների գործողությունները Աֆղանստանում, Սիրիայում, Լիբիայում, Իրաքում ժողովրդավարության և մարդու իրավունքների հետ ոչ մի ընդհանուր բան չունեն:

«Այս երկրներում ԱՄՆ-ն, ինչպես նաև Ռուսաստանը մտահոգված են միայն իրենց ազգային և պետական շահով»,- նշում է հեղինակը:

Նշենք, որ ըստ ԱՄՆ պետդեպարտամենտի ժողովրդավարության, մարդու իրավունքների և աշխատանքի հարցերով բյուրոյի ամենամյա զեկույցի` Ադրբեջանում անպատժելիության միջավայրում մարդու իրավունքները շարունակաբար խախտվում են: Զեկույցի հեղինակները անցած տարվա ընթացքում Ադրբեջանում հիմնականում խախտումներ են գրանցել ժողովրդավարության և մարդու իրավունքների ոլորտներում: Դրանց շարքին են պատկանում ազատ արտահայտման, հավաքների մեծածավալ սահմանափակումները, ներառյալ լրագրողների, իրավապաշտպանների և ժողովրդավար ակտիվիստների հանդեպ հետապնդումները, ձերբակալությունները և ուժի կիրառումը: Ըստ մի շարք ՀԿ-ների` Ադրբեջանում առնվազն 12 լրագրող և բլոգեր գտնվում է ճաղերի հետևում: Ընդգծվում է նաև, որ բավականին խախտումներ են գրանցվել 2013թ.-ի Ադրբեջանի նախագահական ընտրությունների ժամանակ: