Ձեր վստահելի աղբյուրը

Հայաստանի Ազգային ժողովի ՀԱԿ խմբակցության պատգամավոր Նիկոլ Փաշինյանը դեմ է քվեարկելու ՀՀ քննչական կոմիտե ստեղծելու մասին օինագծին, որով առաջարկվում է ոստիկանության և պաշտպանության նախարարության քննչական կոմիտեների կազմի հիման վրա ստեղծել մեկ քննչական կոմիտե: 

Ազգային ժողովում այսօր մեկնարկած քառօրյա նիստում կոմիտեի մասին օրինագծի քննարկման ժամանակ Փաշինյանը հայտարարեց, որ իրավական համակարգում բարձրաձայնված բարեփոխումները չեն նպաստել աղմկահարույց մի շարք հանցագործությունների բացահայտմանը:

«Օրինակ, ոստիկանության պետի նախկին տեղակալ Գևորգ Մհերյանի սպանության գործը չի բացահայտվել, օրինակ մարտի 1-ի տասը սպանությունները մինչև օրս բացահայտված չեն, օրինակ` Ավետիք Բուդաղյանի սպանությունը բացահայտված չէ, չնայած ամենաշարքային «ուչաստկովին» երբ նայեր ու լսեր դեպքերի տեսաձայնագրությունը, ընդամենը մի քանի օրում կբացահայտեր, թե ով է պանել Ավետիք Բուդաղյանին: Քաղաքացիական ակտիվիստների նկատմամբ տեղի ունեցած հարձակումները մինչև օրս բացահայտված չեն, իսկ երբ կարդում ես ակտիվիստ ազատամարտիկ Վոլոդյա Ավետիսյանի գործով նախաքննության մասին հրապարակումները, զարմանում ես, որ 21-րդ դարում աշխարհում կա մի երկիր, որտեղ նախաքննությունը տեղի է ունենում ցինիզմի այդպիսի աննկարագրելի աստիճանով: Հարց է ծագում` նախկին կառուցվածքային փոփոխությունները ինչու որակական փոփոխություն չեն բերել մեր նախաքննությանը: Պատասխանը պարզ է` այդ փոփոխությունները որպես կանոն ունեցել են ձև և չեն ունեցել բովանդակություն: Իսկ եթե ունեցել են բովանդակություն, ապա դա եղել է ոչ թե իրավական, այլ ներիշխանական, ինտրիգային, կոնյուկտուրային ու նաև անձնավորված», -հայտարարեց Փաշինյանը:

Նրա համոզմամբ, խորհրդարանին ներկայացված օրինագիծը թեպետ ունի այլ վերնագիր` ՀՀ քննչական կոմիտեի մասին, բայց «հասկանալի է, որ սա օրենք է նախկին գլխավոր դատախազին աշխատանքի տեղավորելու մասին»:

«Այսօր Ազգային ժողովը ոչ թե օրենսդիր, իրավական հարց է լուծում, այլ ստանձնել է Աղվան Հովսեփյանին աշխատանքի տեղավորման գործակալի կարգավիճակը»,- հավելեց Փաշինյանը:

Պատգամավորն օրինագիծն ուսումնասիրելիս պարզել է, որ նվազեցվում է ոստիկանության պետի և պաշտպանության նախարարի ազդեցությունը, նրանց գերատեսչությունների լիազորություններից հանելով քննչական ծառայությունները և ուժեղացվում է վարչապետի դիրքը: Նկատենք, որ այս օրինագծով վարչապետն է Կոմիտեի ղեկավարի թեկնածուին առաջարկում ՀՀ նախագահին:

«Այնպես որ Աղվան Հովսեփյանը քննչական կոմիտեի ղեկավարի պաշտոնն ստանձնելուց առաջ հավատարմության երդում պետք է երկու տեղ տա` մի հատ կառավարությունում, մի հատ էլ Բաղրամյան 26-ում»,- հավելեց Փաշինյանը:

Նա ասաց, որ դեմ կքվեարկի օրինագծին և դրա համար ունի պատճառներ. «Եթե մենք բոլորս դեմ քվեարկենք այս նախագծին, Աղվան Հովսեփյանն աշխատանք չի ունենա, կմնա գործազուրկ ու կդառնա երիտասարդ թոշակառու, իսկ երբ դառնա երիտասարդ թոշակառու, համոզված եղեք, որ մի քանի ամիս հետո նա կնկատի, թե ինչպիսի հրեշավոր ու կոռումպացված համակարգ է Հայաստանի դատախազության համակարգը, թե ինչպիսի հրեշավոր մեթոդներով են Հայաստանում վարում նախաքննությունը: Իսկ երբ այս ամենը նկատի կդառնա մարդու իրավունքների պաշտպանության առաջամարտիկ, կսկսի պայքարել հանուն իշխանափոխության: Եվ երբ Աղվան Հովսեփյանը համալրի իշխանափոխության ուժերը, գուցե թե նրա ներուժը այն պակասող դետալն է, որը չի բավարարում Հայաստանում իշխանափոխություն կատարող ուժերին: Այս նկատառումներով դեմ եմ քվեարկում, որ Աղվան Հովսեփյանն ի վերջո միանա հանուն ազատության, արդարության, մարդու իրավունքների, ժողովրդավարության, հանուն պայծառ ապագայի մղվող պայքարին»: