Ձեր վստահելի աղբյուրը

Կառավարությունը ԱԺ շրջանառության մեջ օրենսդրական մի նախագիծ է դրել, որով առաջարկվում է հասարակական տրանսպորտը տնօրինության տալ ընդամենը մեկ օպերատորի: Panorama.am-ի հետ զրույցում «Ժառանգություն» կուսակցության փոխնախագահ, Երևանի ավագանու «Բարև Երևան» դաշինքի անդամ Արմեն Մարտիրոսյանն ասաց, որ ինքն այսօր է տեղեկացել, որ նմանատիպ օրինագիծ է շրջանառության մեջ դրված:

«Իհարկե, ինձ համար սա շատ խնդրահարույց է: Մեկ օպերատոր հասկացողությունը ինձ համար ընդունելի է, բայց ամբողջ խնդիրը կայանում է նրանում, թե մեկ օպերատորը ինչպիսին է լինելու»,- նշեց նա:

«Դեռևս Երևանի ավագանու ընտրությունների ժամանակ,- շարունակեց նա,- ես առաջ եմ քաշել տրանսպորտային խնդրի լուծման համակարգային մոտեցում, համաձայն որի Երևան քաղաքի հասարակական տրանսպորտը պետք է պատկաներ համայնքին, ունենար համայնքային սեփականություն և եթե անհրաժեշտություն լիներ նույնիսկ դոտացիա ստանալ, քանի որ պետք է լիներ, ըստ էության, ոչ շահութաբեր կազմակերպություն»:

«Հասարակական տրանսպորտը ոչ միայն ծառայություն է, այլև սոցիալական ծառայություն, ուստիև այն հնարավորինս պետք է մատչելի լինի: Այդ դեպքում մենք բավականին խնդիրներից կխուսափեինք, նախ կկարողանայինք այնպես անել, որ մետրոպոլիտենը նորմալ աշխատի և ուղևորափոխադրման մեջ մետրոպոլիտենի դերը բարձրանա, քանի որ այն շատ ու լավ աշխատացնելով հնարավոր է հասնել խցանումների և տրանսպորտային այլ խնդիրների նվազեցմանը: Այսինքն` հասարակական տրանսպորտի աշխատանքային մեթոդիկան պետք է փոխել»,- նշեց Ա.Մարտիրոսյանը: Եվ եթե առաջարկվող նախագծով մեկ օպերատորը պետք է լինի համայնքային սեփականության, ապա ինքը կողջունի դա, որովհետև այն տեղավորվում է իր առաջարկածի տրամաբանության մեջ:

«Բայց մտավախություն ունեմ ու կարծես հենց այդ մասին են խոսում, որ դա լինելու է ոչ թե համայնքային սեփականություն, այլ ինչ-որ մի տնտեսվարող սուբյեկտ: Ինչը նշանակում է, որ հերթական մոնոպոլիան է լինելու, որը բնականաբար ինձ համար որևէ ձևով ու տեսքով ընդունելի չէ` անկախ նրանից, թե սակագինը ով էր որոշելու` ավագանի՞ն, թե ՞ ոչ»,- իր կարծիքը հայտնեց նա:

Հարցին` արդյո՞ք սա նշանակելու է, որ օպերատորը նաև ինքն է որոշելու տրանսպորտի սակագինը, Ա.Մարտիրոսյանը նշեց, որ սակագինը կարծես թե ավագանին է էլի որոշելու, բայց նույնիսկ այդ պարագայում նա դա էլ չի ընդունում, քանի որ, շեշտեց, այսօրվա իրողությունների պարագայում ավագանին ինչ-որ մեկին հանգիստ կնվիրի այդ մոնոպոլիան: Այնպես որ` անգամ եթե ավագանին է որոշելու տրանսպորտի սակագինը, դա էլ ընդունելի համարել նա չի կարող:

«Մենք տեսնում ենք, որ կա Տնտեսական մրցակցության պաշտպանության պետական հանձնաժողով, բայց այն որևէ բան անել ոչ բնական մոնոպոլիաների հարցում, ըստ էության, չի կարող: Տեսնում ենք, որ կա Հանրային ծառայությունները կարգավորող հանձնաժողով, որը նույնպես որևէ բան ըստ էության չի անում, ինչ սակագին ներկայացվում է, գրեթե նույնությամբ հաստատում է: Ուստիև այդ ամենը հաշվի առնելով կարծում եմ, որ սա ընդամենը կլինի հերթական մոնոպոլիան, ինչ-որ մեկի համար տրամադրված, որը պետք է ստանա գերշահույթ»,- հավելեց նա: