Ամեն դեպքում վճարողը լինելու են երևանցիները
Այս շաբաթ տեղի ունեցած ՀՀ ԱԺ քառօրյայի վերջում քննարկված «Ավտոմոբիլային տրանսպորտի մասին» ՀՀ օրենքում փոփոխություններ կատարելու մասին նախագիծը և կից ներկայացված օրենսդրական փաթեթը, բուռն քննարկումների առիթ դարձավ: Այս փաթեթի նկատմամբ նման արձագանքը լրիվ տրամաբանական է, քանի որ դրանով ազդարարվում է, թե ՀՀ կառավարությունն ինչպիսի փոփոխություններ է ցանկանում իրականացնել Երևանում հասարակական տրանսպորտի համակարգում:
Մասնավորապես, «Ավտոմոբիլային տրանսպորտի մասին» ՀՀ օրենքում առաջարկվող փոփոխությամբ Երևանի հասարակական տրանսպորտի բնագավառում, առաջարկվում է ներդնել «մեկ օպերատորի» գաղափարը: Նշված օրենքում առաջարկվում է ավելացնել «օպերատոր» հասկացությունը, որը նշանակում է. «Երևան քաղաքում ընդհանուր օգտագործման ավտոմոբիլային տրանսպորտով ուղևորների ներքաղաքային կանոնավոր փոխադրումներ իրականացնող 100 տոկոս համայնքային մասնակցությամբ կազմակերպություն»:
Նույն օրենքում առաջարկվող մեկ այլ փոփոխությամբ էլ, նախատեսվում է, որ Երևանում մրցույթային կարգով կարող են ուղևորափոխադրում իրականացնող կազմակերպությունները ընտրվել միայն այն երթուղիների համար, որոնցով «օպերատորը» ուղևորափոխադրում չի իրականացնում: Այսինքն, եթե այս նախագիծն ընդունվի և ուժի մեջ մտնի, ապա մոտ ապագայում Երևանի երթուղիների մի մասը կրտվի մեկ՝ Երևանի քաղաքապետարանի պատկանող ձեռնարկությանը: Դրանից հետո ազատ մնացած երթուղիների սպասարկողներին ընտրելու համար նոր միայն մրցույթ կհայտարարվի:
Հաջորդ նորամուծությունն այն է, որ առաջարկվում է փոխել Երևանի ուղևորափոխադրումների սակագին սահմանողին: Ներկայումս սակագինը սահմանում է Երևանի քաղաքապետը, իսկ նախագծով առաջարկվում է այդ լիազորությունը տալ մայրաքաղաքի ավագանուն:
Մյուս կողմից, նախագծի բովանդակությունը ենթադրում է, որ առնվազն այն երթուղիներով, որոնք կսպասարկվեն մրցույթային կարգով ընտրված ուղևորափոխադրողների կողմից, այնուամենայնիվ սակագինը բարձրանալու է:
Այսինքն, եթե այս նախագիծը հաստատվի, ինչը թերևս անխուսափելի է, ապա Երևանի հասարակական տրանսպորտի սակագնի խնդրի հետ կապված կարող է այսպիսի իրավիճակ ստեղծվել. մրցույթային կարգով շահագործվող երթուղիների սպասարկման վարձը կբարձրանա և դա կարվի Երևանի ավագանու ձեռքով: Իսկ դրանից հետո Երևանի քաղաքապետ Տարոն Մարգարյանը այլևս հնարավորություն կունենա ասելու, որ տրանսպորտի թանկացման համար ինքը պատասխանատու չէ, այլ ավագանին է մեղավոր: Երևանի քաղաքապետարանին պատկանող «օպերատորի» կողմից սպասարկվող երթուղիների սակագները չբարձրացնելու համար էլ կառաջարկեն մայրաքաղաքի բյուջեից հատկացումներ կատարել: Այլ կերպ ասած, այս դեպքում էլ սակագնի թանկացման համար կվճարեն երևանցիները՝ բայց քաղաքի ընդհանուր գրպանից:
Հ.Գ. Վերջին ամիսներին պարբերաբար ինչ-որ մարդիկ հանդես են գալիս, որպես ուղևորափոխադրումներ իրականացնողների ներկայացուցիչներ: Վերջիններս, ինչ-որ թվեր են ներկայացնում, ըստ որոնց, իբր 100 դրամով հնարավոր չէ ուղևորափոխադրում իրականացնել և թվային ինչ-որ վերլուծություններ են ներկայացնում: Իրականությունը սակայն, այլ է. ուղևորափոխադրման ոլորտը, հատկապես միկրոավտոբուսներով, Հայաստանի ամենաստվերային բնագավառն է: Ցանկացած երթուղայինի վարորդի հարցուփորձ արեք և նա ձեզ կասի, որ օրական ինքը առնվազն 10 հազար դրամ վճարում է գծատերին, որը որևէ կերպ չի արձանագրվում, ավտոմեքենայի լիցքավորումը վարորդի հաշվին է, եթե գրանցված վարորդ է, ապա միևնույն է երբևէ աշխատավարձ չի ստացել և այսպես շարունակ: Այսինքն, այն ամենը, թվերը, վերլուծությունները և այլն, որ ներկայացվում է «տրանսպորտնիկների» կողմից, իրական կյանքում տիրող վիճակի հետ կապ չունի:
Վահագն Հովակիմյան
Նախորդիվ`
Հասարակական տրանսպորտի, հնարավոր թանկացումների և ծառայությունների իրական գնի մասին
Ն.Փաշինյան. Այսպես են անում, որ քաղաքական գործիչ ասելիս ժողովուրդը հասկանում է «խաբեբա, շուլեր, մաշեննիկ»
Հիմա էլ հասարակական տրանսպորտն են մոնոպոլացնո՞ւմ. ԱԺ-ում շրջանառության մեջ է դրվել հերթական նախագիծը
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
