Ձեր վստահելի աղբյուրը

«Աղդամի իրադարձությունները Հայոց ցեղասպանության հետ համեմատելը ոչ միայն կոռեկտ չէ, այլ նաև տգիտություն ու սրբապղծություն է»,- Panorama.am-ին տված հարցազրույցում, անդրադառնալով ՀՀ առաջին նախագահի նախկին գլխավոր խորհրդական, Միչիգանի համալսարանի պրոֆեսոր Ժիրայր Լիպարիտյանի՝ Թուրքիայում հրատարակվող «Ակօս» թերթում վերջերս տպագրած «Խոջալու. մի տեսանկյուն» վերնագրով հոդվածին, ասել է ՀՀ Մարդու իրավունքների առաջին պաշտպան, «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանը:

 «Բոլորը գիտեն, որ չկա «Խոջալու» երևույթ, տեղի են ունեցել Աղդամի իրադարձությունները, որոնք ոչ մի ընդհանուր եզր չունեն 1915 թվականի Հայոց ցեղասպանության հետ»,- նշել է տիկին Ալավերդյանը:

 Նա ընդգծել է, որ Ադրբեջանի կողմից, այն տարածքում, որը գտնվել է ադրբեջանական զինված ուժերի վերահսկողության տակ, իրականացվել է հանցագործություն սեփական բնակչության և թուրք-մեսխերի նկատմամբ: Բոլորին հայտնի է, որ Աղդամի իրադարձությունների ժամանակ խաղաղ բնակչությանը դուրս բերելու նպատակով հայկական զինված ուժերը հումանիտար միջանցք էին առանձնացրել, ինչի մասին պատշաճ կերպով հայտարարված է եղել:

Նախկին իրավապաշտպանի խոսքերով՝ մի քանի լրագրողներ խիզախություն են ունեցել այդ իրադարձությունների մասին ճշմարտությունը պատմելու, ինչի համար պատասխան են տվել, մեկը՝ նույնիսկ կյանքով:

«Ինչ վերաբերում է Հայոց ցեղասպանությանը, ապա ավելորդ է հիշեցնել, որ դա թուրքական իշխանությունների նախօրոք պատրաստված, նպատակաուղղված քաղաքականության արդյունք է: Ցեղասպանություն եզրույթը կարելի է օգտագործել նաև ադրբեջանական իշխանությունների վարած քաղաքականության հետ, որը սկսվել է 1988 թվականին Սումգայիթյան ջարդերով և շարունակվում է առ այսօր, ինչի ապացույցն է Ռամիլ Սաֆարովի հանցագործությունը»,-շեշտել է Ալավերդյանը:

Վերադառնալով Ժիրայր Լիպարիտյանի հոդվածին՝ Ալավերդյանը նշել է, որ այդօրինակ հայտարարությունները պատիվ չեն բերում նման հայտնի մարդուն: Ըստ նրա՝ հոդվածը լի է հակասություններով:

«Մի կողմից նա հայտարարում է, որ ճշգրիտ չգիտի, թե ինչ է տեղի ունեցել 1992 թվականին, չնայած որ իշխանության կազմում բավականին բարձր պաշտոն է զբաղեցրել, մյուս կողմից գնահատական է տալիս մի բանի, որի մասին, իր իսկ խոսքով, տեղյակ չէ», - ասաց առաջին օմբուդսմենը:

Ըստ Ալավերդյանի` 1992թ.-ից սկսած տարիներ շարունակ տպավորություն է ստեղծվել, որ Լիպարիտյանը գործում է ոչ թե հայ ազգի, այլ ուրիշ երկրների շահերից ելնելով:

«Ես չեմ կարծում, որ նա քաղաքագիտության ոլորտում գիտելիքի պակաս ունի: Ես գտնում եմ, որ նա այլ երկրների պատվեր է կատարում», - նշեց Panorama.am-ի զրուցակիցը:

Նախկին օմբուդսմենի կարծիքով` Լիպարիտյանի գործունեությունը թելադրված է ԱՄՆ շահերով, և նրա արտահայտած տեսակետները համընկնում են Միացյալ Նահանգների պաշտոնական դիրքորոշման հետ, որը, բնականաբար, համապատասխանում է Թուրքիայի դիրքորոշմանը:

«Նրա առաքելությունն է` բոլոր հնարավոր ձևերով տապալել Ցեղասպանության ճանաչումը»,- ընդգծեց Ալավերդյանը:

Հիշեցնենք, որ 1992 թ.-ի փետրվարի 26-ին, Ղարաբաղյան պատերազմի ընթացքում Աղդամ քաղաքի մերձակայքում չպարզված հանգամանքներում զոհվել են 200-ից 300 մարդ (համաձայն միջազգային Human Right Watch իրավապաշտպան կազմակերպության տվյալների, իսկ Ադրբեջանի կողմից քարոզվող տարբերակով, զոհվել է ավելի քան 600 մարդ), ովքեր Ադրբեջանի իշխանության կողմից միտումնավոր կերպով պահվել են ռազմական գործողությունների կիզակետում: Խոջալուի բնակչությունը մի քանի ամիսների ընթացքում ստիպողաբար մնացել է բնակավայրում և Ադրբեջանի իշխանությունների կողմից միտումնավոր կերպով չի տարհանվել՝ հետագայում նրանց որպես կենդանի վահան օգտագործելու նպատակով:

Խոջալուի բնակչությունը ԼՂՀ ինքնապաշտպանության ուժերի կողմից առանձնացված հումանիտար միջանցքով դուրս է եկել բնակավայրից, առանց որևէ խոչընդոտների անցել է ավելի քան 10 կմ և հասել է մինչև ադրբեջանցիների կողմից վերահսկվող Աղդամ քաղաքը: Ավելի ուշ ադրբեջանական զինված ուժերին բավական մոտ գտնվող հատվածում հայտնաբերվել են զոհվածների մարմինները: Զոհվածների իրական քանակը հայտնի չէ, քանզի պաշտոնական Բաքուն հրապարակում է միմյանց հակասող թվեր: Խաղաղ բնակիչների այս ողբերգական զոհերի հետաքննության համար ստեղծված Ադրբեջանի խորհրդարանի հանձնաժողովը Հեյդար Ալիևի հրամանով լուծարվել է, իսկ հետաքննությանը վերաբերվող նյութերը սկսել են գաղտնի պահվել:

Կարդացեք նաև`

Տատիկների մեջ տարբերություն չկա, բայց և նմանություն էլ չկա

Կրկին տատիկների մասին՝ հավասարության նշանը պետք է բացառել