Ձեր վստահելի աղբյուրը

Թուրքիայում ձերբակալվել է պոլսահայ լրագրող Հրանտ Դինքի սպանության նախապատրաստման մասին նախապես տեղեկացված, սակայն, անտարբերություն և անփութություն դրսևորած` Ստամբուլի հետախուզական վարչության նախկին պետ Ռամազան Աքյուրեքը: Այս մասին տեղեկացնում է «Ասբարեզ» պարբերականը: 

«Նրա տուն են մտել ոստիկանության աշխատակիցները, ձերբակալել և առգրավել նրան ամրագրված զենքը:

Ստամբուլի հետախուզական վարչության տեսուչների կողմից երկար ժամանակ անցկացված քննության արդյունքում պարզվել է, որ նրա ղեկավարության ժամանակաշրջանում համակարգիչներից խիստ կարևոր տեղեկություններ են ջնջվել: Այդ փաստաթղթերի մեջ եղել են նաև Հրանտ Դինքի սպանության հետ կապված տեղեկությունները: Դատախազությունը կասկածներ ունի, որ Աքայուրեքը Ֆեթուլլահ Գյուլենի համայնքի հետ կապեր ունի:

Ռամազան Աքյուրեքը 2004 թ-ին բարձր պաշտոնի էր նշանակվել Տրապիզոնի անվտանգության տնօրինությունում, որից հետո այն տարածքներում, որտեղ նա ծառայում էր, հնչեղ քրեական իրադարձություններ են տեղի ունեցել՝ մասնավորապես 2004 թ.-ին Տրապիզոնում Mc Donald’s-ի վրա նռնակներ նետելու գործն էր:

Տրապիզոնի անվտանգության տնօրինությունը տեղյակ էր Դինքի սպանության գործով անցնող Էրհան Թունջելի մեղավոր լինելու մասին: Սակայն, տնօրինությունը դա թաքցրել է` դարձնելով նրան իր գործակալը»,- նշում է աղբյուրը:

Հիշեցնենք, որ Դինքը սպանվել է 2007 թվականի հունվարի 19-ին, Շիշլիում գտնվող «Ակոսի» խմբագրատան առաջ, ետևից գլխին արձակված երեք հրազենային կրակոցներից։ Մարդասպանը հեռանալուց գոչել էր «գյավուր», ինչը ենթադրելու հիմք է տալիս, որ սպանությունը կատարվել է ազգային հողի վրա։

Սպանությունն իրականացնելու կասկածանքով թուրքական Սամսուն քաղաքի ավտոկայանում ոստիկանությունը ձերբակալել է 17-ամյա Օգյուն Սամաստին, որն առաջին իսկ հարցաքննության ընթացքում խոստովանել է իր մեղքը։