Ձեր վստահելի աղբյուրը

Տրանսպորտային միջոցներով շտապօգնության ծառայության ապահովվածությունը դեռևս հեռու է ցանկալիից: Խնդիրն ակնառու է հատկապես մարզերի շտապօգնության ծառայությունում, որտեղ բուժհիմնարկների գերակշիռ մասը նոր մեքենաների հետ մեկտեղ օգտագործում են նաև հին` դեռևս խորհրդային տարիներից մնացած մեքենաները:

«Աշխատանքներ են տարվում խնդրի հիմնավոր լուծման նպատակով»,- այսօր լրագրողների հետ հանդիպմանն ասաց ԱՆ աշխատակազմի արտահիվանդանոցային բժշկական օգնության քաղաքականության բաժնի պետ Ռուզաննա Յուզբաշյանը:

Նա նշեց, որ Շտապօգնության ծառայության արդիականացման նպատակով մշակվել և կառավարության որոշմամբ հաստատվել է «Շտապ բժշկական օգնության արդիականացման ծրագիրը», որի գործարկումը նախատեսվել էր 2010 թվականին, իսկ ավարտը` 2014 թվականին:

Մշակվել և նախարարի հրամանով հաստատվել են նաև «Բնակչությանը ցուցաբերվող շտապ բժշկական օգնության տրամադրման» նոր չափորոշիչը, էլեկտրոնային կանչի թերթիկը, լրացման կարգը, խորհրդատվական թերթիկը, հաշվետվական ձևեր` կապված անձնակազմի, մեքենաների, տրամադրված բուժօգնության որակի գնահատման, ինչպես նաև ֆինանսական և վիճակագրական ձևեր, լրամշակվել է ուղեկցող թերթիկը, սանավիայի թերթիկը:

ԱՆ արտահիվանդանոցային բժշկական օգնության քաղաքականության բաժնի պետի խոսքով, ձեռք են բերվել շտապօգնության մեքենաներ, որոնք հատկացվել են Կոտայքի, Արարատի, Արմավիրի, Տավուշի, Սյունիքի, Արագածոտնի մարզերի 6 բժշկական հաստատություններին:

2011-ին Չինաստանի Ժողովրդական Հանրապետության կառավարությունը Հայաստանի Հանրապետությանը նվիրաբերել է 20 ռեանիմոբիլ և 68 գծային շտապօգնության մեքենա` հագեցված անհրաժեշտ սարքավորումներով:

«Այդ մեքենաներից 53–ը տրամադրվել է մարզերին, իսկ 35–ը` Երևանին»,- ասաց Ռուզաննա Յուզբաշյանը:

Նշենք, որ ծառայությունում ընդգրկված բոլոր մասնագետները վերապատրաստվել են կրթական նոր ծրագրերով։  

Անցյալ տարի մշակվել է շտապօգնության ծառայության ըստ կատարողականի որակի գնահատման 80 ցուցանիշ, որից 17-ը կներառվի շտապօգնության վերլուծական համակարգում գործարկման առաջին տարվա ընթացքում: Շտապօգնության կողմից իրականացվող բուժօգնության որակի վերահսկման նպատակով ներդրվել են կյանքին վտանգ սպառնացող` որոշակի հիվանդությունների և սուր վիճակների ժամանակ, անհետաձգելի օգնության կազմակերպման ախտորոշիչ և բուժական միջամտությունների 16 գործելակարգեր և ուղեցույցներ: