Ձեր վստահելի աղբյուրը

«Ինչպիսի՞ն է ժամանակակից գրականությունը, ի՞նչ գործընթացներ են տեղի ունենում: Այս հարցերին պատասխանելու համար շատ կարևոր է, թե ինչ հայացքով ես նայում իրերին ու որ դիտակետից, ինչ անկյան տակ: Երբ շատ մոտիկից ես նայում կամ ներսից, մի քիչ միակողմանի է ստացվում ամեն դեպքում, քանի որ կենտրոնանում ես կոնկրետ դեպքերի, մարդկանց, հարաբերությունների վրա: Եվ արդեն, կախված մեր վերաբերմունքից տվյալ երևույթին, հաճախ ընդհանրացնում ենք ու շտապում գնահատական տալ ամբողջին: Երբ մի քայլ հեռվից ես նայում ու սրտացավ վերաբերմունքով, ապա որքան էլ որ ցավագին ես տանում բացասական երևույթները, միևնույն է, հասկանում ես, որ բոլոր բացասական դրսևորումները օրինաչափ են ու բնորոշ բոլոր ժամանակներին»,- ժամանակակից գրականության, պոեզիայի մասին՝ Panorama.am-ի հետ զրույցում նման դիտարկումներ արեց գրականագետ Հասմիկ Խեչիկյանը:

Նրա խոսքով, ժամանակակից գրականությունը նորմալ հունով զարգանում է, ավելին 90-ականների բացը այսօր զգալիորեն կոմպենսացվել է. «Այսօր ես տեսնում եմ վերելքի ուղի բռնած գրականություն ու արվեստ, որը դեռ իրոք մեծ անելիք ունի գրական-մշակութային նոր պայթյուն ունենալու համար: Այսօր կան հետաքրքիր անուններ, նրանց կողքին կան բազմաթիվ նմանակողներ, կան առհասարակ մեր պատկերացմամբ գրականության հետ կապ չունեցող երևույթներ, որոնք իրենց են համարում մեծանուն գրողներ, կան իսկապես ինքնատիպ մտածողություն ունեցող արվեստագետներ ու «կրեատիվ» երևալու սևեռումից հիվանդացած մարդիկ»:

Գրականագետի գնահատմամբ, ամենակարևորն այն է, որ կան ժամանակակից գրականություն սիրող ու բոլոր նորություններին հետևող մարդիկ և այս շրջանակը, կարծես թե, ընդլայնվում է տարեցտարի: Ըստ նրա, սա ամենակարևոր ձեռքբերումն է:

«Լսարանի ու գրողի երկխոսությունը կարևոր է երկուսի համար էլ ու վստահ եմ՝ շատ դրական արդյունք կունենա: Վստահ եմ, որ մի քանի տարի հետո մենք կխոսենք արդեն որակական լուրջ փոփոխությունների մասին: Խոսքը չի գնում մի քանի ավելի լավ գրող ունենալու մասին, այսօր էլ ունենք ու բոլոր ժամանակներում ունեցել ու ունենալու ենք այդ մի քանի անունները, խոսքը ընդհանուր մթնոլորտի ու ընդհանուր մակարդակի մասին է»,- ասաց Հասմիկ Խեչիկյանը:

Նշենք, որ 1999թ. ՅՈՒՆԵՍԿՕ-ի 30-րդ նստաշրջանի գլխավոր կոնֆերանսում որոշում է ընդունվել մարտի 21-ը սահմանել որպես Պոեզիայի համաշխարհային օր: ՅՈՒՆԵՍԿՕ-ի որոշման մեջ ասվում է. «Պոեզիան կարող է պատասխան լինել ներկայիս մարդու սուր և խորը հոգևոր հարցերին: Բայց դրա համար հարկավոր է հրավիրել ավելի լայն հասարակական մասսաների ուշադրությունը»:

Այս օրը նշվում է նաև Հայաստանում: Այսօր կազմակերպվելու են գրական միջոցառումներ, ընթերցումներ. բանաստեղծները տաբեր հարթակներում կհանդիպեն ընթերցողների հետ, Խնկո Ապոր, Ավետիք Իսահակյանի անվան գրադարաններում, Գրողների միության դահլիճում, Ազգային գրադարանում, գրախանութներում, մարզերում կազմակերպվելու են օրվան նվիրված միջոցառումներ: