Ձեր վստահելի աղբյուրը

Ղրիմում տեղակայված Ուկրաինական բանակի զորամասերի հրամանատարների կարծիքով՝ Կիևի իշխանություններն իրենց հանձնել են բախտի քմահաճույքին՝ մի խոսքով «քցել են»: Ուկրաինական TCH հեռուստաընկերության եթերում նման գնահատական է հնչեցրել Կերչ քաղաքում տեղակայված ուկրաինական զորամասերից մեկի հրամանատարի տեղակալ Ալեքսեյ Նիկիֆորովը:

Հաղորդման ժամանակ ծովային հետևակի զորամասի դաստիարակչական աշխատանքների գծով հրամանատարի տեղակալ Նիկիֆորովը տեղեկացրել է, որ իր ենթակայության տակ գտնվող զորամասի 49 զինծառայողներ մտադրություն են հայտնել զինծառայությունը շարունակել Ուկրաինայի զինված ուժերում, 20-ը առհասարակ հրաժարվել ծառայությունը շարունակել, իսկ զորամասի անձնակազմի մյուս մասը «խմբով զեկուցագիր է ներկայացրել» Ռուսաստանի բանակում ծառայությունը շարունակելու համար:

Այս տեղեկությունները լսելով Ուկրաինայի պաշտպանության նախարարի պաշտոնակատար Իգոր Տենյուխը կատարվածում մեղադրել է սպային՝ նշելով, որ նա վատ է դաստիարակել իր ենթականերին. «Եթե ձեր ենթականերն անցնում են այլ երկրի կողմը, դա ձեր մեղավորությունն է, ձեր ղեկավարությամբ ու ձեր դաստիարակությամբ: Եթե դրժել եք ձեր երդումը, այդպես էլ ասեք: Դուք երդում եք տվել և պաևրտավոր եք հավատարիմ մնալ դրան»,- ասել է Տենյուխն ու նշել. «Երբ պայմանագրայիններ էիք հավաքագրում, պետք է մտածեիք այսօրվա մասին»:

Ուկրաինայի պաշտպանության նախարարի պաշտոնակատարի խոսքով, զինվորականները պետք է վայր չդնեին զենքերն ու թույլ չտային որևէ մեկը մուտք գործեր զորամասի տարածք:

Իր հերթին Նիկիֆորովը մեղադրել է Տենյուխին այն բանի համար, որ վերջինս իրադարձությունների ողջ ընթացքում երբևէ կապի մեջ չի մտել Ղրիմում տեղակայված զորամիավորումների հրամանատարների հետ, Ուկրաինայի գլխավոր շտաբի ոևրէ ներկայացուցիչ իրենց չի այցելել, մինչդեռ ռուսական բանակի ներկայացուցիչներն ամեն օր այցելել և առաջարկել են իրենց կողմն անցնել:

«Նրա (տենյուխի) արած առաջին հայտարարությունից հետո բոլոր հրամանատարները հավաքվեցին և հասկացան, որ իրենց «քցել են»: Քեզ զանգե՞լ են: Ոչ: Քեզ զանգե՞լ են: Ոչ: Անգամ Տուրչինովն է զանգել, իսկ Տենյուխը՝ ոչ»,- նշել է Նիկիֆորովը:

Նա նշել է, որ ստեղծված իրավիճակում միակ բանը, որ ցանկանում է, զորացրվելն է. «Այսպիսի գեներալների հետ (նկատի ունի Տենյուխին) ես այլևս չեմ կարող ծառայել Ուկրաինային: Այստեղ՝ Ղրիմում, Ռուսաստանի դրոշի ներքո, ևս չեմ կարող ծառայությունս շարունակել»,- հայտարարել է նա: Ինչ վերաբերում է ծառայակիցներին, ապա վերջինս նշել է, որ այն անձինք, ովքեր հավատարիմ են մնացել Ուկրաինային, անհրաժեշտ է տարհանել, որպեսզի զինվորականներն մայրցամաքային Ուկրաինա մեկնեն օրինական հիմունքներով: Իսկ նրանք, ովքեր անցել են Ռուսաստանի կողմը, անհրաժեշտ է զորցրել, քանզի հակառակ դեպքում կստացվի, որ ծառայություն են անցնում միաժամանակ երկու տարբեր բանակներում:

Խոսելով Կիևից հնչած այն հայտարարության մասին, թե զինվորականներին հանձնարարցվել է անհրաժեշտության դեպքում կրակ բացել՝ Նիկիֆորովը նշել է, որ դա ընդամենը հրամանատարների հոգսը թեթևացնելու ձև է. «Կրակ բացելու հրամանը ռազմական գործողություններ սկսելու հրաման չէ: Դրանք սկսվում են պատերազմ հայտարարելով: Դա պետք է գլխավոր հրամանատարը որոշի, այլ ոչ թե զորամասի հրամանատարը նստի ու որոշի, թե ինքը պատերազմ է սկսում: Այն հրամանը, որ իրենք տվեցին սպայի սպանվելուց հետո, ընդամենը զինվորական կանոնագիրքն է՝ հոդված 22: Եթե կյանքին վտանգ է սպառնում, և այլ հնարավորություններ չկան, անհրաժեշտ է զենք կիրառել: Ահա և ամենը: Նրանք ընդամենն իրենց հոգսն են թեթևացրել, թե բա կարող եք կրակել: Ո՞ւմ վրա կրակենք, եթե ոչ ոք քեզ վրա չի հարձակվում»:

Նշենք, որ Ղրիմում տեղակայված ուկրաինական զորամասերն աստիճանաբար անցնու են ռուսական բանակի հսկողության տակ: ՌԴ պաշտպանությնա նախարար Սերգեյ Շոյգուն ավելի վաղ հայտարարել էր, որ այն զինծառայողները, ովքեր կնախընտրեն ծառայությունը շարունակել Ուկրաինայի զինված ուժերում ազատ կտարհանվեն Ուկրաինայի տարածք: