Ձեր վստահելի աղբյուրը

Արժույթի միջազգային հիմնադրամը (ԱՄՀ) կենսաթոշակային բարեփոխումների հարցում Հայաստանի կառավարության վրա ճնշումներ չի գործադրել։ Այս մասին այսօր լրագրողների հետ հանդիպման ժամանակ հայտարարեց ԱՄՀ հայաստանյան առաքելության ղեկավար Մարկ Հորթոնը` հավելելով, որ այդ բարեփոխումներին, մասնավորապես` կենսաթոշակների պարտադիր կուտակային բաղադրիչի ներդրմանը, ՀՀ կառավարությունը նախապատրաստվել է 4-5 տարի, խնդիրը քննարկվել է շահագրգիռ կողմերի հետ:

Նրա խոսքերով` իշխանությունները խորհրդակցել են կենսաթոշակային բարեփոխումների ոլորտում մասնագիտացված ֆինանսական կառույցների՝ Համաշխարհային բանկի, ԱՄՆ Միջազգային զարգացման գործակալության հետ, բացի այդ` իշխանությունները փորձել են գտնել ֆոնդերի լավագույն կառավարիչներին:

Ըստ Մ.Հորթոնի` բարեփոխումների հիմնական նպատակներից մեկը տարեցների շրջանում աղքատության մակարդակի նվազեցումն էր:

«Մեր կարծիքով՝ դա լավ մշակված և լավ մտածված բարեփոխում է»,- ասաց Մ.Հորթոնը:

Նրա խոսքերով` այս բարեփոխումներն ազդելու են հասարակության լայն շերտերի վրա:

«Բարեփոխումներում անշուշտ կլինեն հատվածներ, որոնք ավելի հեշտ կընդունվեն, կլինեն նաև այնպիսիք, որոնք շատ ավելի դժվար կընդունվեն: Կենսաթոշակային բարեփոխումներ նախագծելիս ստիպված ես լինում կանգնել մի շարք բարդությունների առաջ, սակայն պետք է հիշել, որ այս բարեփոխումը կարևոր է ապագայի համար»,- ընդգծեց ԱՄՀ հայաստանյան առաքելության ղեկավարը` հավելելով, որ իրենք համարում են, որ այս բարեփոխումներում ապահովվել է պատշաճ հավասարակշռվածությունը: