Ձեր վստահելի աղբյուրը

ՀՀԿ խմբակցության ղեկավար Գալուստ Սահակյանը ԱԺ չորս ոչ իշխանական ուժերի կողմից հերթական ժամանակավոր հանձնաժողովը ստեղծելու նախագծի քննարկման ժամանակ հայտարարեց, որ չի հասկանում` սա լավ է, թե չէ:

«Չեմ հասկանում` սա հումո՞ր է, թե զավեշտ: Սա շահարկում չէ, սա ծես է, ամեն երկուշաբթի պետք է մի բան բերեն այստեղ, ներկայացնեն, որ մի բան ծեսի պես քննարկենք: Մարդու ուղեղը լվացքի մեքենա չէ, որ երբ ուզենա մզի, երբ ուզենա լվանա»,- մտքերի փոխանակման ժամանակ հայտարարեց նա:

Գալուստ Սահակյանի խոսքով` պետք է նայել ով որտեղից է եկել, անցած ճանապարհին. «Մի հատ քեզ նայի` որտեղից ես եկել, ինչ ես արել: Դուք ընդամենը փորձում եք ամբոխ հավաքել, բայց դա դրական գործիք չէ, ժողովուրդն է դրական գործիք: Իսկ ժողովրդին ձևի, միջոցի, ցանկության համար չեք կարող հավաքել: Դուք կուսակցական ոգեշնչմամբ եք առաջնորդվում ու ցանկանում եք անկանխատեսելի դարձնել ու ժողովրդի գլխին չարիք բերել»,- դիմելով ԱԺ ընդդիմադիրներին նշեց նա:

ՀՀԿ խմբակցության ղեկավարի կարծիքով` ժողովուրդն ու ամբոխը իրար հակառակ բաներ են, ժողովուրդն իմաստուն է, ամբոխը՝ հիմար, ժողովուրդը ծանր է, իսկ ամբոխը՝ թեթև:

«Ժողովուրդը աշխատանք է սիրում, ամբոխը՝ թալան: Ժողովուրդը խաղաղասեր է, ամբոխը՝ կռվարար: Դուք ընդամենը սա եք, ու ես չեմ դա ասել, այլ Հովհաննես Թումանյանն է ասել դեռ 1920թ-ին»,- հայտարարեց ՀՀԿ-ական գործիչը:

Այս ելույթն անարձագանք չմնաց ԱԺ նախագահի կողմից. «Պետք էր սկզբում ասել, որ դա Թումանյանն է ասել, որպեսզի պատգամավորները չլքեին դահլիճը»:

Իսկ Գ.Սահակյանի ելույթի պատասխանը հնչեցրեց «Ժառանգություն» խմբակցության ղեկավար Ռուբեն Հակոբյանը, ով հայտարարեց, որ իսկապես հրաշալի էր և խորհուրդ կտար միշտ կարդալով խոսել ու մեջբերել Թումանյանի ստեղծագործություններից: