Ձեր վստահելի աղբյուրը

Հայաստանի ներքաղաքական վերջին զարգացումների, քառյակի համաձայնությունների ու գործողությունների մասին Panorama.am-ը զրուցեց «Ազատ դեմոկրատներ» կուսակցության առաջնորդ, ԱԺ պատգամավոր Խաչատուր Քոքոբելյանի հետ:

-Պարոն Քոքոբելյան, ԱԺ ոչ իշխանական չորս ուժերը եկել են համաձայնության և ապրիլի 28-ի նիստում մտադիր են կառավարությանն անվստահություն հայտնելու գործընթաց սկսել: Դուք կմիանա՞ք:

-Հարցն այդպես դնելը ճիշտ չեմ համարում, որովհետև ի սկզբանե մենք պահանջել ենք, գտել և գտնում ենք, որ կառավարության հրաժարականն այսօր անհրաժեշտ է: Իհարկե ես կողմ կքվեարկեմ կառավարության հրաժարականին, բայց այսօր քաղաքական շատ կարևոր խնդիրներ կան, որոնք պետք է բարձրաձայնվեն` խոսքը Հայաստանն օրեցօր ինքնամեկուսացման տանելու գործընթացի մասին է, ինչպես նաև այն ամենի, ինչն ազդում է ՀՀ յուրաքանչյուր քաղաքացու վրա: Եվ շատ կարևոր է, թե ինչ ենք մենք ուզում ստանանք: Ինքս, ինչպես արդեն ասացի, կողմ եմ քվեարկելու, բայց նաև մեծ խնդիրներ կան, որ պետք է բարձրաձայնվեն և ես կբարձրաձայնեմ դրանք:

-Ուժերին շատ են մեղադրում, որ, այո, գաղափարը կա, բայց չի խոսվում մեխանիզմների մասին: Դուք տեսնում եք, որ քառյակն իսկապես պատկերցնում է, թե ինչ պետք է անի և ինչ հաջորդականությամբ, թե միայն պահանջն ունեն:

-Իմ կարծիքով, այդ հարցը պետք է տալ քառյակին, բայց ընդհանրապես կառավարության հրաժարականին հասնելու մեխանիզմը շատ հստակ կա: Այլ խնդիր է, որ բացի մեխանիզմը ես գտնում եմ, որ թե քաղաքական գործիչների, թե հասարակության համար պետք է հասկանալի լինի, թե ինչ ենք մենք ուզում ստանալ: Իհարկե չի կարելի ասել, թե ոչինչ չի լինելու, եկեք ոչինչ չանենք, բայց այս գործընթացները արժեզրկել չի կարելի:

Ցավում եմ, որ Հայաստանի Հանրապետությունում մինչև հիմա գլոբալ առումով իշխանափոխություն չի եղել` արտաքին վեկտորի առումով և այլն: Այսինքն` մինչ այս պահը տեղի են ունեցել միայն մարդկանց փոփոխություններ, դա ակնհայտ է: Մեր տարածաշրջանում միակ երկիրը, որտեղ ընտրությունների միջոցով իշխանափոխություն եղավ դա Վրաստանն է: Իսկ դա ժողովրդավարության համար ամենաանհրաժեշտ նախապայմանն է:

-Եթե չեմ սխալվում Ձեր հարցազրույցներից մեկում ասել էիք, որ ԱԺ չորս ուժերի հետևում տեսնում եք ՀՀ երկրորդ նախագահին...

-Ոչ թե ասել էի, որ տեսնում եմ Ռոբերտ Քոչարյանի մասնակցությունը, այլ հարցրել էին` Ռ.Քոչարյանի մասնակցությունը տեսնում եք և ես ասել էի, որ իմ համար նրա մասնակցությունն ակնհայտ է: Եվ կարծում եմ, որ չկա որևիցե մեկը, ով այս գործընթացի մասով պատկերացում ունի, ով հետևում է քաղաքական դաշտում տեղի ունեցող պրոցեսներին, ում հայտնի են երկրորդ նախագահի հրապարակային մոտեցումները... և այդտեղից չբխի, որ ինքը կողմնակից է:

-Ձեր կարծիքով, երկրորդ նախագահի գործոնո՞վ է պայմանավորված այն հանգամանքը, որ չորս ուժերից ոչ մեկն այսօր չի հայտարարում, թե ապագա կառավարությունում ում է տեսնում:

-Այս հարցն էլ է ճիշտ ուղղել քառյակին, որովհետև մենք կաշկանդված չենք այդ գործընթացներով, քանի որ չկանք դրանում` նկատի ունեմ ոչ թե հրաժարականի, այլ ընթացող գործընթացի ձևաչափը: Եվ դա շատ պարզ բացատրություն ունի. ինձ համար ընդունելի չէ ցանկացած այն մոտեցում, որ տանում է դեպի Մաքսային միություն և կարծում եմ, որ ակնհայտ է, որ տարբեր պատճառներ կան, որոնց մասին չի խոսվում և դա տակտիկական խնդիր է, որ որոշակիությունը բոլորին չէ, որ մասնակիցներից հայտնի է: Միգուցե սխալվում եմ, բայց իմ շփումները նույն խորհրդարանում և այլն վկայում են այն մասին, որ շատ-շատերը կատարվող իրադարձություններից տեղեկացված չեն: