Ձեր վստահելի աղբյուրը

Այսօր «Բարձրագույն և հետբուհական կրթության մասին օրենքում փոփոխություններ ու լրացումներ կատարելու մասին» ՀՀ օրենքի նախագծի քննարկման ժամանակ փոքրիկ բանավեճ առաջացավ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանի և ԿԳ նախարար Արմեն Աշոտյանի միջև:

Զոհրաբյանը կառավարության ներկայացրած օրինագծի վերաբերյալ հարց տալուց առաջ Ֆեյսբուք սոցիալական ցանցում ակտիվ օգտատեր համարվող Արմեն Աշոտյանին հրավիրեց մարտի 31-ին խորհրդարանում կայանալիք «ֆեյքերի մասին» օրինագծի վերաբերյալ լսումներին:

«Դուք, որպես սոցիալական ցանցերի խիստ ակտիվ օգտատեր և այդ ոլորտւմ խիստ բազմաժանր գործիչ, կարող եք գալ և այդ լսումներին մասնակցել: Ֆեյքերի, սոցիալական ցանցերի, այնտեղ օգտագործվող բառամթերքի վերաբերյալ որպես այդ ոլորտում պրոֆեսիոնալ, Ձեր դիտարկումները հայտնել», -դիմելով Աշոտյանին հրավիրեց Նաիրա Զոհրաբյանը, ով օրինագծի համահեղինակներից մեկն է:

Աշոտյանն ի պատասխան, ասաց, որ ուրախ է հրավերի համար և եթե հրավիրեն, «մեծ սիրով» կներկայանա լսումներին ու կպատմի իր փորձի մասին:

«Կպատմեմ հետևյալի մասին` ինչպես ի տարբերություն որոշ քաղաքական միավորների և ուժերի, փող չծախսել էդ գործի վրա, բայց ստանալ այնպիսի արդյունք, որը զրոյացնի մարդկանց հազարավոր ծախսերը, որոնք արվում են այդ բնագավառում: Չեմ ուզում գլուխ գովալ, բայց կարծում եմ, որ առ այսօր ինձ հաջողվում է լավ իմաստով ջրել այն քաղաքական ներդրումները, որոնք կատարվում են վիրտուալ տարածքի մեջ կոնկրետ նպատակների հասնելու համար: Որպես օրինագծի համահեղինակ, կարող եմ ձեզ այլ մարդկանց անուններ ևս հուշել, որոնք նույնպես շատ օգտակար կարող են լինել. սոցիալական ցանցերից, օրինակ, շատ ակտիվ օգտվում են ԱՄՆ նախագահը, իր փորձն էլ շատ լավը կլինի, կարծում եմ կարելի է հրավիրել նաև Հռոմի պապին, Շվեդիայի արտգործնախարար Կարլ Բիլդտին: Ես ինձ իհարկե, այդ շարքին չեմ դասում, բայց ես իմ համեստ հայկական փորձը պատրաստ եմ փոխանակել Ձեզ հետ», -հավելեց նախարարը:

Վերջինն անդրադարձավ նաև կրթության ոլորտին վերաբերող օրինագծի վերաբերյալ Զոհրաբյանի դիտարկումներին, որը հետաքրքրվում էր, թե «ինչ լծակներ պետք է ունենա խորհրդարանը միջամտելու բուհերում վերին շեմի վերաբերյալ չափորոշիչների սահմանման հարցում»: Աշոտյանն ասաց, որ Նաիրա Զոհրաբյանի արտահայտած «լծակ» բառը ֆեոդալիզմին բնորոշ մտածելակերպի մասին է խոսում:

Խորհրդարանում այլընտրանքը ներկայացնող պատգամավորը, սակայն անարձագանք չթողեց նախարարի ելույթը և նմկատեց. «Ֆեոդալիզմի մասին խորհուրդ չէի տա խոսել, այդ դեպքում շատ փակագծեր կբացվեն որոշումների կայացման ֆեոդալական մեխանիզմների մասին, երբ գիշերային նիստերից հետո ողջ հանրությունը տեղյակ է լինում կայացված որոշումների մասին, այդ թվում նաև Դուք՝ հանրության հետ մեկտեղ»,- դիմելով Աշոտյանին հայտարարեց Զոհրաբյանը:

Իր պատասխան արձագանքում ԿԳ նախարարը անդրադարձավ գիշերային նիստերի մասին Զոհրաբյանի դիտարկմանը ու նկատեց.«Գիշերային նիստերի մասին ասեմ, որ, իհարկե, գիշերը տարբեր զբաղմունքներ կարող են լինել, բայց նիստերը վատագույնը չեն: Օրինակ, վատագույնը կարող են լինել կրակոցները, տարբեր տեսակի վրաերթերը, ծեծկռտուքները, գիշերային կյանքի վատ տարբերակներ կան, որոնք, ի դեպ, մամուլը չի լուսաբանում: Ի դեպ, երբեմն մամուլը չի լուսաբանում այդ կյանքի նաև ցերեկային տարբերակները….»: