Ձեր վստահելի աղբյուրը

Շանթ Հարությունյանի և նրա ընկերների գործով նախաքննությունն ընթանում է տենդենցիոզությամբ, և ավելին, նախաքննական մարմնի անկախությունը հարցականի տակ է: Այդ մասին այսօր լրագրողների հետ հանդիպման ժամանակ հայտարարեց Շանթ Հարությունյանի հետ միասին նոյեմբերի 5-ի դեպքերից հետո կալանավորված Միսակ Առաքելյանի պաշտպան Հովհաննես Քոչարյանը, ով ի դեպ, ՀՀ ոստիկանության անձնագրերի և վիզաների վարչության նախկին պետն է եղել:

«Ինքներդ պատկերացրեք` դեպքը կատարվում է ոստիկանների մասնակցությամբ, ըստ նախաքննական մարմնի, տղաների գործողության արդյունքում տուժել են ոստիկաններ, որոնք ստացել են մարմնական վնասվածքներ և հիմա ով է քննում քրեական գործը, ոստիկանությունը: Այսինքն` տուժողները ոստիկաններն են, քրեական գործի նախաքննությունն իրականացնում է ոստիկանությունը: Ես կարծում եմ, որ այս պարագայում օբյեկտիվ, լրիվ և բազմակողմանի քննության մասին խոսք լինել չի կարող», -հայտարարեց Հովհաննես Քոչարյանը:

Իրավապաշտպան Արթուր Սաքունցի խոսքով, Շանթի և նրա ընկերների նկատմամբ կատարվածը «խմբակային հետապնդում» է:

«Քննչական մարմնի վարքագիծը անխտիր բոլորի նկատմամբ միակերպ է», -կարծիք հայտնեց Սաքունցը` ընդգծելով, որ կալանքի ժամկետը երկարացնելը նպատակ ունի մարդկանց մեկուսացնել հասարակությունից:

Դեպքից հետո հինգ ամիսների ընթացքում նախաքննական մարմին, ըստ Սաքունցի, «բացարձակապես ոչինչ չի արել», քննչական գործողություններ չեն կատարվել: Դա հաստատեց նաև ասուլիսին ներկա Շանթ Հարությունյանի պաշտպան Ինեսա Պետրոսյանը: Ավելին, դեռևս նախորդ ուրբաթ քննիչը խոստացել է, որ քննչական գործողություններ կիրականացվեն, բայց հետո պարզվել է, որ դրանք հետաձգվել են:

Իսկ ինչ վերաբերում է մամուլում շրջանառվող այն տեղեկություններին, թե հնարավոր է Շանթ Հարությունյանի ու նրա ընկերների նկատմամբ մեղադրանքը փոխվի, Ինեսա Պետրոսյանը չհաստատեց դրանք` ասելով. «Փոփոխության վերաբերյալ վարույթն իրականացնող մարմինը հստակ չի հայտարարում»:

Մեղադրանքի փոփոխության հարցում, սակայն, լավատես չէ Հովհաննես Քոչարյանը:

«Եթե բոլոր այսպես կոչված, մեղադրյալների նկատմամբ նոր հոդվածով մեղադրանք առաջադրվի, որոնք իրենց դիսպոզիցիայի կառուցվածքով լինեն իրավաբանորեն ավելի անորոշ, այսինքն` հոդվածներ, որի համար պատասխանատվությունը կարող է վրա հասնել անկախ հետևանքների փաստից և դրանց ծանրության աստիճանից: Այդպիսի հոդվածներ քրեական օրենսգրքում կան, բնականաբար, որոնք դժվարացնելու են քննությունը: Դա կարվի մի նպատակով` որպեսզի այս խմբից հանկարծ որևէ մեկը արդարացման հիմքով ազատության մեջ չհայտնվի», -հայտարարեց փաստաբան Քոչարյանը` ընդգծելով, որ չի հավատում, որ մեղմացման հիմքով հոդվածներ կփոխվեն:

Հիշեցնենք, որ նախորդ տարվա նոյեմբերի 8-ին կալանավորված Շանթ Հարությունյանի, Ավետիս Ավետիսյանի, Լիպարիտ Պետրոսյանի, Արմեն Հովհաննիսյանի, Վարդան Վարդանյանի, Միսակ Առաքելյանի, Ալբերտ Մարգարյանի, Անուշավան Գրիգորյանի և Մկրտիչ Հովհաննիսյանի նկատմամբ մեղադրանք է առաջադրվել ՀՀ քրեակյան օրենսգրքի 316 հոդվածի 2-րդ մասի հատկանիշներով` «իշխանության ներկայացուցիչ նկատմամբ ոչ վտանգավոր բռնություն գործադրելը», և նրանք մինչ այժմ կալանավորված են: