Ձեր վստահելի աղբյուրը

ՀՀ կառավարության այսօրվա նիստում հավանություն է տրվել Հայաստանի Հանրապետության 2014-2025թթ. հեռանկարային զարգացման ռազմավարական ծրագրին: Լրագրողների հետ հանդիպման ժամանակ այս մասին նշեց ՀՀ էկոնոմիկայի նախարար Վահրամ Ավանեսյանը` հավելելով, որ  ծրագրի մշակման աշխատանքները սկսվել են դեռևս 2011 թվականին, և սա մշակված երրորդ երկարաժամկետ ծրագիրն է:

Նախարարի խոսքերով` ծրագիրն ունի 3 հիմնական նպատակ, որից առաջինը և հիմնականը զբաղվածության ընդլայնումն է: Թիրախները, որոնք դրված են զբաղվածությանն ընդլայնման համար, ըստ Վ. Ավանեսյանի, բավականին հավակնոտ են, մասնավորապես, մինչև 2017 թվականը նախատեսվում է շուրջ 60 հազար նոր աշխատատեղերի ստեղծում: Հիմնականում դա լինելու բարձր վարձատրվող: «Մենք հույս ունենք, որ էականորեն ընդլայնվելու է ֆորմալ զբաղվածությունը: Մենք հիմա խոսում ենք ոչ գյուղատնտեսական զբաղվածության մասին, և այս ծրագիրը առաջնային տեղ է տալիս ոչ գյուղատնտեսական զբաղվածությանը»,- ասաց նախարարը:

Ծրագրի երկրորդ հիմնական խնդիրը Հայաստանում շարունակաբար սոցիալական և պետական եկամտային քաղաքականության միջոցով աղքատության նվազեցումն է: «Նախատեսվում է, որ 2025 թվականին Հայաստանում աղքատությունը կիջնի 13 տոկոսից»,- ընդգծեց Վ.Ավանեսյանը:

Ինչ վերաբերում է երրորդ խնդրին, ապա դա վերաբերում է ինչպես ընդհանրական` գործարար միջավայրի ցուցանիշներին, այնպես էլ ոլորտային ցուցանիշներին: «Մեր խնդիրն է՝ բարելավվել գործարար միջավայրը և խթանել ՓՄՁ ոլորտը հարկային դաշտի բարելավմամբ, վարկավորումների միջոցով»,- ասաց նա:

Անդրադառնալով ծրագրերի ռիսկերին, Վ.Ավանեսյանը նշեց, որ ցանկացած ծրագիր, առավել ևս երբ խոսքը վերաբերվում է ռազմավարական երկարաժամկետ ծրագրերին, պետք է դիտարկել որպես նպատակային ցուցանիշների, այլ ոչ կանխատեսումների ծրագիր: « Նպատակ չկա հասնել կոնկրետ այն թվերին, որոնք ներկայացված են այս ծրագրերում` բացարձակ արժեքներով, քանի որ հասնել այդ ցուցանիշներին երբևէ չի հաջողվելու, քանի որ ակնկալիքը դա չէ, այլ այն, որ կարողնանք ունենալ այնպիսի բազային սցենար, որի շուրջ հնարավոր կլինի կառուցել Հայաստանի քաղաքականությունը, միջոցառումներն ու բյուջետային ծրագրերը»,- նշեց էկոնոմիկայի նախարարը:

Ըստ Վ.Ավանեսյանի` ռիսկերի գնահատականը առանձապես կարևոր է, որպեսզի կարողանան պատրաստ լինել դիմագրավելու ու մեղմացնելու այդ ռիսկերի ազդեցությունը Հայաստանի տնտեսության վրա: