Ձեր վստահելի աղբյուրը

Թուրքիայի վարչապետ Ռեջեփ Թայիփ Էրդողանի և «Հիզմեթ» (նուրսիստներ) մահմեդական շարժման առաջնորդի միջև ընթացող պայքարը տեղափոխվել է Ադրբեջան և դարձել է նախագահի աշխատակազմի քաղաքական վերլուծությունների և տեղեկատվության տրամադրման բաժնի ղեկավար Էլնուր Ասլանովի աշխատանքից հեռացվելու պատճառը: Այս մասին ասվում է բրիտանական «Պատերազմի և խաղաղության լուսաբանման ինստիտուտի» (IWPR) կայքում տեղադրված հոդվածում:

Սակայն վերլուծաբանները գտնում են, որ նախագահի աշխատակազմի քաղաքական և սոցիալական բաժնի ղեկավար Ալի Հասանովի և Էլնուր Ասլանովի միջև դեռ վաղուց պայքար էր ընթանում ազդեցության ոլորտների ընդլայնման համար, իսկ Ասլանովի նուրսիստական շարժման մեջ ներգրավածության մեղադրանքները նրանից ազատվելու պատճառ էին միայն:

Ըստ հոդվածի՝ Ալի Հասանովը, խոսելով Ադրբեջանում նուրսիստների ունեցած ազդեցության մասին, կոչ է արել զգոն լինել. «Այդ շարժման ներկայացուցիչները պետք է հասկանան, որ նրանց չի հաջողվի իրենց շահերին հարմարեցնել պետական քաղաքականությունը»,- ասել է նա մարտի 7-ին կայացած մամուլի ասուլիսի ժամանակ: Մարտի 17-ին Էլնուր Ասլանովին պաշտոնանկ են արել:

Ինչպես «IWPR»-ին ասել է ադրբեջանցի քաղաքագետ «Արևմուտք-Արևելք» հետազոտական կենտրոնի տնօրեն Արաստուն Օրուջլուն, բարձրաստիճան պաշտոնյաների միջև պայքարը հենց այսպիսի միջոցներով է իրականացվում և այսպիսի վիճաբանություններ կարելի է սպասել նաև հետագայում:

««Հիզմեթ» շարժումը տարիներ շարունակ իր գործունեությունն էր ծավալում Ադրբեջանում: Եթե այն իրական վտանգ ներկայացներ, կառավարությունը նրա դեմ քայլեր կձեռնարկեր դեռ շատ տարիներ առաջ»,- ասել է նա:

Ըստ հոդվածի՝ խնդիրն այնքան հակասական է, որ շատ քաղաքական վերլուծաբաններ խուսափում են այն բաց քննարկել: Ադրբեջանցի փորձագետներից մեկը, ով չցանկացավ նշել իր անունը, ասել է, որ հնարավոր է, որ Ասնալովը Գյուլենի շարժման հետ առնչություն չունի:

««Հիզմեթ» շարժումը և նրա գործունեությունը Ադրբեջանում կարող են օգտագործվել ներքաղաքական պայքարի համատեքստոըմ»,- ասել է նա:

Հոդվածում ասվում է, որ «Հիզմեթ» շարժումը առաջին արտասահմանյան հաստատություններից էր, որը սկսել է իր գործունեությունը Ադրբեջանում ԽՍՀՄ-ի փլուզումից հետո: Ադրբեջանի նախկին նախագահ Հեյդար Ալիևը աջակցել է թուրքական դպրոցների կառուցմանը Ադրբեջանում: Ներկայումս «Հիզմեթը» երկրում ղեկավարում է 11 ավագ և 13 միջնակարգ դպրոցներ և մեկ համալսարան: Ըստ անանուն փորձագետի՝ դրանք կարող են փակվել ներկա զարգացումների պատճառով:

Նշենք, որ «Յենի Մուսավաթ» թերթը, հղում կատարելով սոցիալական ցանցի աղբյուրներին, տեղեկատվություն էր տարածել այն մասին, որ Թուրքիայի պաշտոնական շրջանակները Ադրբեջանի կառավարությանը տրամադրել են Իլհամ Ալիևի աշխատակազմում և Ադրբեջանի կառավարությունում աշխատող այն բարձրաստիճան պաշտոնյաների ցուցակը, ովքեր նուրսիզմ աղանդի անդամ են, կամ որևէ կապ ունեն դրա հետ:

Ֆեթուլլահ Գյուլենի աղանդավորական խմբավորման կողմից հավաքագրված պաշտոնյաների ցուցակում հայտնվել են Նախագահի աշխատակազմի վարչության պետ Էլնուր Ասլանովը, «SOCAR»-ի փոխնախագահ Խալիգ Մամեդովը, Կրոնական կառույցների հետ աշխատանքի հարցերով պետական կոմիտեի ղեկավար Էլշադ Իսկանդերովը, փոխնախագահ Գյունդուզ Իսմայլովը, Երիտասարդության և Սպորտի փոխնախագահ Ինթիգամ Բաբաևը, պատգամավոր Ջեյհուն Օսմանլին, նախագահին կից Ռազմական հետազոտությունների կենտրոնի տնօրեն Ֆարհադ Մամեդովը, Երիտասարդության ֆոնդի ղեկավար Ֆարհադ Հաջիևը: Մարտի 17-ին Էլնուր Ասլանովը հեռացվել է Ադրբեջանի Նախագահի աշխատակազմի Քաղաքական վերլուծությունների և տեղեկատվության տրամադրման վարչության ղեկավարի իր պաշտոնից: