Ձեր վստահելի աղբյուրը

Քեսաբում առկա իրավիճակի մասով թուրքական մամուլը պահում է միայն պաշտոնական գիծը, այն է` Թուրքիան դրա հետ կապ չունի, Թուրքիան դատապարտում և պատրաստ է իր օգնության ձեռքը մեկնել բոլոր փախստականներին, այդ թվում և սիրիահայերին: Այս մասին լրագրողների հետ հանդիպմանը հայտարարեց թուրքագետ Արտակ Շաքարյանը:

Նրա խոսքով, Լաթաքիայի հատվածում է ապրում Սիրիայի նախագահ Բաշար Ասադի ընտանիքը և Ասադի ուժը գալիս է Լաթաքիայից և գրոհայինների, այդ թվում և թուրք գրոհայինների թիրախը Լաթաքիան վերցնելն էր, որպեսզի Ասադին թուլացնեն:

«Քեսաբը Լաթաքիայի ճանապարհին էր և կարելի է ասել, որ մեկ հարվածով թուրքերը երկու թիրախի խբեցին` մի կողմից շատ պարսավելի է հայերի առավել դաժան սպանությունները, բայց մյուս կողմից էլ թուրքերը նպատակադրված, թե ակամայից, բայց կարողացան շեղել Քեսաբից քննարկումները այսպես կոչված լրտեսական արտահոսքով: Ուստի Քեսաբի հարցն այսօր ավելի շատ Թուրքիայում քննարկվում է այն կոնտեքստում, թե հայերը փորձում են օգտվել իրավիճակից և ևս մեկ անգամ բարձրաձայնել Հայոց Ցեղասպանության մասին»,- նշեց թուրքագետը:

Անդրադառնալով վերջին զարգացումներին, որ եղան Քեսաբի ողբերգության վերաբերյալ և քայլերի հաջորդականությանը, Արտակ Շաքարյանը նշեց, որ պատգամավորական պատվիրակության այցելությունը Սիրիա, հանդիպումները թե քեսաբահայության, թե Սիրիայի բարձրաստիճան իշխանությունների հետ շատ կարևոր էր, մասնավորապես նաև այն իմաստով, որ նախագահ Ասադից ստացանք երաշխիքներ, որ Ասադը զորամիավորումներ կուղարկի այնտեղ, կհետաքրքրվի հայերի ճակատագրով ու կհետևի իրավիճակին:

Բայց մնացածը առանձին մեկնաբանեց.  «Այն արձագանքները, թե եկեք հավաքենք 50 հոգանոց զինյալների ջոկատ, ուղարկենք Սիրիա պայքարելու իմ կարծիքով, շատ օպորտունիստական են ու այդքան էլ իրատեսական չեն, երբ կա սիրիական մեծ ու հզոր բանակը: Բնականաբար, Սիրիան չի պաշտպանելու սիրիահայերին նրանց սիրուն աչքերի համար, այլ պաշտպանելու է Լաթաքիան պահելու համար, այսինքն Սիրիան ունի իր ռազմաքաղաքական հաշվարկները, ունի հակաթուրքական շատ հստակ դիրքորոշում: Եթե մենք ունենք այդքան մարտունակ զանգված, ապա եկեք ուղարկենք այն Շամշադին մեր` ՀՀ անմիջական անվտանգությունը պահելու համար»,- ընդգծեց:

Նաև  հավելեց` այո, քեսաբահայությունը մեր մասնիկն է, մեր արյունն է, բայց ճիշտ է նաև հիշել, թե ինչ էին խոսում վերլուծաբանները վեց ամիս առաջ Քեսաբի մասին. «Նույն խնդիրն է ունեցել Քեսաբը և պետք է, որ արաբագետները այդ հաշվարկն արած լինեին, որ ի վերջո Քեսաբը կանգնելու է այս խնդրի առաջ: Ուստի այս 50 հոգանոց զորաջոկատի մասին պետք էր մտածել վեց ամիս առաջ, որ տեղի չունենար այն, ինչ տեղի ունեցավ և ոչ թե այսօր. պոստ-ֆակտում տեղի ունեցածից հետո վերլուծաբան լինելը շատ հեշտ է: Այո, դա մեր խնդիրն ու մշտական թերությունն է եղել չկանխատեսելու մեղքը»:

Ինչ վերաբերում է հարցին, թե արդյո՞ք հնարավոր տեսնում է հայության վերադարձը Քեսաբ, բանախոսը ևս մեկ անգամ հույս հայտնեց, որ Ասադը կանի ամենը այն ազատագրելու համար և իրավիճակի կարգավորման պարագայում հայերը կվերադառնան իրենց օջախներ` այդպիսով պահպանելով հայերի բնակավայրը:

Նախորդիվ`

Սիրիական զորքերն անցել են Քեսաբը զինյալներից ազատագրելու գործողությանը