Ձեր վստահելի աղբյուրը

Հայաստանի տարբեր բնակավայրերում, մասնավորապես, Արմավիրի մարզում տեղացած առատ ձյունը անակնակալ էր մարզի գյուղերի բնակչության համար, հատկապես նրանց, ովքեր ունեն ջերմատներ: Ձյան հաստ շերտը ծանրացել էր գյուղացիների ջերմատների վրա, որոնք հիմնականում պատրաստված են պոլիէթիլենից, ինչի արդյունքում մեծ մասի ցելոֆանը կամ պատռվել էր, կամ կախվել ներքև՝ բույսերի վրա:

Մեծ պատուհասի առաջ էին կանգնել Արմավիրի մարզի Ակնաշեն գյուղի բնակիչները. նախ լուսադեմին ժամը 5-ից գյուղը (նաև հարակից գյուղերը) հոսանքազրկվել էին, իսկ գիշերվա ուժեղ քամին վնասել էր ջերմատների պոլիէթիլենը: Գյուղացիներից մեկը Panorama.am-ի թղթակցի հետ զրույցում պատմեց, որ առավոտյան փաստի առաջ են կանգնել՝ «ջերմոցը» հայտնաբերելով պատռված:

Իսկ էլ ավելի են զարմացել, երբ Էջմիածնի խանութներից և ոչ մեկում չեն կարողացել պոլիէթիլեն գտնել:

«Ինչքան խանութ կար քաղաքում ման էկանք, բայց ոչ մի կտոր չգտանք, որ ջերմոցները փակեինք, էս ինչ էր: Խանութների աշխատողներն ասում էին, որ գյուղերից եկել ու ինչքան հանրավոր ա տարել են», -մեզ եհտ զրույցում պատմում էր տիկին Գայանեն:

Գյուղացիները ջերմոցների վրայից ձյան հաստ շերտը հեռացնում էին երկար փայտի կտորներով, իսկ ջերմոցների ներսում վառարաններ տեղադրում՝առաջիկա օրերին սպասվող ցրտերին դիմակայելու համար:

Ձյունն այնպիսի հաստ շերտով էր նստել ծաղկած պտղատու ծառերի ճյուղերին, որ հնարավոր չէր կիրառել նախորդ օրը տարբեր հեռուստաալիքներով ակտիվորեն շրջանառվող գյուղնախարարի հորդորը՝ ծխահարել այգիները:

Առայժմ հայտնի չէ, թե ինչքան վնաս է հասցրել ցրտահարությունը գյուղացիներին, բայց օդերևութաբանների կանխատեսումների համաձայն, ցուրտը կշարունակվի. մարտի 31-ի և ապրիլի 1-ի գիշերը Արարատյան դաշտում և նրա նախալեռներում, Տավուշում, Սյունիքի հովտային գոտիներում սպասվում է ջերմաստիճանի անկում` գիշերը օդում մինչև -4 ...- աստիճան, հողի մակերևույթին` -5...-7 աստիճան ցուրտ: Օդի ջերմաստիճանը ապրիլի 1-ի գիշերը կնվազի 2-3 աստիճանով, և միայն ապրիլի 2-ին կբարձրանա 3-5 աստիճանով:

Նախօրեին գյուղատնտեսության նախարարությունը պաշտոնապես խոստովանել էր, որ ցրտահարությունների դեմ պայքարի այն ծրագիրը, որն օդերևութաբանական կանխատեսումների հիման վրա կազմել և գյուղացիներին էին ներկայացրել գյուղնախարարության մասնագետները, հանրապետություն ներթափանցած հզոր ցիկլոնի պատճառով անզոր գտնվեց տարերքին համարժեք գործողություններ իրականացնելու համար: